Top.Mail.Ru

ЕджапIэм игъэкIотыгъэ гъэцэкIэжьынхэр щэкIох

Image description
А. Гусев

Адыгеим и ЛIышъхьэу КъумпIыл Мурат Красногвардейскэ районым зыщэIэм селоу Еленовскэм дэт гурыт еджапIэу N 6-м игъэкIотыгъэ гъэцэкIэжьынхэр зэрэщыкIохэрэм зыщи­гъэгъозагъ.

Республикэм и ЛIышъхьэ игъусагъэх АР-м иминист­рэхэм я Кабинет и Тхьаматэ игуадзэу — АР-м финансхэмкIэ иминистрэу Виктор Орловыр, АР-м иминистрэхэм я Кабинет и Тхьаматэ игуа­дзэу Хъоткъо Хъызыр, АР-м гъэсэныгъэмрэ шIэныгъэм­рэкIэ иминистрэу Евгений Лебедевыр, Красногвардейскэ районым ипащэу Гъубжьэкъо Темур.
Нафэу зэрэщытымкIэ, ­лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм ифедеральнэ проектэу «Ана­хьышIоу щыIэр зэкIэ кIэлэцIыкIухэм апай» зыфиIорэм къыдыхэлъытагъэу гъэсэныгъэ зыщарагъэгъотырэ учреж­дениер агъэцэкIэжьы.
Дирекцием къызэритыгъэмкIэ, еджапIэр нэбгырэ 206-м телъытагъ, ау щеджэрэр 276-рэ мэхъу. Унэм квадрат метрэ мини 2 фэдиз еубыты. ИгъэкIотыгъэ гъэцэкIэжьынхэм апае сомэ миллион 95-м ехъу къыхагъэкIыгъ. А мылъкумкIэ унашъхьэр, шъхьаныгъупчъэ ыкIи пчъэ блыпкъхэр, инженер системэр зэкIэ зэблахъущт, еджапIэм ыгупэ, классхэр ыкIи нэмыкI унэхэр агъэкIэ­жьыщтых. ПшъэдэкIыжьэу ыхьырэмкIэ гъу­нэпкъэ гъэнэфагъэ зиIэ обществэу «Юг-Строй-Сервис» зыфиIорэм гъэцэкIэжьын IофшIэнхэмкIэ зэзэгъыныгъэ дашIыгъ. АР-м гъэсэныгъэмкIэ и Ми­нистерствэ ипащэхэм къызэраIуагъэмкIэ, шышъхьэIум и 15-м нэс еджапIэм рашIылIэрэ игъэкIотыгъэ гъэцэкIэжьынхэр аухынхэу ары. НепэкIэ IофшIэнхэм япроцент 67-р зэшIуахыгъах.

А. Гусев


«Районым ипащэхэмрэ мы Iофым фэгъэзэгъэ къулыкъухэмрэ гъусэныгъэ пытэ зэдыряIэу псэуалъэр ыкIэм нэгъэ­сыгъэным анаIэ тырагъэтын фае. Чэзыу пэпчъ IофшIэнхэу агъэцэкIагъэхэм язытет амыуплъэкIу хъущтэп. Мыщ кIэлэцIыкIухэр зэрэчIэсыщтхэр зыщышъумыгъэгъупшэнэу сышъолъэIу, щынэгъончъэ­ным, къэбзэныгъэм ишапхъэхэр ыкIи унэр гупсэфыпIэу зэрэхъущтым иIофыгъохэм шъунаIэ лъэшэу атежъугъэт»,къыIуагъ КъумпIыл Мурат.
Ахъщэу ыпэкIэ зигугъу къэтшIыгъэм нэмыкIэу джыри къыхагъэкIыгъэ миллио­ни 8,5-м ехъурэр зыпэIухьащтыр еджапIэм изэтегъэпсыхьан, мебелыр, тхылъеджапIэм пае Iэмэ-псымэхэр, химиемкIэ ыкIи физикэмкIэ кабинетхэм ачIэтын фэе пкъыгъохэм якъэщэфын. Ахэр къы­защэфхэкIэ кIаугъоещт ахъщэр интерактивнэ пкъыгъохэм ыкIи ноутбукхэм якъэщэфын пэIуагъэхьащт.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.