ыгъуасэ къалэу Мые­къуапэ къыщызэIуахыгъ кощын IофхэмкIэ гупчэм — АР-м хэгъэгу кIоцI Iоф­хэмкIэ и Минис­терствэ икъэралыгъо унитарнэ предприятиеу «Паспорт-визэ къулы­къур» зыфиIорэм икъутамэ иадминистративнэ унакIэ. ОфисыкIэр урамэу Пролетарскэм фэтэрыбэ хъурэ унэу тетым (N 304-м) хэтыщт.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэ игуадзэу Цэй Эдуард, респуб­ликэм хэгъэгу кIоцI IофхэмкIэ иминистрэу Олег Безсмельницыныр, АР-м и Прокуратурэ, щынэгъончъэнымкIэ федеральнэ къулыкъум и ГъэIорышIапIэ, АР-м ошIэ-дэмышIэ IофхэмкIэ и Министерствэ, Росгвардием и ГъэIорышIапIэ япащэхэр, АР-м хэгъэгу кIоцI IофхэмкIэ и Министерствэ дэжь щызэхэщэгъэ Общественнэ советым хэтхэр, общественностым илIыкIохэр.
Кощын IофхэмкIэ пшъэры­лъы­бэ зэшIозыхырэ гупчэр (ММЦ-р) хэушъхьафыкIыгъэ под­разделениеу щыт, 2016-рэ илъэсым ар зэхащэгъагъ. Квад­рат метрэ 765-м ехъу зыубытырэ чIыпIакIэм Iизын ятыгъэнымкIэ Iофыгъохэм зыщапылъхэ отделхэр, зэхэщэн-методикэ IофшIэным епхыгъэ Iофтхьа­бзэхэм афэгъэзагъэхэр зычIэс унэхэр хэтых. Электрон чэзыур мыщ къыщыдэлъытагъ, къэкощы­хэрэм япсауныгъэ изытет зыщауплъэкIурэ кабинетхэр хэтых, IэкIыб къэралхэм къарыкIы­гъэ­хэм урысыбзэр, Урысыем итарихъ, ихэбзэгъэуцугъэ зэрашIэ­рэм иуплъэкIуни щызэхащэ.

Адыгеим и ЛIышъхьэ къызэ­рэхигъэщыгъэмкIэ, къулыкъум мылъку-техникэ лъэныкъомкIэ иIофхэм язытет нахьышIу шIыгъэным, Гупчэм щылажьэхэ­рэм­рэ къекIуалIэрэмрэ яIофыгъохэм язэшIохын нахь къафэпсынкIэным елъытыгъэу къэуцурэ пшъэ­рылъхэр зэшIохыгъэнхэ фае.
«Кощын Iофым изытет зэрауплъэкIурэр нахь гъэлъэшыгъэнымкIэ ГупчакIэр щыIэ зэрэ­хъугъэм мэхьанэшхо иI. Об­ществэр щынэгъончъэнымкIэ, тицIыфхэм рэхьатныгъэ яIэнымкIэ ащ иIофшIэн бэ елъытыгъэр. Гупчэм щылажьэхэрэм яIэпэIэ­сэныгъи, ягуетыныгъи мэхьанэшхо яI», — къыIуагъ КъумпIыл Мурат.
IэкIыб къэралхэм къарыкIыгъэхэу республикэм къихьагъэхэм хэгъэгум щыIэкIэ-псэукIэу илъыр, ащ инэшанэхэр ыкIи ихэбзэгъэуцугъэхэр къагурыIонхэм мэхьанэу иIэр шъхьафэу къыхигъэщыгъ. Хэгъэгум ишъолъырхэм зыпкъитыныгъэ хэлъэу хэхъоныгъэ ашIынымкIэ уплъэкIун Iофтхьабзэхэр тэрэзэу зэхэщэгъэнхэм бэ елъытыгъэр. НэмыкI къэралыгъохэм къарыкIыжьыгъэ тихэгъэгогъухэм, пIэлъэ гъэнэфагъэкIэ шъхьэегъэзыпIэ лъыхъухэ­рэм япхыгъэ Iофхэм тэрэзэу адэлэжьэгъэн зэрэфаери ащ къыIуагъ.
АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м хэгъэгу кIоцI IофхэмкIэ иминистрэу Олег Безсмельницыныр, унитарнэ предприятиеу «Паспорт-визэ къулыкъур» зыфиIорэм ибухгалтер шъхьаIэу Дмитрий Туровыр Iофтхьабзэм хэлэ­жьагъэх ыкIи къыщыгущыIагъэх. Къулыкъум иамалыкIэхэм осэшIу ахэм къафашIыгъ, рес­публикэм ихэхъоныгъэ иIахь гъэнэфагъэ ащ зэрэхишIыхьащтри къыхагъэщыгъ.
Кощын IофхэмкIэ гупчакIэу къызэIуа­хыгъэр Iофыгъоу зэшIуахыщтхэм ялъытыгъэу отдел гъэнэфагъэхэмкIэ зэрэзэтеутыгъэщтми зыщагъэгъозагъ. Къызэ­рэхагъэщыгъэмкIэ, 2024-рэ илъэсым паспорт-визэ къулыкъум икъутамэ ыпкIэ хэлъэу фэIо-фэшIэ мин 12-м ехъу зэшIуихыгъ. Ащ щыщэу мини 3,4-м на­хьыбэр зэпхыгъагъэр патентхэр гъэпсыгъэнхэр ыкIи икIэрыкIэу гъэпсыжьыгъэн­хэр ары. Мы илъэсым IэкIыб къэралхэм къарыкIыгъэхэу къулыкъум къеолIагъэхэм япчъагъэ хэпшIыкIэу нахьыбэ хъугъэ.
УнакIэм Гупчэм иIофышIи 7-мэ, кощын IофхэмкIэ ГъэIорышIапIэм иIофышIэ 23-мэ япшъэрылъхэр щагъэцэкIэщтых.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.