«Шъуипчэдыжь шIу, синанэ цIыкIухэр! Мары шъу­шхыщтхэр, шъуиуцхэр къышъуфэсхьыгъэх. Сыдэущтэу нэф шъукъикIыгъа?» — джа гущыIэхэр емызэщыжьэу пчэдыжь къэс илъэс 24-рэ хъугъэу Иманкъулэ Соне зылъыплъэрэ нэжъ-Iужъхэм ареIо.

Ар цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Шэуджэн районым щыIэм иа 1-рэ отделениеу къутырэу Кировыр зыхахьэрэм исоциальнэ IофышI. МэфэкIым ипэгъокIэу ащ «Адыгэ макъэр» IукIагъ.
Социальнэ IофшIэным нэмыкI цIыфыгъэмрэ гукIэгъумрэ нахь мэхьанэ зыщиIэ лъэныкъо щыIэпщтын. ЗищыкIагъэхэм IэпыIэгъу ягъэгъотыгъэным имызакъоу, цIыфым фыщытыкIэу фыуиIэн фаем мы сэнэхьатыр ищысэу щыт. Мыщ бэхэм Iоф щашIэнэу къэкIох, ау ыгукIэ фэщагъэу къыханэрэр мэкIэ дэд. Иманкъулэ Соне илъэс пчъагъэхэм къакIоцI Iэпэ­Iэсэныгъэ ин мы сэнэхьатым фыриI, анахь шъхьаIэхэу гукIэгъур, шIур, шIулъэ­гъур зылъыплъэхэрэм афыриI.
— Нэнэжъи 7-мэ сынаIэ атет. Ахэм зэкIэми гулъытэ чан яI, Iэдэб ахэлъ, гущыIэ дахэхэр къыспагъохых. Зыщыфаехэм ахэм сагъотын алъэкIы. ЯщыкIагъэр зэкIэ афэсшIагъэу, къысфэразэхэ хъумэ сэри сырэхьат. СиIофшIэни, сыз­хэт куп зэгурыIожьи лъэшэу сыгу рехьых, — къыIуагъ Соне.
Нэжъ-Iужъхэм яфэIо-фашIэр афигъэцэкIэнхэм пае социальнэ IофышIэм непэ километрэ пчъагъэ екIу. IэпыIэгъум хэхьэх нэжъ-Iужъхэм ящыкIэгъэ гъомылапхъэхэр игъом ягъэгъотыгъэнхэр, унэм, щагум якъэбзагъэ лъыплъэгъэныр, коммунальнэ фэIо-фашIэхэм ауасэ атынымкIэ адеIэгъэныр, Iэзэгъу уцхэр къа­фэщэфыгъэнхэр, нэмыкIхэри. Иманкъулэ Соне ипшъэрылъ хэмыхьэрэ Iофхэри ищыкIагъэ хъумэ афегъэцакIэх. Джащ пае зылъыплъэхэрэм къызэрэуатын щыIэп.
— «ГущыIэ дахэм уегъэхъужьы» аIо цIыфхэм. Тэщ фэдэу шъхьэзакъоу псэу­хэрэм а гущыIэхэр ящыкIагъэх. ТищыIэныгъэ къызэрыкIоп, ау синасып къы­хьыгъ Соне къызэрэстефагъэм. Спхъу ычIыпIэу ар сиI, сыда пIомэ, сипшъашъэ чыжьэу щэпсэу, бэрэ къэкIонэу хъурэп (мэгъы). Сишъхьэгъуси сымэджэ хьылъэ зэхъум, Сонечкэ (джары зэреджэхэрэр нанэхэр) чэщи, мафи садэжь къакIощтыгъ. Ащ зи епIожьын ищыкIагъэп, ышIэщтыр зэкIэ къыгурэIо, — хигъэунэфыкIыгъ Дина Аманулинам.
ТигущыIэгъу дахэу игугъу къытфэзышIыгъэхэм ащыщ Нюра Ильясовар:
— Лъэшэу ти Сонечкэ сыфэраз. ЗэкIэ тызыфаер къытфегъэцакIэ. Iэзэгъу уц тищыкIагъэмэ, «хъун, неущ сыкъакIо зыхъукIэ къышъуфэсхьыщт» ымыIоу, тикъутыррэ Краснодар краим истаницэу Темиргоевскаямрэ зэзыпхырэ кIэшIэгъэ лъэмыдж щынагъом екIышъ, лъэтемытэу къытфехьых. Адрэ нэбгырэ пчъагъэу зылъыплъэхэрэми джа дэдэр къыуаIощт.
