Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм икъулыкъушIэ илъэс 13 зыныбжь пшъэшъэжъыер псым къыхихыжьыгъ.

Мыекъуапэ пэIудзыгъэ чъыгхэтэ товариществэм къыпэгъунэгъоу речъэкIырэ псыхъоу Шъхьэгуащэ зызщыбгъэпскIы мыхъущт ичIыпIэ пшъэшъэжъыер хэфагъ ыкIи хыорым рихьыжьагъ.
Пшъэшъэжъыер къин зэрэхэфагъэм фэгъэхьыгъэ къэбарыр зылъэгъугъэм полицием идежурнэ часть макъэ ригъэIугъ. Такъикъ заулэ тешIагъэу патруль-постовой къулыкъум иIофышIэхэу полицием истаршэ сержантэу Алексей Бушмалевымрэ полицием исержантэу Къохъужъ Ислъамрэ мы чIыпIэм къэсыгъэх.
А. Бушмалевыр бэрэ емыгупшысэу зыныбжь имыкъугъэм IэпыIэгъу ригъэкIынэу псым хэхьагъ. Псыорым рихьыжьэгъэгъэ пшъэшъэжъыер чэнджыпIэм къыщыуцугъ, ау ежь-ежьырэу нэпкъым къекIужьын ылъэкIыщтыгъэп. Джащ фэдэу пшъэшъэжъыер къалъэгъуи яIэпыIэгъу рагъэкIынэу мы чIыпIэм кIалэрэ пшъашъэ­рэ къыIухьагъэх.
КъулыкъушIэм ныбжьыкIитIур игъусэу псыорым хэтхэу пшъэшъэжъыер къызэпырахыжьи нэпкъым къагъэсыжьыгъ. Джащ фэдэу мы чIыпIэм псынкIэу къэсыгъэх АР-м ошIэ-дэмышIэ IофхэмкIэ и Министерствэ икъулыкъушIэхэр, IэпыIэгъу псынкIэр. Пшъэшъэ­жъыем ипсауныгъэкIэ щынагъо щыIэп.
ЛIыблэнагъэ къызэрэзхигъэфагъэм фэшI полицием истаршэ сержантэу Алексей Бушмалевым тын фэгъэ­шъошэгъэнэу АР-м хэгъэгу кIоцI IофхэмкIэ иминистрэу Олег Безсмельнициным унашъо ышIыгъ.

АР-м хэгъэгу кIоцI IофхэмкIэ и Министерствэ ипресс-къулыкъу.