Хьагъундэкъо зэш цIыкIухэу Абдуррахьманрэ Имранрэ аныбжь имыкъугъэми, ялэгъухэм къахэщых, еджэнымкIи, спортымкIи гъэхъэгъэшIухэр ашIых. Адыгэ республикэ гимназием зычIэхьагъэхэм къыщегъэжьагъэу тфы нэмыкI къахьыгъэп.

БэмышIэу нахьыкIэу Имран шъхьэфит бэнэнымкIэ шъолъыр зэфэшъхьафхэр зыхэлэжьэгъэ зэIухыгъэ зэнэкъокъу Вол­гоград щыкIуагъэм хэлэжьагъ ыкIи апэрэ чIыпIэ къыщихьыгъ, ащ икубокрэ ибгырыпхырэ къыфагъэшъошагъэх. ЗэшитIур уадэгущыIэнкIэ гъэшIэгъоных, нэутхэх, анахь иным фэдэу къэгущыIэх, ягъэхъагъэхэм къакIэкIогъэ медальхэр, щытхъу тхылъхэр къагъэлъагъох.
Абдуррахьман ежьыр цIыф псынкIэу, шIэхэу епIорэр къыгурыIоу зэрэщытым ишIуагъэкIэ дэгъу дэдэу еджэ. ИцIыкIугъом къыщегъэжьагъэу еджэныр зэрикIэ­сэщтыр гъуащэщтыгъэп. ИлъэсиплIэ езыгъэджэгъэ Хьаджырэкъо Сафьят сэнаущыгъэу хэлъым хигъахъозэ Iоф дишIагъ. Ыныбжь елъытыгъэу олимпиадэхэм, зэIухыгъэ урокхэм ахэлэжьагъ ыкIи зэрифэшъуашэу закъыщигъэлъэ­гъуагъ. Урысые уплъэкIун IофшIэнэу предметищымкIэ атхыгъэм анахь балл инхэр къырихыгъэх. КIэлэегъаджэм къызэриIожьырэмкIэ, апэрэ мафэхэм гухэлъэу яIэхэр къызарегъаIом я 11-рэ классыр дышъэ медалькIэ къыухынэу зэрэфаер ары риIогъагъэр, ащ кIэлэцIыкIур фэкIо.
ПсэолъэшIынымкIэ инженер хъунэу зэрэфаер, унэшIыныр зэрэшIогъэшIэгъо­ныр, анахьэу хьисапыр ыгу зэрэрихьырэр Абдуррахьман къытиIуагъ. Илъэситфым къыщегъэжьагъэу футболымкIэ зэнэ­къокъухэм ахэлэжьагъ, сыд фэдэ пшъэ­рылъ къыфагъэуцугъэми егъэцакIэ. Джащ фэдэу шъхьэфит бэнэным илъэсищ хъугъэу пылъ, гъэхъэгъэшIухэр ешIых.

КIалэхэм зы такъикъ лые амыгъэ­кIодэу еджэх ыкIи спортымкIэ гъэхъагъэхэр ашIых. Егъэджэн сыхьатхэм ауж продленкэм къэнэх, ащ нахьыбэмкIэ унэмкIэ гъэцэкIэжьынхэр щашIыжьых, унэм жэрыIокIэ зэджэщтхэр ары къафанэрэр. Нэужым футболым кIощты­гъэх, ащ мэзэ заулэ хъугъэу уахътэр зэрафимыкъурэм пае къыхэкIыжьыгъэх, шъхьэфит бэнэнымкIэ зыгъэсэнхэм лъыпадзэжьыгъ. Янэ къызэриIуагъэмкIэ, пшъыгъэхэу, фэмыехэу зыкIи къаIуа­гъэп. Джы гъэмэфэ зыгъэпсэфыгъом еджапIэм къыщызэIуахыгъэ лагерым ахэр щыIэщтых, нэужым къуаджэу Мамхыгъэ янэжъ дэжь кIонхэу зэгоутых. Унэм къэкIожьхэмэ спрт зыгъэхьазырынхэм лъыпадзэжьыщт.
Имран я 3-рэ классыр мыгъэ къыухыгъ. ЕджэнымкIэ гъэхъагъэхэр ешIых, икIэлэегъаджэу Уджыхъу Симэ къыщэтхъу. Апэрэ классым къыщегъэжьагъэу тфы закI. Адыгабзэмрэ робототехникэмрэ­кIэ егъэджэн сыхьатхэр нахь зэрикIасэхэр кIэлэцIыкIум къытиIуагъ. Шахмат ешIэныр ыгу рехьы ыкIи дэгъоу къыдэхъу. Ины зыхъукIэ цэшIэ сэнэхьатым зыфигъэзэнэу зэрэфаер къытиIуагъ. Еджэным дакIоу шъхьэфит бэнэнымкIэ Имран илэгъухэм къахэщы. Илъэси 9 нахь зымыныбжь кIэлэцIыкIур Урысыем ичIыпIэ зэфэшъхьафхэм ащызэхащэгъэ зэнэкъокъухэм ахэлэжьагъ, ары пэпчъ апэрэ е хагъэунэфыкIырэ чIыпIэхэр къыдихыгъэх. ИгъэпсыкIэкIэ спортсмен нэшанэхэр хэлъых. Ар зыгъэсэрэ Братэ Мурат лъэшэу къыфэраз.
КIэлэцIыкIухэм щысэ зытырахын яI, ятэу Заури, янэу Нэфсэти дышъэ медалькIэ еджапIэр къаухи Москва дэт чIыдагъэмкIэ ыкIи гъэстыныпхъэ шхъуан­тIэмкIэ университетэу И.М. Губкиным ыцIэ зыхьырэр дэгъу дэдэу къаухыгъ. Заур спортымкIэ гъэхъэгъэшIухэр иIэх, икIалэхэри ащ фещэх. ЯкIалэхэр гъогу дахэ тырагъэхьанхэр ары ны-тыхэм пшъэрылъ шъхьаIэу яIэр, охътэ лые ямыIэу, агукIэ зыфэщэгъэхэ лъэныкъом хагъахъо. Джащыгъум бзэджагъэ ашъхьэ къимыхьанэу ахэм алъытэ. ЯшIэныгъэ­хэм еджапIэм щыхагъахъо, ау спортыми шIогъэ ин зэрэпылъыр Нэфсэт къыхигъэщыгъ. КIалэхэм илъэсрэ ныкъорэ азыфагу илъ, ахэр ренэу зэгъусэх, зэнэ­къокъум Имран изакъоу зэкIом Абдуррахьман чэщым зэрэмычъыягъэр, кIэлэцIыкIур унэм къызэсыжьым апэрэу ыш къызэрэкIэупчIагъэр Нэфсэт игуапэу къеIуатэ. Ахэм яшIулъэгъу хагъэхъоным, цIыф дэгъу хъунхэм пылъых. ИлъэсыкIэм ехъулIэу унагъор Москва щыIагъ, ны-тыхэм къаухыгъэ университетыр арагъэ­лъэгъугъ, дэгъоу уеджэмэ къэлэшхом дэт университетым учIэхьан зэрэплъэ­кIыщтыр агурагъэIуагъ.

ДЕЛЭКЪО Анет.