Сабыеу кIодыгъэхэм я Дунэе мафэ ехъулIэу лъыхъокIо-къэгъэнэжьын отрядэу «Лиза Алерт» зыфиIорэм Iофтхьабзэ поселкэу Яблоновскэм щызэхищагъ. Муралэу «IэпыIэгъу езыгъэкIын зылъэкIыщтыр о зыр ары» зыфиIорэр мэфэкI шIыкIэм тетэу къызэIуахыгъ, яIофшIэн къизыIотыкIрэ къэгъэлъэгъонхэр зэхащагъэх, къекIолIагъэхэм гущыIэгъу афэхъугъэх.

Хабзэ зэрэхъугъэу, мы мафэм сабыеу кIодыгъэхэр агу къагъэкIыжьых. Унагъо пэпчъ анахь тхьамыкIэгъо инэу къехъулIэн ылъэкIыщтым ар ащыщ. Мыщ идэгъэзыжьын хэлэжьэнхэу, сабый зизакъо алъэгъумэ блэмыкIынхэу отрядым иволонтерхэр къэзэрэугъоигъэхэм къя­джагъэх.
Къатыбэу зэтет унэу поселкэу Яблоновскэм дэтым тырашIыхьэгъэ сурэтым сабыеу кIодыгъэр тет, «IэпыIэгъу езыгъэкIын зылъэкIыщтыр о зыр ары» ащ пытхагъ. Унэм блэкIырэ пэпчъ ыгукIэ тхьамыкIагъом лъыIэсыныр, кIодыгъэм IэпыIэгъу зэрищыкIагъэр зэхишIэныр ары пшъэрылъ шъхьаIэу иIэр.
Сабыйхэр мыкIодынхэу пшIын умылъэ­кIыщтыми, ахэр шIэхэу къэгъотыжьыгъэн­хэмкIэ, хэкIуадэхэрэм япчъагъэ нахь макIэ хъунымкIэ нэбгырэ пэпчъ ишIуагъэ къыгъэкIон зэрилъэкIыщтыр «Лиза Алерт» илIыкIохэм къыхагъэщыгъ.

Iофтхьабзэм изэхэщэнкIэ лъыхъокIо- къэгъэнэжьын отрядым цIыфыбэ IэпыIэгъу къыфэхъугъ.
— «Лиза Алертым» игухэлъ дедгъэштагъ, сабыйхэм ящынэгъончъагъэ къэу­хъумэгъэнымкIэ ащ мэхьанэшхо иI. Унэм тет сурэтышхом ишIуагъэкIэ цIыфхэм ящыIэныгъэ къэухъумэгъэн, узэдеIэжьын зэрэфаер анэ кIэтыщт, — къыIуагъ муниципальнэ гъэпсыкIэ зиIэ «Яблоновскэ къэлэ псэупIэм» ипащэ игуадзэу ЛэупэкIэ Алый.
Краснодар щыщ граффити-сурэтышIэу Алексей Серебренниковым IофшIэныр ыгъэцэкIагъ.
— Социальнэ мэхьанэ зиIэ проектым тыхэлэжьэн, тиIахьышIу хэтлъхьан амал тиIэ зэрэхъугъэм тырэгушхо. ГущыIэм нахьи нахь лъэшэу искусствэр къэгущыIэн елъэкIы, нэбгырэ пэпчъ мы муралым ригъэгупшысэнэу, IэпыIэгъу зищыкIагъэм блэмыкIынхэу тэгугъэ, — къыIуагъ Алексей.
МэфэкI шIыкIэм тетэу муралыр къызызэIуахым ыуж отрядым иIофшIэн фэгъэхьыгъэ къэгъэлъэгъонэу зэхащагъэм екIолIагъэх, кIодыхэрэм, къагъотыжьыгъэхэм япчъагъэ ащ къыщаIуагъ ыкIи сабыйхэр щынэгъончъэу пIугъэнхэм фэгъэхьыгъэу гущыIэгъу афэхъугъэх.
— Мыщ фэдэ Iофтхьабзэхэм яшIуагъэкIэ, сабыеу кIодыгъэм къырыкIощтыр нэбгырэ пэпчъ бэкIэ зэрелъытыгъэр джыри зэ агу къэтэгъэкIыжьы. Яблоновскэ псэупIэм иадминистрацие, IэпыIэгъу къытфэхъугъэхэм лъэшэу тафэраз, — къыIуагъ АдыгеимкIэ отрядым ипащэу Константин Морозевич.
Зыгъэхьазырыгъэр
ДЕЛЭКЪО Анет.