Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэр зыфэгъэхьыгъэр мыхэм ясэнаущыгъэ икъоу къызэIуахынымкIэ амалхэр ятыгъэнхэр ары.

Проектым къыделъытэ еджапIэхэм яшIын ыкIи ягъэцэкIэжьын, кIэлэегъаджэхэм яIэпэIэсэныгъэ хэгъэхъогъэныр, зэрэрагъэджэщтхэр, тхылъыкIэхэр къыдэгъэ­кIыгъэнхэр ыкIи нэмыкIхэр. Прог­раммэу «Приоритет 2030» зыфиIорэм тетэу апшъэрэ
еджапIэхэм IэпэIэгъу ятыгъэныр лъэпкъ проектым къыделъытэ. Урысые Федерацием и Президент унашъоу ышIыгъэм тетэу, 2025-рэ илъэсым къыщыублагъэу зэхъокIыныгъэ зыфашIыгъэ лъэпкъ проектыр пхыращы.
Ащ къыдыхэлъытагъэу «ИскусствэхэмкIэ кIэлэцIыкIу кIэлэ­егъэ­джэ анахь дэгъу 2025-рэ» зыфиIорэр Адыгеим я IХ-рэу щызэхащагъ. АР-м культурэмкIэ и Министерствэ иIэпыIэгъоу Мые­къуапэ искусствэхэмкIэ икIэлэцIыкIу еджапIэу N 1-р Iофтхьа­бзэм кIэщакIо фэхъугъ. Шъолъы­рым икIэлэцIыкIу художественнэ еджапIэхэм ыкIи искусствэхэмкIэ еджапIэхэм аIут кIэлэегъэджэ анахь дэгъухэм ясэнэхьат Iэпэ­Iэсэныгъэ хагъэхъоным ыкIи ахэм IэпыIэгъу афэхъугъэным мыр фытегъэпсыхьагъ. КIэлэегъаджэ­хэу сэнаущыгъэ зыхэлъ кIэлэцIы­кIухэу творчествэм нахь дихьы­хыхэрэм Iоф адэзышIэхэрэм яIэ­пэIэсэныгъэ зыкъегъэIэтыгъэ­ныр зэнэкъокъум ипшъэрылъ шъхьаI.
ЗэхэщакIохэм щыIэныгъэм зэ­хъокIыныгъэу фэхъухэрэр къыдалъытэзэ, кIэлэегъаджэхэм ясэнаущыгъэ нахьышIоу къызэIуа­хынымкIэ зэнэкъокъур гъэшIэ­гъонэу агъэпсыгъ. Республикэм искусствэхэмкIэ икIэлэцIыкIу еджапIэхэм ащылэжьэрэ кIэлэ­егъэджи 10 Iофтхьабзэм хэлэ­жьагъ. Зэнэкъокъур уцугъуищэу зэтыраутыгъ. Апэрэм хэхьагъ ушэтынхэу «Сэлам шъосэхы! Ар сэры!», «КIэлэеджакIом гущыIэгъу сыфэхъу», «Еджэгъу сыхьат». ЯтIонэрэм пресс-конференциеу «Илъэсым икIэлэегъаджэ упчIэ етэты» ыкIи концерт къэгъэлъэгъоныр щызэхащагъ. А уцугъуитIум ауж кIэуххэр зэфахьысыжьыгъэх, кIэлэегъэджэ анахь дэгъуи 2-р къыхахыгъ. Ахэр ящэнэрэ уцугъом хэлэжьагъэх ыкIи текIоныгъэр, хагъэунэфыкIырэ чIыпIэр къыдэзыхыгъэхэр агъэнэфагъэх.
«ИскусствэхэмкIэ кIэлэцIыкIу кIэлэегъэджэ анахь дэгъу 2025-рэ» зыфиIорэр Татьяна Крашновам фагъэшъошагъ. Ар искусствэхэмкIэ кIэлэцIыкIу еджапIэу N 1-м академическэ вокалымкIэ икIэлэегъадж.
— ЛIэшIэгъуныкъо хъугъэу сисэнэхьат сырэлажьэ. Непэрэ уахътэм сыдиштэным сыпылъ. Илъэс 65-рэ сыныбжь нахь мы­шIэми, езгъаджэхэзэ сэри се­джэ. Ар непэрэ кIэлэегъаджэмкIэ анахь шъхьаIэу щытэу сэлъытэ. Арышъ, мыщ фэдэ зэнэкъокъухэм уахэлажьэмэ уисэнэхьаткIэ хэхъоныгъэхэр ошIых. Лъэшэу сыфэраз тиеджапIэ ипащэу Лариса Драчевам. ЕджапIэм хэ­хъоныгъэ ышIыным, кIэлэегъа­джэхэм сэнаущыгъэу ахэлъыр къыхэгъэщыгъэным, ныбжьыкIэ­хэр культурнэ щыIакIэм хэщэ­гъэнхэм ар фэлажьэ, — къы­Iуагъ Татьяна Крашновам.
«КIэлэегъэджэ ныбжьыкIэ анахь дэгъу» зыфиIорэ лъэны­къомкIэ текIоныгъэ къыдихыгъ Мыекъопэ кIэлэцIыкIу художест­веннэ еджапIэм сурэтшIынымкIэ икIэлэегъаджэу Давид Коробовым. КIэлэегъэджэ пэрытым творческэ IэпэIэсэныгъэ зэрэ­хэлъыр зэнэкъокъум къыщиушы­хьатыгъ.
— Искусствэм ыбзэ сурэтым пхырысщызэ кIэлэцIыкIухэм са­дэлажьэ. Тыкъэзыуцухьэрэ дуна­им идэхагъэ IофшIагъэхэм къащэтэгъэлъагъо. Плъышъо зэмы­шъогъухэр къябэкIэу сурэтхэр тэгъэпсых. КIэлэцIыкIум исабыи­гъо насыпышIонэу щыт. Сэ сы­кIэлэегъэджэ ныбжьыкI, сапэ­кIэ нахь езгъэхъоу сылэжьэщт, — къыIуагъ Давид Коробовым.
Зэнэкъокъум уеплъынкIэ гъэ­шIэгъоныгъэ. КIэлэеджакIохэм музыкальнэ Iэмэ-псымэхэм къа­рагъэIонымкIэ, орэд къаIонымкIэ, къэшъонхэмкIэ сэнаущыгъэу ахэ­лъыр умыгъэшIэгъон плъэ­кIыщтыгъэп. Мэкъамэхэр икъоу агъэIорышIэхэзэ, ныбжьыкIэхэр шIыкIэшIухэм алъыхъугъэх, искусствэм ыкIуачIэ къэзэрэугъоигъэхэм алъагъэIэсыгъ. КIэлэ­еджакIохэм егъэжьэпIэшIоу ашIыгъэм уегъэгушIо. Ахэм адэлэжьэрэ кIэлэегъаджэхэм яIоф­шIагъэ мэхьанэшхо зэриIэр зэ­нэкъокъум къыщылъэгъуагъ.
ТекIоныгъэ къыдэзыхыгъэ Татьяна Крашновам къэралыгъо зэнэкъокъум зыфигъэхьа­зырыщт. Iофтхьабзэм хэлэжьа­гъэхэм зэ­кIэми лауреатыцIэ афа­гъэшъошагъ, ахъщэ шIухьафтынхэр ара­тыгъэх.
Лъэпшъыкъо Фатим.