Социальнэ IофышIэм и МафэкIэ сыгу къыздеIэу сышъуфэгушIо!
ШъуиIофшIэн дэгъоу зэрэжъугъэцакIэрэмкIэ лъы­тэныгъэшхо къэжъулэжьыгъ. ШъуиIэпыIэгъу фэны­къохэм мафэ къэси шъуишIуагъэ яшъогъэкIы. Заомрэ IофшIэнымрэ яветеранхэм, шъхьэзэкъо пенсионерхэм, сэкъатыныгъэ, гъот макIэ зиIэхэм, ны-тыхэр зышъхьа­рымытыжь кIэлэцIыкIухэм, сабый ибэхэм, кIэлэцIыкIубэ зэрыс унагъохэм, хэушъхьафыкIыгъэ дзэ операцием хэлажьэхэрэм, ахэм яунагъохэм арысхэм ренэу гъунэ алъышъофы. ЩэIагъэ къызэрэзыхэжъугъафэрэр, шъуишIулъэгъу, шъуигукIэгъу ахэм зэрапэжъугъохырэр тинэрылъэгъу.
Социальнэ къулыкъухэм цIыф куп гъэнэфагъэхэм IэпыIэгъу зэфэшъхьафхэр зэрарагъэгъотырэм дакIоу пшъэдэкIыжьышхо зэрахьырэри икъоу къагурэIо. ШъуиIоф шъузэрегугъурэм, IэпэIэсэныгъэшхорэ гукIэгъурэ зэрэшъухэлъым яшIуагъэкIэ цIыфхэм яфэныкъуагъэхэр гъэцэкIагъэ мэхъух.
Шъугу етыгъэу шъузышъхьамысыжьэу шъузэрэлажьэрэм, шъуиIоф хэшIыкIышхо зэрэфышъуиIэм, гукIэгъушхо зэрэшъухэлъым афэшI лъэшэу сызэрэшъуфэразэр къэсэIо. Псауныгъэ пытэ, щыIэкIэшIу шъуиIэнэу, огу къаргъор ренэу шъуашъхьагъ итэу, гъэхъэгъакIэхэр шъушIынэу сышъуфэлъаIо!
Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч