СамбэмкIэ Президентым и Кубок икъыдэхын фэ­гъэхьыгъэ зэнэкъокъум кIочIэ къулыкъухэм ялIыкIохэр хэлэжьагъэх. Урысыем, Белоруссием, Армением, Узбекистан ыкIи Киргизием якомандэхэм заушэтыгъ.

— Мы илъэсым апэрэу тиныбджэгъу къэралыгъохэм ялIыкIохэр зэнэкъокъум къедгъэблэгъагъэх. СамбэмкIэ Европэм ифе­дерацие ипрезидентэу ыкIи дунэе федерацием ивице-президентэу сызэрэщытым къахэкIэу мы Кубокым икъыдэхын фэгъэ­хьыгъэ Iофтхьабзэм дунэе мэхьанэ иIэныр сэркIэ пшъэрылъ шъхьаI, — къыIуагъ Сергей Елисеевым.
Финалым щызэIукIагъэх Урысыем и УIэшыгъэ КIуачIэхэм ыкIи бзэджашIэхэм пшъэдэкIыжь ягъэхьыгъэнымкIэ федеральнэ къулыкъум якомандэхэр. ФСИН-м текIоныгъэр къыфихьыгъ Европэм ыкIи дунаим ячемпионэу Антон Коноваловым. УФ-м и УIэшыгъэ КIуачIэхэм якомандэ хэтыгъэх Гъомлэшк Анзоррэ Мэлгощ Адамрэ. Джащ фэдэу Адыгеим ибэнакIоу Наш Расул ящэнэрэ чIыпIэр къэзы­хьыгъэ «Динамо-24-р» къыгъэ­лъэгъуагъ.
— КIочIэ къулыкъубэхэмкIэ самбэр анахь мэхьанэшхо зиIэ спорт лъэпкъхэм ащыщ. Президентым и Кубок икъыдэхын фэгъэхьыгъэ турнирыр анахь шъхьа­Iэу мэфэпчъым хэт. Ар зэрифэшъуашэу зэрэзэхэщагъэр шъори шъолъэгъу, командэ пэпчъ текIоныгъэм фэбанэ, — къыIуагъ Антон Коноваловым.
БзэджашIэхэм пшъэдэкIыжь ягъэхьыгъэнымкIэ федеральнэ къулыкъум икомандэ ящэнэрэ илъэс хъугъэу Президентым и Кубок къыдехы.