Мэкъуогъум и 1-р къызщихьащтым Брянскэ ыкIи Курскэ хэкухэм ­ялъэмыджхэр къызэра­гъэуагъэхэм ыпкъ къикIэу мэшIокухэр ягъогу­хэм къатекIыгъэх, къя­фэхыгъэх, цIыфхэр хэ­кIодагъэх. УФ-м и Следственнэ комитет хъугъэ-шIагъэхэр теракткIэ ылъытагъэх.

Брянскэ хэкум мэшIокоу къыщефэхыгъэм цIыфхэр зэрищэщтыгъэх. Тыгъоспчы­хьэ ехъулIэу губернаторэу Александр Богомаз къэралыгъо къэбарлъыгъэIэс амал­хэм къызэрариIуагъэмкIэ, зэкIэмкIи нэбгыри 104-мэ япсауныгъэкIэ зэрар ари­хыгъ, нэбгыри 7 хэкIодагъ. Мы хэкум мэкъуогъум и 2-р, и 3-р ыкIи и 4-р шъыгъо мафэхэу щагъэнэфагъэх.
Курскэ хэкум хьылъэзещэ мэшIокоу къыщефэхыгъэм нэбгырищымэ ящыIэныгъэ зыдихьыгъ — ар зезыфэщтыгъэмрэ иIэпыIэгъуитIурэ.
«Брянскэ ыкIи Курскэ хэкухэм къащыхъугъэм лъэшэу тегъэгумэкIы. Адыгеим щыпсэухэрэм ацIэкIэ губернаторхэм, хэкIодагъэхэм яIахьылхэм сафэтхьаусыхэ. Шъобж хэзыхыгъэхэр псын­кIэу зэтеуцожьынхэу сафэлъаIо», — къащитхыгъ исоциальнэ нэкIубгъохэм КъумпIыл Мурат.
Республикэм имуниципальнэ псэупIэхэм япащэхэри къин къызфыкъокIыгъэхэм афэтхьаусыхагъэх.