Гурыт еджапIэр къэзыухыхэрэм хьисапымкIэ тыгъуасэ заушэтыгъ. Мы аужырэ илъэсхэм ар тIоу гощыгъэу аты, базовэ ыкIи профильнэ лъэныкъохэмкIэ зэтыраутыгъэх.

Апшъэрэ еджапIэм чIэхьан мурад зимыIэхэм е хьисапыр яеджэнкIэ зимыщыкIэгъэщтхэм базовэ программэм тетэу аты, профильнэр мы предметыр нахь къызыфэфедэжьыщтхэм къыхахы. Ыпэрэ илъэсхэм мэфэ зэфэшъхьафхэм ушэтыныр зэхащэщтыгъэмэ, мыгъэ ар зы мафэ ашIыгъ, жъоныгъуакIэм и 27-м шъхьадж зэпхыгъэ чIыпIэм екIолIагъ.
АР-м и Къэралыгъо аттестационнэ къулыкъу къызэрэщытаIуагъэмкIэ, мы мафэм базовэ шIыкIэм тетэу нэбгырэ 1064-мэ, профильнэмкIэ — 648-мэ заушэтыгъ. Ар зыщатырэ чIыпIи 10-мэ Iоф ашIагъ, зэрифэшъуашэу кIуагъэ, шапхъэхэм адимыштэу зи агъэунэфыгъэп.
Мыекъопэ гимназиеу N 5-м мы мафэм базовэ хьисапыр нэбгырэ 215-мэ щатыгъ. ЗэкIэмкIи аудиторие 17-мэ ныбжьыкIэхэр ачIэсыгъэх.
— Ушэтыным изэхэщэн зи зэ­хъокIыныгъэ фэхъугъэп. Нэбгырэ пэпчъ пшъэрылъ гъэнэфагъэ тиI, пшъэдэкIыжь тэхьы. Классхэм ачIэт кIэлэегъаджэхэм анэмыкIэу, общественнэ лъыплъакIохэр, ахэм зы ны ягъус, джащ фэдэу онлайн шIыкIэм тетэу ушэтыным лъэплъэх. Мы илъэсым кIэлэеджакIохэм яфитыныгъэхэр къэухъумэгъэнхэм анаIэ нахь тырагъэты, еджэпIэ чIэхьэгъум QR-кодэу тетымкIэ ныбжьыкIэхэм ядаохэр ратхэнхэ амал яIэ хъугъэ, — еIо ушэтыныр зыщыкIогъэ чIыпIэм ипащэ.
Сыхьатыр 10-м конвертхэр къызэ­Iуахыгъэх, IофшIэнхэр рагъэжьагъэх. Базовэ хьисапымкIэ гъэцэкIэнхэм сы­хьатищэ, профильнэр сыхьатищрэ та­къикъ 55-рэ кIэлэеджакIохэр апылъы­гъэх. Мэкъуогъум и 9-м къыщегъэжьагъэу хьисапымкIэ ушэтыным изэфэхьысыжьхэр къэнэфэщтых. Ар зыфэмытыгъэхэм е ушъхьагъу зэфэшъхьафхэм апкъ къи­кIыкIэ къемыкIолIэшъугъэхэм IэпэчIэгъэ­нэ мафэ яIэщт.
ЕджапIэр къэзыухыхэрэм мы мафэм ехъулIэу тарихъымкIэ, литературэмкIэ, химиемкIэ заушэтыгъах. ЖъоныгъуакIэм и 30-м шIокI зимыIэ ушэтынэу урысыбзэр атыщт.
ДЕЛЭКЪО Анет.