Мыщ фэдэ шъхьэ зиIэ къэгъэ­лъэ­гъон Мыекъуапэ дэт искусствэхэмкIэ апэрэ кIэлэцIыкIу еджапIэм щыкIуагъ.

Ащ сурэт 30 хэхьагъ, 27-р къалэу Луганскэ щыщ кIэлэцIыкIумэ яIэшIагъ, 3-р искусствэхэмкIэ еджапIэм исурэтышI ныбжьыкIэхэм яй. Нарт эпосым ыкIи Къалмыкъ пшысэхэм атехыгъэ тхыдэжъхэмкIэ сурэтхэр гъэпсыгъэх.
Iофтхьабзэм хэлэжьагъэх Адыгеим ибзылъфыгъэхэм я Союз итхьаматэу Вэрэкъо Хьалимэтрэ ащ игуадзэу Натхъо Разыетрэ, мы организацием илIыкIоу Зыхьэ Мэлайчэт, хэгъэгум идзэ­кIолIхэм яунагъохэм я Комитет АР-мкIэ ипащэу Любовь Штро, АР-м культурэмкIэ и Министерствэ илIыкIохэр.
— Непэрэ къэгъэлъэгъоныр мамырныгъэмрэ зэгурыIоныгъэмрэ ялъэмыдж. Адыгеим ибзылъфыгъэхэм я Союз ренэу Урысыем ишъолъырыкIэхэм арысхэм ренэу IэпыIэгъу афэхъу. Гъэсэныгъэ языгъэгъотырэ кIэлэцIыкIу учреждениехэми ынаIэ атет. ИскусствэхэмкIэ Луганскэ еджапIэм къыгъэхьазырыгъэ кIэлэцIыкIу сурэтхэм якъэгъэлъэгъон шъолъырхэм ащыкIуагъ. Джы непэ сурэт­хэр Адыгеим къэсыгъэх, — къыIуагъ Вэрэкъо Хьалимэт.

— 2024-рэ илъэсым Луганскэ щы­псэурэ кIэлэцIыкIухэм еджапIэхэм ащагъэфедэщт къэлэмхэр, альбомхэр ыкIи нэмыкI пкъыгъохэр афэдгъэхьыгъагъэх. Ар зигукъэкIыгъэр АР-м ибзылъфыгъэхэм я Союз ары. Ежьхэм ягуапэ зэрэхъугъэм лъэшэу тигъэгушIуагъ. Тикъэлэм­хэмкIэ сурэтхэр къашIыхи, къэгъэлъэгъо­нэу Адыгеим къытфы­рагъэхьыжьыгъ. Анахьэу хэзгъэунэ­фыкIымэ сшIоигъор а сурэтхэр къа­шIынхэм ыпэкIэ кIэлэцIыкIухэр тиадыгэ фольклор нэIуасэ зызэрыфа­шIыгъэр ары. СурэтхэмкIэ агу шIоу къытфилъыр къырагъэлъэгъукIыгъ, — къыIуагъ Зыхьэ Мэлайчэт.
СурэтышI ныбжьыкIэмэ яIофшIагъэхэм лъэпкъ пшысэхэм унаIэ тырыуагъадзэ, тилъэпкъ кIэн бай зэриIэр тыгу къагъа­кIыжьы.
— СурэтшIыным гъунапкъэ зэримыIэр Луганскэ икIэлэцIыкIухэм къагъэлъэ­гъуагъ.Зэкъошныгъэмрэ зыкIыныгъэмрэ сурэтхэр ятамыгъэу зэрэщытым лъэшэу тигъэгушIуагъ, — хигъэунэфыкIыгъ Любовь Штро.
Къэгъэлъэгъоныр мэхьанэ ин зиIэ Iофтхьабз. Адыгеим къыкIэлъыкIоу Къал­мыкъым щыпсэухэрэр ащ еплъынхэ амал яIэщт.
Лъэпшъыкъо
Фатим.