Урысыем и Мафэрэ кушъхьэфэчъэтесым и Дунэе мафэрэ афэгъэхьыгъэ Iофтхьабзэ мы мафэхэм Мые­къуапэ щырагъэкIокIыгъ.

Ащ кIэщакIо фэхъугъ АР-м физическэ культурэмкIэ ыкIи спортымкIэ и Комитет партиеу «Единэ Россием» и Адыгэ шъо­лъыр къутамэ иIэпыIэгъу.
Адыгэ Республикэм и ЛIышъхьэу КъумпIыл Мурат ыцIэкIэ къэзэрэугъоигъэхэм шIуфэс гущыIэхэмкIэ закъыфигъэзагъ АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловым.
— Адыгеим щыпсэухэу мы спорт мэфэкIым хэлажьэхэрэм япчъагъэ илъэс къэс нахьыбэ зэрэхъурэм тегъэгушIо. Республикэм ипащэ пшъэрылъ къытфигъэуцугъ спорт жъугъэм хэхъоныгъэхэр ышIынхэм фы­тегъэпсыхьэгъэ IофшIэныр нахь дгъэлъэшынэу. Ныбжь зэфэшъхьаф зиIэ цIыфхэм япсауныгъэ къаухъумэным ыкIи агъэпытэным тэркIэ мэхьанэшхо иI, — къыIуагъ Виктор Орловым журналистхэм гущыIэгъу зафэхъум.
Кушъхьэфачъэхэм атесхэм ягъогу зыщырагъэжьагъэр урамхэу Пионерскэмрэ Майкопскэмрэ зыщызэуалIэхэрэм дэжь. Шъхьадж зэрэфаеу гъогум икIыхьагъэ ыкIи къычъыщт едзыгъо пчъагъэр къыхихын ылъэкIыгъ.
Мы спорт лъэпкъыр зыгу рихьыхэрэм зэкIэмкIи километрэ 18 къачъыгъ, ащ те­лъытэгъэ гъогур урамхэу Пролетарскэмрэ Пионерскэмрэ апхырыкIыгъ. Iофтхьабзэм Адыгеим имызакъоу нэмыкI шъолъырхэм къарыкIыгъэ хьакIэхэри хэлэжьагъэх. Зызыушэтыгъэхэм ахэтыгъэх федеральнэ ыкIи шъолъыр къулыкъухэм ялIыкIохэр, джащ фэдэу муниципалитет зэфэшъхьафхэм къарыкIыгъэ купхэр. ЗэкIэмкIи нэбгырэ мини 3 фэдиз.
Нэужым зэфэхьысыжьхэр ашIыгъэх, лъэныкъо зэфэшъхьафхэмкIэ анахь дэгъухэр къыхагъэщыгъэх. Ахэм ащыщых илъэс 1,9-рэ зыныбжь Софья Елисеевар, зыныбжь илъэс 83-м нэсыгъэ Александр Цой. Джащ фэдэу Квантелиани зэшъхьэгъусэхэм яунагъо къы­хагъэщыгъ, мыщ ис нэбгыри 5 Iофтхьабзэм хэлэжьагъ.