УФ-м лъэпкъ гвардиемкIэ и ­Федеральнэ къулыкъу иотделэу АР-м щыIэм ихэушъхьафыкIыгъэ подразделениеу «Фыщтыр» зызэхащагъэр илъэс 32-рэ ­хъугъэ.

Ащ фэгъэхьыгъэ мэфэкI Iофтхьабзэм хэлэжьагъ Росгвардием ичIыпIэ гъэIорышIапIэ ипащэу Даур Къэплъан.
«ГъэIорышIапIэр загъэпсыгъэм къыщыублагъэу непэ къызнэсым подразделением икъулыкъушIэхэр лъэгэпIэ инхэм атетэу къулыкъум къафигъэуцугъэ дзэ пшъэрылъхэр щытхъу хэлъэу агъэцакIэх, пшъэдэкIыжьышхо ахьы ыкIи IэпэIэ­сэныгъэшхо ахэлъэу шъолъырым илъ хэбзэ рэхьатныгъэмрэ цIыфхэм ящынэгъончъагъэрэ къаухъумэ. Темыр Кавказым дзэ пшъэрылъхэр щагъэцакIэхэзэ ахэм ащыщыбэхэм IэпэIэсэныгъэшхо аIэкIэлъ хъугъэ. Мы мафэм ехъулIэу отрядым хэтхэр хэушъхьафыкIыгъэ дзэ операцием хэлажьэх», — къыIуагъ Даур Къэплъан.
ХэушъхьафыкIыгъэ отрядэу «Фыщтым» икъулыкъушIэхэм общественнэ рэхьатныгъэр, къэралыгъо псэолъэ шъхьаIэхэр къаухъумэх, экстремизмэм ыкIи терроризмэм ябэных, хэушъхьафыкIыгъэ операциехэм ахэлажьэх, следственнэ, оперативнэ ыкIи нэмыкI Iофтхьабзэу къепхыгъэ къулыкъухэм зэхащэхэрэм ахэлажьэх. ОМОН-м иинженер-техническэ куп исаперхэм къэорэ пкъыгъохэр къагъотых ыкIи ахэр агъэкIодых.

Мы илъэсыр къызихьагъэм къыщыублагъэу ОМОН-м идзэкIолIхэм пшъэрылъ 270-рэ зэшIуахыгъ. ЦIыфхэр бэу зыщызэхахьэхэрэ Iофтхьабзэхэм гъогогъуи 130-рэ общественнэ рэхьатныгъэр къыщаухъумагъ, инженер-техническэ IофшIэным епхыгъэ пшъэрылъ 40 агъэцэкIагъ, подразделением икъулыкъушIэхэм нэмыкI хэбзэухъумэкIо къулыкъухэр ягъу­сэхэу оперативнэ-лъыхъун ыкIи пэшIорыгъэшъ Iофтхьабзэхэм ахэлэжьагъэх. Ахэм яшIуагъэкIэ бзэджэшIагъэ зэрахьагъэу нэбгырэ 33-рэ къаубытыгъ.
Пшъэрылъхэм язэшIохынкIэ лIыблэнагъэ ыкIи IэпэIэсэныгъэшхо къызэрэз­хагъэфагъэм афэшI чIыпIэ къулыкъум ипащэ отрядым хэтхэм ащыщхэм къэ­ралыгъо ыкIи къулыкъу тынхэр аритыжьыгъэх.