ЩагъэкIогъэ уахътэр агу къинэжьыщт

КъыткIэхъухьэрэ лIэужхэм языгъэпсэфыгъо уахътэ аублагъ. Ар гъэшIэгъонэу, шIуагъэ къытэу зэхэщэгъэным сыдигъокIи Адыгеим мэхьанэшхо щыраты. Республикэм ис кIэлэцIыкIухэм анэмыкIэу мы аужырэ илъэсхэм Херсон хэкум и Геническэ район къикIырэ кIэлэцIыкIухэм тишъолъыр зыщагъэпсэфы ыкIи япсауныгъэ щагъэпытэ.
Мыекъопэ районым ит псэупIэу Каменномостскэм дэт лагерэу «Лань» зыфиIорэм Херсон хэкум щыщ кIэлэцIыкIу 600 къэкIонэу агъэнафэ, ахэр щэ гощыгъэщтых. Апэрэ чэзыур бэмышIэу аублагъ, нэбгыри 179-мэ яуахътэ джырэкIэ гъэшIэгъонэу ыкIи шIуагъэ къытэу агъакIо.
МэфэкI шIыкIэм тетэу лагерым исменэ къызэIуахыгъ. Ащ хэлэжьагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, Мыекъопэ районым иадминистрацие ипащэу Михаил Марьиныр, лагерым ипащэу Вероника Кручининар.
КIэлэцIыкIухэм дэгъоу загъэпсэфынымкIэ, апкъышъол агъэпытэнымкIэ, чэфэу яуахътэ агъэкIонымкIэ амалышIухэр зэрэщыIэхэр Евгений Лебедевым къыIуагъ. Тиреспубликэ щагъэкIогъэ уахътэр агу къызэринэжьыщтыр, тишъолъыр икультурэ фэгъэхьыгъэу зэрагъэшIэнэу апэ бэ зэрилъыр къыхигъэщыгъ.

Нэужым сабыйхэм къэгъэлъэгъон гъэшIэгъонхэр къафашIыгъэх, агъэчэфыгъэх, ежьхэри къэшъуагъэх, орэдхэр къаIуагъэх, джащ фэдэу зэнэкъокъу зэфэшъхьафхэр афызэхащагъэх.
Лагерым ипащэу Роберт Мардыросьян яIофшIэн зэрэзэхащэрэр, пшъэрылъэу яIэхэр нэужым къытфиIотагъэх.
— Щынэгъончъэу ыкIи культурэ программэхэмкIэ гъэшIэгъонэу кIэлэцIыкIухэм языгъэпсэфыгъо уахътэ зэрэзэхэтщэщтым тынаIэ тет. Плъыр-стырым къыхэкIыгъэ кIэлэцIыкIухэу, зынэгу гумэкIыгъуабэ кIэкIыгъэхэм языгъэпсэфыгъо лъэхъан гухахъо хагъотэнэу, шIукIэ тиреспубликэ агу къинэжьынэу тыфай, — еIо ащ.
Художественнэ, техническэ ыкIи социальнэ творчествэм алъэныкъокIэ зыныбжь имыкъугъэхэм мафэ къэс Iоф адашIэ.
АР-м ошIэ-дэмышIэ IофхэмкIэ и Министерствэ, АР-м хэгъэгу кIоцI IофхэмкIэ и Министерствэ ыкIи нэмыкI хэбзэ къулыкъу зэфэшъхьафхэм ялIыкIохэр ныбжьыкIэхэм гущыIэгъу афэхъух. Щынэгъончъэным ылъэныкъокIэ яшIэныгъэхэм ахагъахъо. Джащ фэдэу республикэм итворческэ купхэр лагерым къэкIох, ахэм концертхэр, мастер-классхэр къатых. КIэлэцIыкIухэр народнэ творчествэм, лъэпкъ хабзэхэм нэIуасэ афашIых.
— Гъэсэныгъэ тедзэ кIэлэцIыкIухэм ядгъэгъотыным фытегъэпсыхьэгъэ лицензие тиIэ хъугъэ. Ащ ишIуагъэкIэ спортым, актерскэ ыкIи театральнэ IэпэIэсэныгъэм япхыгъэу яшIэныгъэхэм ахэтэгъахъо. Мы мафэхэм дэгъоу, тэрэзэу узэрэгущыIэщтыр арагъэшIагъ, — еIо тигущыIэгъу.
Псауныгъэр псыхьэгъэным фэшI лъэс зекIоным фэгъэхьыгъэ Iофтхьабзэхэр мафэ къэс ныбжьыкIэхэм афызэхащэх. Мыекъопэ районым чIыпIэ дэхабэ иI, ахэр къарагъэплъыхьэх.
КIэлэцIыкIоу лагерым къэкIуагъэхэм аныбжь илъэси 7-м къыщегъэжьагъэу 17-м нэс, ахэр дружини 7-у зэтеутыгъэх, вожатэ тIурытIу ахэт. Ахэр студентых, нахьыбэмэ кIэлэегъэджэ сэнэхьатыр зэрагъэгъоты. ПэшIорыгъэшъэу зэкIэми егъэджэн курсхэр акIугъэх, къулайныгъэ зэряIэр нэрылъэгъу тфэхъугъ, сабыйхэм дэгъоу агурыIуагъэх.

Анахь цIыкIухэр зыIыгъ вожатэхэу Екатеринэрэ Таисиерэ гущыIэгъу тафэхъугъ, ахэр Адыгэ къэралыгъо университетым истудентых. Анахь цIыкIухэм ахэтынхэр нахь агу рихьэу къытаIуагъ, сыда пIомэ, ахэм алъэгъурэр зэкIэ ашIогъэшIэгъон, чэфых, губзыгъэх. Мафэ къэс пкъышъолыр зыгъэпытэщт джэгукIэхэр, зэнэкъокъухэр афызэхэтэщэх. Зэщыхэу, зыпарыми фэмыгъэзагъэхэу зы такъикъи къызэрэхэмыкIырэр къытаIуагъ.
Лагерьхэм ащыIэ кIэлэцIыкIухэм экскурсиехэр, зекIо зэфэшъхьафхэр, псауныгъэм, спортым, творчествэм атегъэпсыхьэгъэ Iофтхьабзэхэр зэрафызэхащэхэрэр ягуапэу къаIотагъ. Херсон хэкум къикIыгъэ кIэлэцIыкIухэм ащыщхэм гущыIэгъу тафэхъугъ. Языгъэпсэфыгъо уахътэ зэрэкIорэр ягуапэу къытфаIотагъ.
— Апэрэу Адыгеим сыкъэкIуагъ, лагерыр лъэшэу сыгу рихьыгъ, вожатэхэр шIу тлъэгъугъэх, ахэм мафэ къэс гъэшIэгъоныбэ къытфаугупшысы, IэшIоу тагъашхэ. Жьы къабзэм тыхэтэу джэгу-
кIэ зэфэшъхьафхэр зэрэтфызэхащэхэрэр лъэшэу сыгу рехьы. Пчыхьэрэ тызэхэсэу мафэм нахь тыгу рихьыгъэхэр къэтэIотэжьых. Сипшъэшъэгъухэр сигъусэхэу сыкъэкIуагъ, ау нэIосакIэхэри сшIыгъэх. Сянэ-сятэхэм сафэзэщынэу джыри игъо сифагъэп, телефонкIэ сазыдэгущыIэкIэ сыгу рэхьаты мэхъу, — еIо я 6-рэ классым ис Елизаветэ.
Адыгеим ичIыопс зэрэдахэр, ижь зэрэкъабзэр ыгъэшIагъозэ къытфиIотагъ я 11-рэ классым ихьэгъэ Елизаветэ. Ар ящэнэрэу мыгъэ къэкIуагъ. Экскурсиеу зыдакIохэрэр ары анахьэу ыгу рихьэу зигугъу къышIыгъэхэр, анахь чыжьэ гъогури шIохьылъэп, ылъэгъущтыр зэрэдахэр ешIэ. ЫныбжьыкIэ мы илъэсым аужырэу къэкIо, ау ищыIэныгъэ гъогу кIэлэегъэджэ сэнэхьатым рипхынэу, Мыекъуапэ щеджэн мурад зэриIэр къытиIуагъ, вожатэу мыщ къакIозэ ышIынэу фай.
ДЕЛЭКЪО Анет.