Социальнэ IофышIэм и Мафэ фэгъэхьыгъэ Iофтхьабзэ республикэм и Къэралыгъо филармоние тыгъуасэ ­щыкIуагъ. А лъэныкъом фэгъэзагъэу Iоф зышIэ­хэ­рэм афэгушIуагъ ­Адыгеим и ЛIышъхьэу КъумпIыл Мурат.

Джащ фэдэу мэфэкI зэхахьэм хэлэжьагъэх федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м IофшIэнымкIэ ыкIи социальнэ хэхъо­ныгъэмкIэ иминистрэу Мырзэ Джанбэч, депутатхэр, муниципальнэ образованиехэм япащэхэр, социальнэ лъэныкъом иIофышIэхэр ыкIи иветеранхэр.
Пэублэм социальнэ Iофы­шIэхэм, ахэр зылъыплъэхэрэ нэжъ-Iужъхэм ашIыгъэ Iэпэщысэхэм якъэгъэлъэ­гъонэу филармонием ифойе къыщызэIуахыгъэр Адыгеим и ЛIышъхьэ къыплъыхьагъ, ащ осэшIу къыфишIыгъ.
Адыгеим и ЛIышъхьэ къызэгущыIэм, социальнэ IофышIэхэм ыкIи ны къулыкъум иветеранхэм IофшIэнышхоу агъэцакIэрэмкIэ зэрафэразэр къыхигъэщыгъ.
— Мы IофшIэным пшъэдэкIыжьышхо зэрэпылъым имызакъоу гуфэбэныгъэ, гукIэгъу, щэIагъэ ищыкIагъ. Урысыем и Президентэу Владимир Путиным зэрэхигъэунэфыкIырэмкIэ, Iофэу шъузфэ­гъэзагъэм шъузэрэфэшъыпкъэм, гуетыныгъэ фышъуиIэу зэрэжъугъэцакIэрэм афэшI цIыфыбэхэм ящыIэныгъэ изытет нахьышIу мэхъу. Джащ фэдэу шъуиIоф­шIэн ишIуагъэкIэ цIыфхэр социальнэу ухъумэгъэнхэм фэIорышIэрэ къэралыгъо программэхэр ыкIи лъэпкъ проектхэр пхыращых, — къыIуагъ Адыгеим и ЛIышъхьэ.

КъумпIыл Мурат къызэрэхигъэщы­гъэмкIэ, къэралыгъом ипащэ ишIуагъэкIэ республикэм социальнэ IэпыIэгъум нахь зыщиушъомбгъунымкIэ илъэс къэс ахъщэу къыфыхагъэкIырэм, социальнэ фэIо-­фашIэу афагъэцакIэхэрэм ахэхъо. СыдигъокIи анаIэ зытырагъэтыхэрэм ащыщых зыныбжь хэкIотагъэхэр, кIэлэцIыкIу ибэхэр, сэкъатныгъэ зиIэхэр, са­быибэ зиIэ ны-тыхэр, щыIэныгъэм чIыпIэ къин ригъэуцуагъэхэр. Мэхьанэшхо зиIэ лъэныкъоу — хэушъхьафыкIыгъэ дзэ операцием хэлажьэхэрэм ыкIи иветеранхэм, хэкIодагъэхэм яунагъохэм IэпыIэгъу ятыгъэныр джыри тапэкIэ зэрэлъагъэкIотэщтыр АР-м и ЛIышъхьэ ипсалъэ щыхигъэунэфыкIыгъ.
— ЦIыфхэм IэпыIэгъу ятыгъэнымкIэ республикэм щызэрахьэрэ Iофтхьабзэхэм ягъэцэкIэн анахьэу фэгъэзагъэхэр социальнэ IофышIэхэр ары. Нэбгырэ пэпчъ тыфэраз, уасэ фэтэшIы. Ащ дакIоу, социальнэ IофышIэхэм ыкIи пе­дагог-психологхэм IэпыIэгъу тафэхъуным, ахъщэ тынхэмкIэ къыхэдгъэщынхэм иамал зетэгъэушъомбгъу. Ахэм ащыщыбэхэр сэнэхьат IэпэIэсэныгъэм фэгъэ­хьыгъэ зэнэкъокъухэм ахэлажьэх, зэ­фэ­хьысыжь дэгъухэр къагъэлъагъох. ЦIыфхэр социальнэу ухъумэгъэнхэм иIоф зэрэзэхэщагъэр нахьышIу шIыгъэнымкIэ Iофтхьабзэхэр лъыдгъэкIотэщтых, со­циальнэ фэIо-фашIэхэм зэрахэдгъэхъощтым тыпылъыщт, — къыхигъэщыгъ КъумпIыл Мурат.
Социальнэ къулыкъум иIофышIэ анахь дэгъухэм тын лъапIэхэр ыкIи рэзэныгъэ тхылъхэр КъумпIыл Мурат аритыжьы­гъэх. ЩытхъуцIэу «Адыгэ Республикэм цIыфхэр социальнэу къэухъумэгъэнхэмкIэ изаслу­женнэ IофышI» зыфиIорэр афагъэшъошагъ: цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Кощхьэблэ районым щыIэм иотделение ипащэу Нели Болговам, Шэуджэн районым щыIэ гупчэм ипсихологэу Тыгъо Гутьерэ, «Унэгъо МФЦ-м» иотделениеу Тэхъутэмыкъое гупчэм хэтым иIофышIэу ХъокIо Сусанэ.
Адыгэ Республикэм и ЛIышъхьэ ирэзэныгъэ тхылъхэр аратыжьыгъэх: Мые­къопэ КЦСОН-м иIофышIэу Светлана Мартыненкэм, Красногвардескэ социальнэ гупчэм иIофышIэу Нэжьэ Светланэ, АР-м IофшIэнымкIэ ыкIи социальнэ хэхъоныгъэмкIэ иучреждениехэм я Гупчэ бухгалтерие ибухгалтерэу Ольга Резник, социальнэ гупчэу Теуцожь районым щыIэм ипащэу игуадзэу УдыкIэко Ларисэ.
Къэралыгъо Совет — Хасэм и Тхьаматэ игуадзэу Цэй Эдуард социальнэ IофышIэхэм къафэгушIуагъ ыкIи пар­ламентым ищытхъу тхылъхэр къэзылэжьы­гъэхэм аритыжьыгъ.
АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джан­бэч къэзэрэугъоигъэхэм шIуфэс къарихыгъ. IофшIэн къинэу социальнэ IофышIэхэм агъэцакIэрэм осэшIу къыфишIызэ, ащ ямэфэкIкIэ къафэгушIуагъ. Социальнэ IэпыIэгъум ылъэныкъокIэ республикэм щагъэцэкIэрэ фэIо-фа­шIэ­хэм ар къатегущыIагъ. Адыгеим щы­псэурэ ящэнэрэ нэбгырэ пэпчъ социальнэ IэпыIэгъу зэрэратырэр ащ къыхигъэщыгъ. Нэужым сэнэхьат IэпэIэ­сэныгъэмкIэ республикэ зэнэкъокъум текIоныгъэ къыщыдэзыхыгъэхэм ар афэ­гушIуагъ.
Республикэм итворческэ купхэм къа­гъэхьазырыгъэ мэфэкI концертымкIэ зэIукIэр аухыгъ.
АР-м и ЛIышъхьэ ипресс-къулыкъу къытырэ къэбархэмкIэ Iэшъынэ Сусан.