АР-м мэкъумэщ хъызмэтымкIэ и Министерст­вэ тызэрэщигъэгъоза­гъэмкIэ, гъэтхэсэ гектар 104721-у мыгъэ респуб­ликэм щагъэнэфагъэм ипроцент 93-р, ар 97648-рэ мэхъу, чIыгу­лэжьхэм халъхьэгъах.

Муниципальнэ образованиехэм пхъэныр зыщаухыгъэхэр ахэтых. Кощхьэблэ районыр ахэм зэу ащыщ. Ащ ичIыгулэжьхэм гъэтхэсэ гектар 16698-у агъэнэфэгъагъэм къырагъэхъуи гектар 16717-рэ халъхьагъ. Ащ щыщэу гектар 9000-р — тыгъэ­гъаз, гектар 6600-р — лэжьыгъэ ашIыщт натрыф, гектар 668-р — сое, зэнтхъым — гектари 160-рэ, хьарыхъу джэнчым — гектар 80 арагъэубытыгъ.
Джащ фэдэу илъэс къэс халъ­хьэрэ уцхэу гектари 3, былымIус ашIынэу натрыф гектар 45-рэ яI, хэтэрыкIхэм апае гектар 14, картофым гектари 8 агъэхьазырыгъагъэти, ахэм къарагъэ­хъуи зым гектар 16, адрэм гектар 12 арагъэубытыгъ.
Гъэтхасэхэм яхэлъхьан щау­хыгъ Теуцожь райоными. Ащ ичIыгулэжьхэм агъэнэфэгъэгъэ гектар 12232-м нахьыбэ, ар 12539-рэ, апхъыгъ. Ащ щыщэу гектар 8765-р — тыгъэгъаз, гектар — 3009-р — сое, лэжьыгъэ ашIыщт натрыфым гектар 240-рэ рагъэубытыгъ, хьарыхъу джэнч гектар 217-рэ яI, илъэс пчъагъэхэм къыхэкIыжьырэ уц­хэу гектар 36-рэ, былымIус ашIы­нэу натрыф гектари 153-рэ, илъэс къэс халъхьэрэ уцхэу гектар 24-рэ халъхьагъ, хэтэрыкI гектар 13 агъэтIысхьагъ.
Шэуджэн районым ичIыгулэжьхэм пстэумкIи гектар 14557-рэ агъэнэфэгъагъ. Ахэми пхъэныр аухыгъ. Халъхьагъэм инахьыбэр, ар гектар 11820-р ары, тыгъэгъаз, гектар 2100-р лэжьыгъэ ашIыщт натрыфым, гектар 580-р пынджым ара­гъэубытыгъ, илъэс пчъагъэхэм къыхэкIыжьырэ уцхэу гектар 40-м ехъу апхъыгъ, хэтэрыкI гектари 4, картоф гектари 7, къэбжъые, хъырбыдз ыкIи нэшэ гектари 6 агъэтIысхьагъ.
Анахьыбэу гъэтхэсэ лэжьыгъэ мыгъэ хэзылъхьащтыр Джэджэ районым ичIыгулэжьхэр ары. ПстэумкIи гектар 25475-рэ агъэ­нэфагъ. Ахэми гъунэм рафы­лIагъ, къафэнагъэр гектар мин заул ныIэп. Тыгъэгъазэм пае агъэнэфэгъэгъэ гектар 12039-м къырагъэхъуи, гектар 13017-рэ халъхьагъ, сое гектар 5003-м 2979-рэ хагъэкIыгъ, лэжьыгъэ ашIыщт натрыфэу гектар 3418-рэ, зэнтхъэу гектар 68-рэ апхъы­гъах, хьарыхъу джэнч гектар 1404-рэ халъхьагъ, Iэ­зэгъу уцхэр, «эфирнэкIэ» заджэ­хэрэ дагъэхэр зыхашIыкIырэ къэкIыхэрэу гектар 766-рэ агъэнэфэгъагъ, ар апхъыгъах.
Ощх зэпымыужьхэм мыгъэ гъэтхасэхэм япхъын агъэгу­жъуагъ. Ау чIыгулэжьхэм агъэ­нэфагъэм къыщагъэкIагъэп. Мэфэ благъэхэр фэбэнхэу синоптикхэм къатышъ, зэхъокIыныгъэхэр фэмыхъухэмэ, тхьамафэм ыкIэм нэс аухынэу мэгугъэх.
ХЪУТ Нэфсэт.