Нэжъ-Iужъхэм шэн зэфэшъхьафэу яIэм емылъытыгъэу, хэти екIолIэкIэ гъэнэфагъэ къыфегъоты.
— Къыспэблэгъэ дэдэ хъугъэ, гум къыдэхьэ, зэрифэшъуашэу ынаIэ къыттет. Анахь хьэкIэ лъапIэм фэдэу тежэ, мафэм зэ къытэмыуалIэу къыхэкIырэп, — хигъэунэфыкIыгъ зылъыплъэхэрэ нэжъ­Iужъхэм ащыщэу Рабигат Садыковам.
Нэжъ-Iужъхэу зизакъоу псэухэрэм пкъэоу, дунаим IэубытыпIэу щыряIэ хъурэр социальнэ IофышIэр ары. А сэнэхьатыр къыхэзыхырэм цIыфым илыуз зэхишIыкIын фае. Джа еплъыкIэр зыдиIыгъэу илъэс пчъагъэхэм щытхъу хэлъэу Иманкъулэ Соне иIоф егъэцакIэ.
— Сызлъыплъэрэ синанэхэмрэ сэрырэ фэбагъэ зыхэлъ зэфыщытыкIэхэр зэ­фытиIэ хъугъэ, цыхьэ къысфашIы. Агу къикIэу «джы укъэкIофэ сыкъыожэщт» къызысаIокIэ, ащ кIуачIэ къысхелъхьэ, сыгу къыдещаешъ, зэпымыоу ядэжь сыкIо зэпытынэу сэхъу. Мыр сэнэхьат закъоп, гум изытетэу щыт, — къыхигъэщыгъ тигущыIэгъу.
Социальнэ IофышIэу ущытыныр псын­кIэп, ащ пкIуачIэ хэолъхьэ. Уимыгупсэ цIыфым илыуз зэхэпшIэныр анахь ­шъхьаI, арышъ, мы сэнэхьатым фэгъэзагъэхэм ар гукIи псэкIи къыхахы. Ащ дакIоу, цIыфыныгъэшхор зищыкIэгъэ лъэныкъу. А зэпстэури щытхъу хэлъэу Иманкъулэ Соне зэригъэцакIэрэм ишы­хьат цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Шэуджэн районым щыIэм ипащэу ГутIэ Зарэ къызэрэтегущыIагъэр.
— Илъэс пчъагъэу Iоф зишIэрэм Иманкъулэ Соне IэпэIэсэныгъэу хэлъыр къызэригъэлъэгъуагъэм дакIоу, IофшIэными къыщигъэшъыпкъэжьын ылъэкIыгъ. Ащ ылъэныкъокIэ зы дао нэжъ-Iужъхэм къатыгъэп, ащ лъытэныгъэ, цыхьэ къызэрэфашIырэр, шIу зэралъэгъурэр, къы­зэрэфэразэхэр сыдигъокIи къыхагъэщы. IофшIэным имызакъоу, Соне мэфэкIхэм япхыгъэ Iофтхьабзэхэу зэхатщэхэрэм, зэнэкъокъухэм чанэу ахэ­лажьэ, текIоны­гъэхэр къащыдехых. Зыхэт купми дэ­гъоу гурэIо, — къыхигъэщыгъ ГутIэ Зарэ.
Хымэ лыузыр зэхэзышIэхэу, гукIэ­гъумрэ шIумрэ изехьакIохэм ямэфэкI ипэгъокIэу гущыIэгъу тызыфэхъугъэ Иманкъулэ Соне иIофшIэнкIэ гъэхъа­гъэу ышIыгъэхэм афэшI УФ-м ыкIи АР-м IофшIэнымкIэ ыкIи социальнэ хэхъо­ныгъэмкIэ яминистерствэхэм ящытхъу тхылъхэр къыфагъэшъошагъэх, социальнэ фэIо-фашIэхэм ягъэцэкIэн ылъэныкъокIэ зэхащэрэ анахь IэпэIасэхэм я Урысые зэнэкъокъу ишъолъыр едзыгъо апэрэ чIыпIэр 2021-рэ илъэсым къыщыдихыгъ.
Iэшъынэ Сусан.