Адыгэ Республикэм щыпсэухэу лъытэныгъэ зыфэтшIыхэрэр!

МэфэкI шIагъом — кIэлэцIыкIухэм якъэухъумэн и Дунэе мафэ фэшI ты­шъуфэгушIо!
КIэлэцIыкIугъор — щыIэныгъэм ичэзыу анахь нэфэу, гушIуагъоу щыт. Сабыир дунаим хаплъэу регъажьэ, къешIэкIыгъэхэр къыгурыIохэ шIоигъу, ежь амалэу иIэхэри ыгъэунэфынхэм, игъорыгъозэ зэхифынхэм пылъ.
Ны-тыхэм пшъэрылъэу яIэр зэгурыIоныгъэ ахэлъэу сабыир апIуныр, яшIулъэгъуи, ягукIэгъуи лъагъэIэсыныр, гъэсэныгъэ рагъэгъотыныр, тихэгъэгушхо епэсыгъэ цIыф дэгъу хъуным дэлэжьэнхэр ары.
Тиреспубликэ ис ныбжьыкIэхэм лъэныкъо пстэумкIи зэдиштэу хэ­хъоныгъэ ашIынымкIэ, шIэныгъэ дэгъу яIэнымкIэ, спортым, творчествэм апылъынхэмкIэ амалышIухэр щарагъэгъотых: еджэпIакIэхэр къызэIуахых, джырэ уахътэм диштэрэ спорт гупчэхэр, культурэм иучреждениехэр агъэпсых. Унагъом, ным, кIэлэцIыкIухэм IэпыIэгъу ятыгъэным иIофыгъохэм ренэу Адыгеим анаIэ щатырагъэты.
Непэ Адыгэ Республикэм иунагъохэу кIэлэцIыкIухэр зэрысхэм инэу тызэрафэразэр къэтэIо тиобществэ лъэпсэ пытэ фэхъущтхэм япIун яшъыпкъэу зэрэдэлажьэхэрэм пае.
Республикэм ис кIэлэцIыкIу пстэуми тафэлъаIо псауныгъэ пытэ яIэнэу, гъэмэфэ гъэпсэфыгъохэр дэгъоу агъэкIонхэу, насыпышIонхэу, щыIэкIэшIу яIэнэу!
Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр