ГандболымкIэ Урысыем и Суперлигэ хэт «АГУ-Адыифым» мы илъэс ешIэгъум къыдыхэлъытэгъэ аужырэ зэIукIэгъоу иIагъэр Мыекъуапэ щыкIуагъ. Республикэм икъэлэ шъхьаIэ ихьэкIагъ командэу «Университет» (Ижевск).

ЕшIэгъур узIэпищэу кIуагъэ, ау командэхэм чIыпIэу аубытыщтыр ащ елъытыгъагъэп. ЗэIукIэгъум еплъыгъэх къэралыгъом игандболисткэ анахь лъэшхэу 2012-рэ илъэсым къэхъугъэхэр. Мыхэр Урысые зэнэкъокъухэм яфинал едзыгъоу Мыекъуапэ щыкIорэм хэлажьэх.
ЗэIукIэгъум ипэублэ къыщегъэ­жьагъэу типшъашъэхэр ыпэкIэ илъыщтыгъэх, Iэгоуи 4-кIэ хьакIэ­хэм апэ ишъыгъэх. Ау ащ ыуж «Университетым» пчъагъэр зэфэдиз ышIыгъ ыкIи я 19-рэ такъи­къым нэс арэущтэу щытыгъ. «АГУ— Адыифыр» ащ къезэгъыгъэп, пчъа­гъэм хигъахъоу ыублагъ. Апэрэ таймыр 18:13-у къыхьыгъ. ЯтIонэрэ едзыгъом тигандболисткэхэр джыри нахь лъэшэу ешIа­гъэх, 40:25-у текIоныгъэр къыдахыгъ.

Iэгоо хырых къэлапчъэм да­дзагъ Кобл Зуретэ, Виктория Коваленкэм ыкIи Анастасия Алексеевам. Джащ фэдэу Коблым командэм хэтхэм къэлапчъэм да­дзэгъэ Iэгоуи 8 аIэкIигъэхьагъ. Ау «АГУ-Адыифым» иешIэкIо анахь дэгъоу къыхагъэщыгъэр Анастасия Алексеевар ары.
Зэнэкъокъум изэфэхьысыжьхэмкIэ Адыгеим илIыкIохэм я 11-рэ чIыпIэр къыдахыгъ. ЗэкIэмкIи Суперлигэм командэ 12 хэтыгъ. 2025-рэ илъэсым къэралыгъом ичемпион хъугъэр Москва икомандэу «ЦСКА». Лъэшэу тырэгушхо текIоныгъэ къызфагъэшъо­шагъэм типшъашъэхэу Юлия Баевамрэ Диана Казихановамрэ зэрэхэтхэм.