«Культурэм икъоджэ IофышI» зыфиIорэ программэм хэлажьэ зышIоигъохэм зыкъыза­гъэлъэгъон алъэкIыщт уахътэр мэлъылъфэгъум къыщегъэжьагъэу макIо.

Шъугу къэдгъэкIыжьын, программэр къэралыгъомкIэ кIэ, мы илъэсым къыщегъэжьагъэу Iоф ешIэ. Пшъэрылъ шъхьаIэу иIэр культурэм иIофышIэхэу къоджэ псэупIэхэм ащылажьэхэрэм яфэныкъуагъэ къэралыгъом ригъэкъу­жьыныр ары. КIэлэегъэджэ, медицинэ къоджэ IофышIэхэм апае илъэс пчъагъэ хъугъэу лэжьэрэ программэхэм ар атехыгъэу гъэпсыгъэ. Чылэ, къутыр е къалэу нэбгырэ мин 50-м нахь макIэ зыщыпсэухэрэр къыхеубытэх. Ащ хэлэжьэнэу тезыубытэрэм сомэ миллион зэтыгъоу фатIупщыщт, зэрэфаеу ыгъэзекIон фитыщт. АР-м культурэмкIэ иминистрэ игуадзэу Кушъу Светланэ къызэриIуагъэмкIэ, Адыгеим щы­ла­жьэхэмэ ашIоигъоу непэрэ мафэм ехъулIэу нэбгырихмэ зыкъагъэлъэ­гъуагъ. ПстэумкIи мыгъэкIэ программэм къыдыхэлъытагъэу республикэм ыштэнэу рахъухьагъэр нэбгырэ 21-рэ.
— ЗэкIэмкIи республикэм икультурэ нэбгырэ 3300-рэ фэдиз щэлажьэ. Программэм иIофшIэн ригъэжьэщтэу къызытаIом, тифэныкъуагъэ зыфэдэр тыуплъэкIугъ. Ащ къызэригъэлъэгъуагъэмкIэ, культурэм иIофышIэ нэбгырэ 200 фэдизмэ тишъолъыр ащэкIэ. Ау а пчъа­гъэр зы илъэсымкIэ пфэукIочIыщтэп, арышъ, дгощыгъэ. Мыгъэ 21-рэ, къэкIорэ илъэсым 17, ащ къыкIэлъыкIорэми зы пчъагъ, — тыщигъэгъозагъ Кушъу Светланэ.
КIэлэегъэджэ, медицинэ къоджэ Iофы­шIэхэм япрограммэ хэлажьэхэрэр чылэм щымыпсэухэу, кIон-къэкIожьынкIэ Iоф ашIэ хъущтмэ, культурэм икъоджэ IофышIэ чылэм илъэситфрэ дэсын фае. Мыщ фэдэ екIолIакIэм ишIуагъэкIэ къэ­ралыгъом IофыгъуитIу зэшIуехы: культурэм иIофышIэхэр чылэм къырещалIэх, ахэм ащыпсэурэ пчъагъэри нахьыбэ ешIы. Ащ бэхэр зэтриIажэхэу министерствэм къыщыхагъэщы, ары нахь мышIэми, мыгъэ агъэнэфэгъэ пчъагъэр рагъэ­къунэу яцыхьэ телъ. Программэм хэлажьэхэрэм Урысыем ишъолъырэу зыфаер къыхахын алъэкIы.
— Тиминистерствэ ихъытыу нэкIубгъо культурэм ылъэныкъокIэ сэнэхьатэу тызфэныкъохэмкIэ къэбарыр зэкIэ ит (режиссера, пщынауа, къашъохэр зыгъэ­уца). Урысыем ичIыпIэ зэфэшъхьафхэм ащыпсэухэу программэм хэлажьэ зышIоигъохэр къыхэхьанхи, тифэныкъуагъэхэм яплъынхи, яшIоигъоныгъэ къатхын алъэ­кIыщт. ГущыIэм пае, Красногвардейскэ районым къашъохэмкIэ IофышIэ ищыкIагъэмэ, е нэмыкI псэупIэр пщынао фэныкъомэ зыкъыщагъэнэфэшъущт. Тэ зэхэтщэгъэ комиссиер шIоигъоныгъэхэм ахэплъэнышъ, къытэкIумэ е къытэмыкIу­мэ ыгъэнэфэщт. Непэрэ мафэм ехъулIэу зыкъэзгъэнэфэгъэ нэбгырихымэ Адыгеим щыщхэри, нэмыкI шъолъырхэм ащы­псэухэри ахэтых, — еIо Кушъу Светланэ.
КультурэмкIэ къуаджэм иIофышIэ нэбгырэ 21-рэу мыгъэ агъэнэфагъэхэр заштэхэкIэ зыдэкIощтхэр: Адыгэкъалэ — 1, Джэджэ районыр — 2, Кощхьэблэ районыр — 3, Красногвардейскэ районыр — 2, Мыекъопэ районыр — 3, Тэхъутэмыкъое районыр — 7, Теуцожь районыр — 2, Шэуджэн районыр — 1.
Программэм хэлэжьэн шIоигъоныгъэ зиIэхэм бэдзэогъум и 15-м нэс зыкъагъэлъэгъонэу уахътэ яI. ПIалъэр зикIыкIэ зыкъэзгъэнэфагъэхэм АР-м культурэмкIэ и Министерствэ зэхищэгъэ комиссиер ахэплъэщт, ахэдэщт, къекIухэ­мэ, IофшIэнымкIэ зэзэгъыныгъэхэр адишIыщтых.
Анцокъо Ирин.