Непэ фэдэ мафэм, 1937-рэ илъэсым ижъоныгъуакIэ и 26-м, Адыгэ театрэм апэрэу ипчъэ къызэIуихыгъ.

Лъэпкъым ежь иеу, иунаеу театрэ иIэныр насыпыгъ. Адыгэ Республикэм и Лъэпкъ театрэу Цэй Ибрахьмэ ыцIэ зыхьырэр Къыблэ федеральнэ шъолъырым анахь ныбжь ин зиIэ театрэхэм ыкIи анахь зэлъашIэрэ професиональнэ купхэм ащыщ.

Адыгэ театрэр — тыдэкIи щыIэ адыгэмэ яй. ЦIыфхэр зэфэзыщэрэ, зэзыпхырэ шэн-хабзэхэр, гушъхьэ лэжьы­гъэр, бзэр къэзыухъумэн, къэзгъэлъэгъон, ахэм ахэзгъэхъон зылъэкIырэ амалы­шху театрэр.
ЗэлашIэрэ драматургэу, тхакIоу, зэ­дзэкIакIоу, лъэпкъ театрэм, сценическэ искусствэм илъэгъохэщэу Цэй Ибрахьимэ кIэщакIо зыфэхъугъэгъэ Краснодар театральнэ училищыр къэзыухыгъэхэр ары Лъэпкъ театрэм иапэрэ актерыгъэхэр. Цэим икъэлэмыпэ къычIэкIыгъэ апэрэ адыгэ пьесэу «КъокIас» зыфиIорэмкIэ театрэм ищыIэныгъэ ыублагъ.

Театрэм игъогу псынкIагъэп, илэжьэн Хэгъэгу зэошхом зэпыугъошхо фишIыгъагъ, ау лъэпкъыр зыхэшхъожьи, амалэу щыIэхэм яусэхэзэ театрэм иIофшIэн лъигъэкIотагъ. ЦIыфхэм искусствэмкIэ шIуагъэ къафахьыныр, агъэгушхонхэм, агъэгушIонхэм, агу къыдащэеным драматургием, литературэм нэIуасэ афа­шIынхэм Адыгэ театрэм иартистхэр сыдигъокIи фэхьазырыгъэх.
Творческэ лъэныкъомкIэ теат­рэр зыпылъын, зылъы­Iэсын фэ­ягъэр бэ, ау зэ­кIэмэ апшъэр — Лъэпкъ театрэм адыгабзэкIэ Iоф зэришIэн, лъэп­къым зэрэфэ­лэ­жьэн фэягъэр ары. Лъэпкъым театрэ иIэ зэхъум тхакIо­хэри, усакIо­хэри, нэмыкI цIыф­хэу литературэм, шIэныгъэм апылъыгъэ­хэр ча­нэу ащ ирепертуар зэхэгъэуцогъэным хэлэжьагъэх ыкIи непэ театрэр зынэсыгъэ чIыпIэм нэсынымкIэ яIа­хьышIу, яIахышхо халъхьагъ. Ахэм яшIуагъ лъэп­къым ищыIакIэ, игупшысакIэ, изэхэтыкIэ театрэм чIыпIэшхо щиубыты зэрэхъугъэр.
Адыгэ театрэм гъогу къин къыкIугъэ­ми, ежь иеу, зыми фэмыдэу, купкIи, куцIи иIэу непэрэ мафэхэм къэсыгъэу, искусствэм чIыпIэ гъэнэфагъэ щиубытэу мэлажьэ. Лъэпкъ театрэр культурнэ гупчэ шъыпкъ пIомэ ухэукъощтэп. ЦIыфхэр зэрэлъэгъунхэу, искусствэм нахь пэблагъэ хъунхэу, адыгэ лъэпкъ сценическэ искусствэм хэхъоныгъэу иIэ хъухэрэм, лъэпкъым къыфэтэджырэ Iофыгъохэм агъэгумэкIхэу театрэм къеб­лагъэх. Ащ угу къымыIэтын, уимыгъэгушхон ылъэкIыщтэп.
Зэманхэр зэблэкIых, щыIэныгъэри зэхъокIы, ащ ифэмэ-бжьымэ театрэм къытемыхьан ылъэкIырэп, уахътэм, джырэ дунэезэхэтыкIэм, гъэпсыкIэм адиштэу, ау ипшъэрылъ шъхьаIэ щымы­гъуп­шэу, илъэпкъ нэшанэу пстэуми къахэзыгъэщырэр пыдзы ымышIэу, неущрэ мафэм нэшIукIэ хаплъэу, Адыгэ театрэр илъэс 88-рэ хъугъэу лъэпкъыр зыгъэгъуа­зэрэ амалышхомэ ащыщэу, лъэпкъым игъусэу, фэшъыпкъэу мэлажьэ.
Дыхъу Нэфсэт.