Сэкъатныгъэ зиIэхэм я Урысые общественнэ организацие икIэщакIоу хьафизэхэм апае спортымкIэ я 2-рэ Урысые спартакиадэм ишъолъыр едзыгъо Мыекъуапэ къыщызэIуахыгъ.

ЗэхэщакIохэм къызэраIуагъэмкIэ, УФ-м щыпсэурэ хьафизэхэр спортым пыщэгъэнхэм ыкIи ащ имэхьанэ зыкъе­гъэIэтыгъэным, спорт резервым хэтхэр икъоу гъэхьазырыгъэнхэм ыкIи икъоу зымылъэгъухэрэм япсауныгъэ гъэпытэгъэным, джащ фэдэу япкъынэ-лынэкIэ яфизическэ лъэгапIэхэм ахэгъэхъогъэным спартакиадэр фэIорышIэ.
Мыщ фэдэ зэнэкъокъур апэрэу Адыгеим щэкIо. Ащ Темыр-Кавказ ыкIи Къыблэ федеральнэ шъолъырхэм къарыкIыгъэ спортсменхэр хэлажьэх. Адыгеир къегъэлъагъо хьафизэхэм я Урысые обществэ и Адыгэ республикэ организацие ихэшыпыкIыгъэ командэ. Спорт лъэпкъэу «голбол» зыфиIорэмкIэ Адыгеим икомандэ зэнэкъокъу зэфэшъхьаф­хэм мызэу, мытIоу апэрэ чIыпIэр къащыдихыгъ, мыщ хэт спортсменхэр Урысыем ихэшыпыкIыгъэ командэ хэтых.
АР-м и Къэралыгъо Совет — Хасэм гъэсэныгъэмкIэ, шIэныгъэмкIэ, ныбжьыкIэ IофхэмкIэ, спортымкIэ, къэбар жъу­гъэм иамалхэмкIэ ыкIи общественнэ организациехэм зэпхыныгъэ адыряIэнымкIэ икомитет ипащэу Шэуджэн Тембот депутатхэм ацIэкIэ зэнэкъокъум хэлажьэхэрэм шIуфэс гущыIэкIэ зафигъэзагъ.
— Мэхьанэшхо зиIэ Iоф­­т­хьабзэм ишIуагъэкIэ шъолъыр­хэм арылъ зэкъошныгъэр ыкIи зэгурыIоныгъэр гъэпытагъэ мэхъу. Мыщ шъузэрэхэлажьэрэм нафэ къешIы гу кIуачIэ зэрэшъуиIэр, пшъэрылъэу зыфэжъугъэуцужьыгъэхэм шъукъамыгъащтэу ахэм ягъэцэкIэн шъузэрэфакIорэр. Зэнэ­къокъур гъэшIэгъонэу екIокIынэу, текIоныгъэ къыдэшъухынэу сышъуфэлъаIо, — къыIуагъ Шэуджэн Тембот.
Хьафизэхэм я Урысые обществэ ичIыпIэ организациеу Мыекъуапэ щыIэм итхьаматэу Алексей Хлоповым къызэриIуагъэмкIэ, Адыгеим апэрэу спартакиадэр щызэхащэ. Сэкъатныгъэ зиIэхэм, анахьэу хьафизэхэм, ягушъхьэбаиныгъэ зыкъегъэIэтыгъэным фэшI мыщ фэдэ Iофтхьабзэхэм мэхьанэшхо яI. Адыгеир зэрахэтэу зэнэкъокъум команди 8 хэлажьэ. Ахэр спорт лъэпкъ зэфэшъхьафи 5-кIэ — шашкэ ыкIи шахмат ешIэнымкIэ, пауэрлифтингымкIэ, теннис цIыкIумкIэ, голболымкIэ зэнэкъокъущтых. Адыгеим икомандэ нэбгырэ 12 хэт, ахэм ащыщых спортымкIэ мастерхэр, ВОЗ-м ипрезидент и Кубок икъыдэхын хэлэжьагъэхэр. Сэкъатныгъэ зиIэхэм щыIэныгъэм зыкъыхагъотэнымкIэ физическэ культурэр ыкIи нэмыкI спорт лъэпкъ зэфэшъхьафхэр амалышIух. Мы купым хэхьэрэ цIыфхэм кIуачIэр зыщагъэфедэрэ спортыр нахь якIас ыкIи ащ епхыгъэ зэнэкъо­къухэм ахэлажьэх.
Зэнэкъокъур мэфитIо кIощт, спартакиадэм текIоныгъэ къыщыдэзыхыгъэхэр нэужым агъэшIощтых.
КIАРЭ Фатим.