БоксымкIэ ныбжьыкIэхэм азыфагу зэхащэгъэ Урысыем изэнэкъокъу хэлэжьагъэх ыкIи текIоныгъэр къыщыдахыгъ Адыгеим илIыкIохэу Мушег Баяндурянрэ Евгений Жоровымрэ. Гъэхъэгъэшхо зышIыгъэ спортсменхэм афэгушIуагъ АР-м и ЛIышъхьэу КъумпIыл Мурат.

— Спорт мэхьанэшхо зиIэ зэнэкъо­къоу Краснодар щыкIуагъэм тичIыпIэгъухэм зэфэхьысыжь къэгъэлъэ­гъонышIухэр щашIыгъэх. Килограмм 48-рэ ыкIи 51-рэ къэзыщэчыхэрэм якупхэм защызыушэтыгъэхэ Мушегрэ Евгенийрэ дышъэ медальхэр къахьыгъэх, ащкIэ къэралыгъом испортсмен анахь лъэшхэу зэрэщытхэр къагъэ­шъыпкъэжьыгъ. Мы текIоныгъэм ишIуагъэкIэ чъэпыогъум Армением щыкIощт Европэм ипервенствэ хэлэжьэнхэу тикIалэхэм фитыныгъэ къыдахыгъ. Адыгеим испортсменхэм Урысыер дунэе мэхьанэ зиIэ зэнэ­къокъум къыщагъэлъэгъощт. Тичемпионхэм ыкIи ахэм ятренерхэм тарэгушхо. ТекIоныгъакIэхэр къыдахынхэу, пытагъэ къызхагъэфэнэу ыкIи лъэгэпIэ инхэм анэсынхэу афэтэIо, — къащитхыгъ Адыгеим и ЛIышъхьэ исоциальнэ нэкIубгъохэм.