Гъэмафэм иапэрэ мазэу мэкъу­огъур къэсыгъ. ИжъыкIэ къыщегъэжьагъэу мы мазэр шIулъэгъум, унэгъо насыпым, джэныкъом иухъумакIо итхьэу алъытэ. МэфэпчъымкIэ мэкъу­огъум и 1-м гъэмафэр къехьэ, ау астрономием ылъэныкъокIэ мафэмрэ чэщымрэ якIыхьагъэ зэфэдиз зыщыхъурэ мэкъуогъум и 22-р ары гъэмафэр къихьагъэу залъытэрэр.
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, илъэс зэ­кIэлъыкIохэм уплъэкIунэу ашIыгъэхэмкIэ мэкъуогъу мазэр «шIухьафтынхэмкIэ» баигъэ. Мы аужырэ илъэс 80-м гъэмафэм иапэрэ мазэ анахь фабэу къызщыхэкIыгъэр 2018-рэ илъэсыр ары, градус 39-рэ агъэунэфыгъагъ. Илъэс къэс мэкъуогъум фабэу щыIэр градус 30-м къехъу.
Статистикэм къызэригъэнафэрэмкIэ, мы мазэр шынэгъакIэу щыт ыкIи псыхъохэм адэт псым зыкъиIэтыным ищынагъо къэуцу.
Мэкъуогъум фабэр Темыр Африкэм ыкIи Средиземноморьем къарыкIыщт. ГурытымкIэ мазэм температурэу щыIэщтыр шапхъэм макIэу шIокIыщт, ощхэу къещхыщтым ибагъэ шапхъэхэм анахь мэкIэщт. Мазэм къыкIоцI ощх ыкIи ошъу къехыщт.
Апэрэ мэфипшIыр. Чэщым фабэу градус 14 — 19, мафэм градус 20 — 25-рэ щыIэщт. КъыхэкIыщтых мафэм фабэр градус 30-м щыкIахьэу.
ЯтIонэрэ мэфипшIыр. Чэщым фабэр градус 16 — 21-м, мафэм градус 27 — 32-м нэсыщт.
Ящэнэрэ мэфипшIыр. Чэщым фабэу градус 18 — 23-рэ, мафэм градус 28 — 33-рэ щыIэщт.
Фабэр шапхъэм зышIокIыкIэ ыкIи ощх къыземыщхыкIэ машIор къызэкIэнэным ищынагъо къэуцун ылъэ­кIыщт.
Мэкъумэщ культурэхэм якъэгъэ­кIынкIэ мэкъуогъум гумэкIыгъо къыздихьыщтэп. Псыхъохэм адэт псыр шапхъэу щыIэхэм ашIокIыщтэп, ау лъэшэу къызещхырэм, ар къыдэкIоен ылъэкIыщт.
КIАРЭ Фатим.