Адыгеим ихьакIэщ унэхэр процент 40-кIэ нахьыбэ хъугъэ. БлэкIыгъэ илъэсым изэфэхьысыжьхэмкIэ, ахэм япчъагъэ 3503-рэ. Ащ ишIуагъэкIэ хэбзэIахьэу республикэм ибюджет кIорэм фэдитIу къыхэхъуагъ.

Мыщ фэдэ хэхъоныгъэхэм якъэкIуапIэ хъурэр лъэпкъ проектэу «ЗекIоныр ыкIи хьакIэпэгъокIыныр» зыфиIорэр ары. Модульнэ хьакIэщхэм ягъэпсын фэгъэхьыгъэ проектиймэ къэралыгъо IэпыIэгъу арагъэгъотыгъ.
— Нафэу, пшъэдэкIыжьэу ахьырэм зыщамы­дзыеу, шъыпкъагъэ хэлъэу Iоф зышIэхэрэр сыд фэдэрэ лъэныкъокIи хабзэм иIэпыIэгъу щыгугъынхэ алъэкIыщт. Мыщ фэдэ лэжьакIэр хэткIи федэ: сатыушIхэм ра­хъухьагъэр агъэцэкIэнымкIэ IэпыIэгъу агъоты, республикэ бюджетым къихьэрэ ахъщэр нахьыбэ мэхъу, зекIохэм Iэрыфэгъоу, непэрэ мафэм диштэу языгъэпсэфыгъо зэхащэн алъэкIы, — къыIуагъ АР-м и ЛIышъхьэу КъумпIыл Мурат.
Джащ фэдэу ЛIышъхьэм къызэрэхигъэщыгъэмкIэ, зекIоным ылъэныкъокIэ мылъку зыхалъхьэрэ проект заулэмэ ягъэцэкIэн республикэм щыдэлажьэх. Ахэм яшIуагъэкIэ зыгъэпсэфыпIэ чIыпIэхэм япчъагъэ нахьыбэ хъущт, фэIо-фашIэхэм ягъэцэкIэн нахьышIу зышIыщт зэнэкъокъуныгъэр сатыушIхэм азыфагу къырилъхьащт. Непэ зыдэлэжьэхэрэ «Лэгъонэкъэ» зыгъэпсэфыпIэм иIофшIэн зиублэкIэ, хэхъоныгъэхэм заушъомбгъущт. ДжырэкIэ илъэс реным Iоф зышIэщт экозыгъэпсэфыпIэм игъэпсынкIэ проектым иапэрэ Iахь дэлажьэх. IофшIэпIэ чIыпIэ 576-рэ хьакIэщ унэ 745-рэ ащ изэфэхьысы— жьыщт.