Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ Шумафэ ыкъом ыныбжь 95-рэ зэрэхъугъэм фэгъэхьыгъэ мэфэкI зэIукIэр концерт залэу «Налмэсым» щыкIуагъ.

ТхэкIо цIэрыIом фэгушIонхэу мыщ къэкIуагъэх Адыгеим и ЛIышъхьэу Къум­пIыл Мурат, Къэбэртэе-Бэлъкъарым и ЛIышъхьэу КIокIо Казбек, Къэрэщэе- Щэрджэсым и ЛIышъхьэу Рашид Темрезовыр, Абхъазым ивице-президентэу Беслан Бигвава, Абхъазым и Президентыгъэу Аслан Бжания, Краснодар краим иадминистрацие хэгъэгу кIоцI политикэмкIэ и Департамент ипащэу Александр Бородавка, Адыгэ Республикэм иапэрэ Президентэу Джарымэ Аслъан, Адыгэ Республикэм и Къэралыгъо советникэу ТхьакIущынэ Аслъан, естественнэ шIэныгъэхэмкIэ Урысые академием хэтэу Рамазан Абдулатиповыр, Урысыем ишъолъыр зэфэшъхьафхэмрэ IэкIыб къэралыгъохэмрэ къарыкIыгъэ лIыкIо купхэр, Урысые Федерацием исенаторхэр, Урысые Федерацием и Къэралыгъо Думэ идепутатхэр, Адыгэ Респуб­ликэм и Къэралыгъо Совет — Хасэм идепутатхэр, Адыгеим иминистрэхэм я Кабинет хэтхэр, федеральнэ, республикэ къулыкъухэм яIэшъхьэтетхэр, муниципальнэ образованиехэм япащэхэр, апшъэрэ, гурыт еджапIэхэм, интеллигенцием, хэбзэухъумэкIо къулыкъухэм, политическэ партиехэм, общественнэ, дин организациехэм, къэбар жъугъэм иамалхэм ялIыкIохэр.

Iофтхьабзэр къызэIуихызэ, АР-м и ЛIышъхьэу КъумпIыл Мурат къызэрэхигъэщыгъэмкIэ, тичIыпIэгъу цIэрыIо имэфэкI Темыр Кавказым имызакъоу, зэрэхэгъэгоуи якультурэ щыIэныгъэкIэ мэхьанэшхо зиIэ хъугъэ-шIагъэу щыт. Къэралыгъо IэнэтIэ лъагэхэр зыIыгъ пащэхэр ащ къыфэгушIуагъэх. Респуб­ликэм и ЛIышъхьэ Урысые Федерацием и Президентэу Владимир Путиным ишIуфэс телеграммэ къеджагъ.
«Лъытэныгъэ зыфэсшIырэ Исхьакъ Шумафэ ыкъор! Уныбжь илъэс 95-рэ зэрэхъугъэмкIэ сыгу къыздеIэу сыпфэгушIо! ЛитературэмкIэ зэчыишхо зэрэпхэлъым, бэ зэрэпфэукIочIырэм, уикIэсэ Iофым угу етыгъэу узэрэпылъым яшIуагъэкIэ творческэ гъэхъагъэхэр пшIын­хэ, тхэкIо, усэкIо, зэдзэкIэкIо цIэ­рыIо ухъун, цIыф лъэпкъыбэмэ якультурэрэ яшэн-хэбзэ шIагъохэмрэ язегъэ­ушъомбгъун уиIахьышIу хэпшIыхьан плъэкIыгъ. ЦIыф жъугъэхэм яфедэхэм якъэухъумэн, общественнэ Iофхэм чанэу узэрахэлажьэрэм, Урысыем итхакIохэм я Союз и Адыгэ шъолъыр къутамэ итхьэмэтэ IэнатIэ дэгъоу зэрэбгъэцакIэрэм афэшI лъытэныгъэшхо къыпфашIы. Псауныгъэ пытэ уиIэу, угушхоу бэрэ ущыIэ­нэу, шIоу щыIэр зэкIэ къыбдэхъунэу сыпфэлъаIо», — къыщеIо телеграммэм.

Мыщ дэжьым республикэм и ЛIышъхьэ Урысые Федерацием и Президент и Рэзэныгъэ тхылъ МэщбэшIэ Исхьакъ къыщыритыжьыгъ.
КъумпIыл Мурат Урысыем и Правительствэ и Тхьаматэу Михаил Мишустиным ишIуфэс телеграмми къеджагъ.
«Лъытэныгъэ зыфэсшIырэ Исхьакъ Шумафэ ыкъор. Уныбжь илъэс 95-рэ зэрэхъугъэмкIэ сыгу къыздеIэу сыпфэгушIо. ТхэкIо, усэкIо цIэрыIоу узэрэщытым елъытыгъэу пфэшъошэ шъыпкъэу джырэ классикэу, щыIэныгъэ гъогу гъэ­шIэгъон къэзыкIугъэ цIыфэу уалъытэ. Илъэсыбэ хъугъэу урысые литературэм, адыгабзэм икъэухъумэн уиIахьышхо ахэошIыхьэ», — къыщеIо телеграммэм.

