Мэкъэтынхэр ыкIэм фэкIох
«ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу зэхащэгъэ мэкъэтынхэр зэфашIыжьынхэмкIэ къэнагъэр макIэ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мэкъуогъум и 2-м ехъулIэу зымакъэ зытыгъэхэм япчъагъэ зэхъокIыныгъэшхо фэхъугъагъэп. Адыгеир зэрэщытэу пштэмэ, зэпстэумкIи нэбгырэ 36939-рэ хэлэжьагъэу къалъытагъ.
Мыекъуапэ дэсэу нэбгырэ 25762-рэ мэкъэтынхэм ахэлэжьэгъах. Чылысэу Успение Пресвятой богородицы къыпэIулъыр апэ ит, нэбгырэ 14281-мэ ащ амакъэхэр фатыгъэх. Хэгъэгу зэошхом хэкIодагъэхэм ясаугъэт ыуж къекIы, мэкъэ 6973-рэ иI, урамэу Шоссейнэм тет скверыр къыхэзыхы-
гъэр нэбгырэ 4508-рэ.
Къэлэ гъэпсыкIэ зиIэ Инэм псэупIэ коимкIэ къуаджэу БжыхьэкъоякIэм культурэм и Унэу дэтым дэжь щыт кIэлэцIыкIу джэгупIэм пэрытныгъэр ыIыгъ. Нэбгырэ 4236-мэ ащ амакъэхэр фатыгъэх. Къутырэу Суповскэм икIэлэцIыкIу джэгупIэ мэкъэ 434-рэ къыугъоигъ. ПсэупIэ коимкIэ мэкъэтынхэм ахэлэжьагъэр нэбгырэ 4670-рэ.
Поселкэу Яблоновскэм щыщэу зымакъэ зытыгъэр зэкIэмкIи нэбгырэ 5997-рэ. Ащ иурамэу Космическэм тет унэу N 37-м дэжь щыIэ кIэлэцIыкIу-спорт площадкэр апэ ит, мэкъэ 2714-рэ фатыгъ. Ащ ыуж къэкIо, мэкъэ 1707-рэ къыугъоигъ, общественнэ чIыпIэу Лениным ыцIэ зыхьырэм. Джащ фэдэу урамэу Космическэм тетэу джыри зы площадкэ, Краснодарскэм тетэу ащ фэдэ чIыпIэ мэкъэтынхэм ахагъэлажьэ. Зым нэбгырэ 1148-мэ, адрэм 938-мэ амакъэхэр афатыгъэх. Мы поселкэмкIэ зымакъэ зытыгъэр нэбгырэ 6507-рэ.
Шъугу къэдгъэкIыжьын, мэкъуогъум и 12-м мэкъэтынхэр зэфашIыжьыщтых. Къэнагъэр макIэ, ау хэмылэжьагъэхэр джыри игъо ифэщтых. ШIоигъоныгъэ зиIэм мары ссылкэу ыгъэфедэн ылъэкIыщтыр: zagorodsreda.gosuslugi.ru.