Зэдегъэштэн есынымкIэ Къыблэ федеральнэ шъолъырым ипервенствэ Республикэу Къырым щыкIуагъ.

Ащ хэлэжьэгъэхэ Адыгеим испортсмени 8-мэ Урысыем спортым имастер хъунхэмкIэ шапхъэр рагъэкъугъ. Евпато­рием щызэIукIагъэх Краснодар краим, Донецкэ Народнэ Республикэм, Волгоградскэ ыкIи Ростовскэ хэкухэм, Адыге­им, Севастополь ыкIи Къырым ялIыкIохэр, зэкIэмкIи нэбгырэ 200-м ехъу.
Мэфищым къыкIоцI спортсменхэр лъэныкъо зэфэшъхьафхэмкIэ зэнэкъо­къугъэх. Адыгеир къэзыгъэлъэгъуагъэхэр олимпийскэ резервым испорт еджапIэу В. С. Максимовым ыцIэ зыхьырэм зыщызыгъасэхэрэр ары. Ахэм пэщэныгъэ адызэрахьагъ тренер-кIэлэегъаджэхэу Нина ыкIи Иван Говорковхэм.

Илъэс 13 зыныбжь хъулъфыгъэхэм язэнэкъокъу ащытекIуагъ Ярослав Стародубцевыр. Джащ фэдэу Ярославрэ Анна Додильнэмрэ зэгъусэхэу дышъэ медаль къахьыгъ. Марьяна Ткаченкэмрэ Виолетта Журавлевамрэ ятIонэрэ чIы­пIэр къафагъэшъошагъ. Купхэм язэнэ­къокъу тикомандэ ящэнэрэ щыхъугъ.
Зэхэпхъэгъэ купхэм язэнэкъокъу хэ­лэжьэгъэхэ Анастасия Анисимовам, Джанхъот Эланэ, Диана Михайловам, Анастасия Мороз, Владислава Хлупинам, Елизавета Шестаковам, Тыгъушъэ Самирэ ыкIи Виктория Исаковам балл 243-рэ рагъэкъугъ, спортым имастер хъунхэмкIэ шапхъэр агъэцэкIагъ.
АдыгеимкIэ мыр къэбар гушIуагъу ыкIи тарихъ мэхьанэ иI. Мы спорт лъэп­къым илъэси 10 хъугъэу Мыекъуапэ зыщеушъомбгъу.