Къэралыгъо апшъэрэ IэнатIэхэр зыIыгъ­хэм яшIуфэс псалъэхэм, мы мафэхэм гущыIэ фабэу тхэкIо цIэрыIом фаIохэрэм адыригъаштэзэ, республикэм и ЛIышъхьэ къызэрэхигъэщыгъэмкIэ, МэщбэшIэ Ис­хьакъ изэчыйрэ итворчествэрэ ары адыгэ литературэм иклассик зышIыгъэр.
Адыгеимрэ Урысыемрэ ягушъхьэлэжьыгъэ кIэн бай, тихэгъэгу щыпсэурэ лъэпкъхэм язэгурыIоныгъэ гъэпытэгъэным иIахьышхо зэрахишIыхьэрэм, рес­публикэм ищытхъу зэраригъаIорэм, хьа­­лэлэу узэрэлэжьэн, уи Хэгъэгу узэ­рэ­фэ­шъыпкъэн фаемкIэ щысэтехыпIэ зэрэхъурэм афэшI тхакIом зэрэфэразэр КъумпIыл Мурат къыIуагъ. Адыгэ Рес­публикэм и ЛIышъхьэ тхэкIо цIэрыIом псауныгъэ пытэ, щыIэкIэ-псэукIэ дэгъу иIэнэу, игъашIэ кIыхьэ хъунэу, Адыгеими, Урысыеми апае иIофшIэн гъэ­хъагъэхэр щишIынхэу фэлъэIуагъ.

УФ-м и Федеральнэ ЗэIукIэ ФедерациемкIэ и Совет и Тхьаматэу Валентина Матвиенкэм ыцIэкIэ зимэфэкI хэзыгъэунэфыкIырэм фэгушIуагъ Адыгеим ыцIэкIэ УФ-м исенаторэу Хъопсэрыкъо Мурат.
УФ-м и Къэралыгъо Думэ и Тхьаматэу Вячеслав Володиным ыцIэкIэ МэщбэшIэ Исхьакъ къыфэгушIуагъ Адыгеим ыцIэкIэ Къэралыгъо Думэм идепутатэу Владислав Резник.
УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым ыцIэкIэ шIуфэс телеграммэм къеджагъ федеральнэ инспектор шъхьаIэу Сергей Дрокиныр.

Абхъазым и Президентэу Бадра Гунба ыцIэкIэ Абхъазым ивице-президентэу Беслан Бигвава МэщбэшIэ Исхьакъ къыфэгушIуагъ. Абхъазым и Президент и Указэу МэщбэшIэ Исхьакъ щытхъуцIэу «Абхъаз Республикэм инароднэ тхакIу» зыфиIорэр фэгъэшъошэгъэным ехьылIагъэми ар къеджагъ.
Къэбэртэе-Бэлъкъар Республикэм и ЛIышъхьэу КIокIо Казбекрэ Къэрэщэе-Щэрджэс Республикэм и ЛIышъхьэу Рашид Темрезовымрэ шIуфэс псалъэкIэ тхэкIо цIэрыIом зыкъыфагъэзагъ.
Краснодар краим игубернаторэу Вениамин Кондратьевым ишIуфэс телеграммэ Краснодар краим иадминистрацие хэгъэгу кIоцI политикэмкIэ и Департамент ипащэу Александр Бородавка къеджагъ.
Джащ фэдэу МэщбэшIэ Исхьакъ гущыIэ фабэхэр къыфаIуагъэх Краснодар краимкIэ Успенскэ районым ипащэу Геннадий Бахилиным, естественнэ шIэныгъэхэмкIэ Урысые академием хэтэу Рамазан Абдулатиповым, УФ-м и Общественнэ палатэ агропромышленнэ комплексымрэ къуаджэхэмрэ хэхъоныгъэ ягъэшIыгъэнымкIэ икомиссие итхьаматэу Айгун Магомедовым, Дунэе Адыгэ Хасэм ипрезидентэу Сэхъурэкъо Хьаутий, край клиникэ сымэджэщэу N 1-у С. В. Очаповскэм ыцIэ зыхьырэм иврач шъхьаIэу Владимир Порхановым, АР-м и Къэралыгъо Совет – Хасэм и Тхьаматэу Владимир Нарожнэм.

Адыгабзэмрэ культурэмрэ якъэухъу­мэн МэщбэшIэ Исхьакъ иIахьышхо зэрэхишIыхьэрэр, общественнэ Iофхэм чанэу зэрахэлажьэрэр, илъэсыбэ хъугъэу Урысые Федерацием и Общественнэ палатэ Iоф зэрэщишIэрэр, лъэпкъ, дин зэфыщытыкIэхэм ягъэпытэн епхыгъэ Iофыгъохэм ар зэрафэгъэзагъэр къэгущыIагъэхэм къыхагъэщыгъ.
ТхэкIо цIэрыIор хэгъэгупсэ шъыпкъэу зэрэщытыр, Урысыем ис лъэпкъхэм языкIыныгъэ игъэпытэн мыпшъыжьэу зэрэдэлажьэрэр, Темыр Кавказым, Абхъазым арыс ткъош лъэпкъхэм адытиIэ зэпхыныгъэхэм ягъэпытэнкIэ, Адыгеимрэ Пшызэ шъолъыррэ язэныбджэгъушIу зэфыщытыкIэхэм язегъэушъомбгъункIэ ащ бэ зэришIагъэр мэфэкIым щыхагъэунэфыкIыгъ.

Урысые Федерацием IофшIэнымкIэ и ЛIыхъужъэу МэщбэшIэ Исхьакъ гущыIэ фабэхэр къыфэзыIуагъэхэм зэрафэразэр, ихэкурэ Урысыешхомрэ шIу зэрилъэгъу­хэрэр, ахэм зэрарыгушхорэр къыIуагъ, республикэм ипащэхэр адыгабзэм, литературэм, культурэм якъэухъумэнкIэ ренэу IэпыIэгъу зэрэхъухэрэр къыхигъэ­щыгъ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.