Тыгъуасэ гурыт еджапIэр къэзыухырэ ныбжьыкIэхэм ятIонэрэ шIокI зимыIэ ушэтынэу урысыбзэр атыгъ.

АР-м и Къэралыгъо аттестационнэ къулыкъу къызэрэщытаIуагъэмкIэ, рес­публикэмкIэ нэбгырэ 1714-мэ заушэ­тыгъ, ахэм ахэтыгъэх гурыт сэнэхьат зиIэ ныбжьыкIэхэу, апшъэрэ еджапIэм чIэ­хьажьын унашъо зышIыгъэхэр. Ушэтынхэр зыщатырэ чIыпIи 10-мэ мы мафэм Iоф ашIагъ, зыпкъ итэу, рэхьатэу ащыкIуагъ.
УрысыбзэмкIэ ушэтыныр сыхьатищрэ ныкъорэ кIуагъэ. Тест шIыкIэм тетэу IофшIэн 26-рэ агъэцэкIагъ, ащ нэмыкIэу сочинение атхыгъ. Аттестатыр къаратыжьыным пае анахь макIэу балл 24-рэ къахьын фае, ау апшъэрэ еджапIэ пэпчъ узэрэчIэхьан плъэкIыщт баллыр ежь егъэнафэ.
Мыекъопэ лицееу N 19-м ушэтыныр зэрэщыкIорэр зэдгъэлъэгъунэу мы мафэм тыщыIагъ. БлэкIыгъэ илъэсхэм ялъытыгъэмэ, ныбжьыкIэхэм нахь рэхьатныгъэ ахэлъэу, мыщынэхэу шIэныгъэу аIэкIэлъыр къагъэлъэгъоным фэхьазырыгъэх.
Ушэтыныр зытыщтхэм ятхылъхэр ауплъэкIухэзэ, зырызэу чIагъэхьагъэх. Шапхъэхэм къызэрэдалъытэрэмкIэ, къэ­лэмым нэмыкIэу псы ахэм аIыгъын фит, ау ащ тегъэпкIэгъэ тхылъыпIэхэр тетхъыгъэнхэ фае. КъызэраIуагъэмкIэ, ыпэкIэ ащ фэдэ тхьапэм ушэтынымкIэ агъэфедэн алъэкIыщтхэр тыратхэхэу агъэунэфыгъагъ.
— Зэтыгъо къэралыгъо ушэтыныр зэрифэшъуашэу, шъыпкъагъэ хэлъэу зэрэкIощтым тынаIэ тет. БлэкIыгъэ илъэсхэм ябгъап­шэмэ, еджапIэр къэзыухыхэрэр нахь рэхьатых, шапхъэхэм адимыштэу зекIон мурад зиIэ тлъэгъурэп. КIэлэеджакIохэр аудиторием чIэхьагъэх, рамыгъа­жьэзэ шапхъэу агъэцэкIэн фаехэр къафаIотагъэх. Сыхьатыр 10-м къэралыгъо ушэтын комиссием хэтхэр щытхэу IофшIэнхэр къызэтырачых ыкIи ахэр афагощых, — къыIуагъ пунктым ипащэу Юлия Трипкош.
Лицеим мы мафэм нэбгырэ 237-мэ зыщаушэтыгъ. ЗэкIэмкIи класс 17-мэ кIэлэеджакIохэр ачIэсыгъэх, зы аудиторием зипсауныгъэкIэ илэгъухэм акIэмыхьэрэ ныбжьыкIэ чIэсыгъ. Общественнэ лъыплъакIоу зы нэбгырэ къекIолIагъ, ау онлайн шIыкIэм тетэу ушэтыным лъыплъагъэх.
Ушэтыныр рамыгъажьэзэ шапхъэу щыIэхэр джыри зэ ныбжьыкIэхэм агу къагъэкIыжьыгъэх. Анна Цветковар илъэс пчъагъэ хъугъэу ушэтыным хэлажьэ, ащ социальнэ педагогэу гурыт еджапIэу N 9-м Iоф щешIэ. НыбжьыкIэхэр тэрэзэу ыгъэтIысынхэр, шапхъэхэм адиштэу зекIонхэр ары ипшъэрылъ шъхьа­Iэр.
УрысыбзэмкIэ атыгъэ ушэтыным изэфэхьысыжьхэр мэкъуогъум и 16-м къэнэфэщтых. ШIокI зимыIэ ушэтынхэр джащ щаухыгъэх. Мыщ ушъхьагъу гъэ­нэфагъэкIэ къемыкIолIэшъугъэхэм ыкIи зыфэмытыгъэхэм мэкъуогъум и 17-м заушэтын амал яIэщт.
Ежь-ежьырэу къыхахыгъэ предметхэм ятын ныбжьыкIэхэм апэ илъ.
ДЕЛЭКЪО Анет.