Адыгеим имэкъумэщ ­хъызмэт илъэныкъоу зэрэзэтырагъэуцожьыгъэм имызакъоу, зызыу­шъомбгъухэрэм ащыщ пынджлэжьыныр.

2023-рэ илъэсым пстэумкIи гектар мини 7,9-рэ типынджлэжьхэм яIагъ, къыкIэлъыкIогъэ 2024-м мини 9-м нагъэсыгъ, мыгъэ мини 9,3-рэ апхъынэу агъэнэфагъ.
АР-м и Къэралыгъо Совет — Хасэм и Тхьаматэу Владимир Нарожнэр УФ-м ихэбзэихъу­хьэхэм я Советэу Федеральнэ ЗэIукIэм щызэхащагъэм иIоф­тхьабзэу Санкт-Петербург щыкIуагъэхэм захэлажьэм, мэкъу­мэщ-къыдэгъэкIын политикэмкIэ, чIыопсым игъэфедэнкIэ ыкIи экологиемкIэ Комиссиеу зы­хэтым къыщыгущыIагъ. Джа­щы­гъум игъэкIотыгъэу зигугъу къы­шIыгъэхэм ащыщ Адыгеим пынджлэжьыным зызэрэщиу­шъомбгъурэр.

Аужырэ илъэсхэм типынджлэжьхэм мы лъэныкъом чIыпIэу ыубытыщтыгъэр зэрэзэтыра­гъэуцожьыгъэм имызакъоу, лэ­жьыгъэу къырахыжьырэмкIэ къэгъэлъэгъонхэм анэсых. Ар къыIотагъ Владимир Нарожнэм. 2023-рэ илъэсым зы гектарым, гурытымкIэ лъытагъэу, центнер 53-рэ къырахыгъагъ, тонн 42-рэ фэдиз къаугъоижьыгъагъ. Гъэ­рекIо центнер 59,2-рэ зы гектарым къытыгъ, тонн 53,7-рэ пстэумкIи къырахыгъ. Iофым хэшIыкI фызиIэхэм къызэрэхагъэщырэмкIэ, ахэр къэгъэлъэгъон иных.
Мыгъэ къырахырэр центнер 59-м рагъэхъунэу ары зызэ­рэтырагъэпсыхьэрэр типынджлэжьхэм. Ащ нагъэсымэ, гектар мини 9,3-у апхъыщтым тонн мин 54-м кIагъахьэу къыщаугъоищт.
Пынджым дэлажьэу заводищ республикэм ит хъугъэ. ЗэкIэ шъолъырым къыщаугъоижьы­гъэр зыгъэкъэбзэн, гъомылэпхъэшIыным фагъэхьазырынэу ахэм акIуачIэ екъу. Арэущтэу щытми, пынджым ыуасэ гумэкIыгъохэр къетых. ГущыIэм пае, гъэрекIо ар Iуахыжьыным ыуж ихьанхэм ыпэкIэ, зы килограммым сомэ 38-рэ ыосагъ. Лэжьыгъэр къызаугъоижьым сомэ 25-м нэс къеIыхыгъ, мы уахътэм сомэ 27-рэ ыуас. Ащ пынджлэжьхэм зэрар къызэрафихьырэм имыза­­къоу, мыщ икъыдэгъэкIын хэ­гъэ­хъогъэным фэгъэхьыгъэ пшъэ­рылъэу УФ-м мэкъу-мэщымкIэ и Министерствэ къы­гъэ­у­цугъэр гъэцэкIэгъуае къешIы.
Шъолъыр Парламентым ипащэ а зэпстэур къыхигъэщызэ, пынджлэжьыным пылъхэм Iэпы­Iэгъу ягъэгъотыгъэным фыте­гъэпсыхьэгъэ федеральнэ программэхэм гъэкIэжьынхэр зэ­ря­щыкIагъэхэм УФ-м ихэбзэ­ихъу­хьэхэм я Совет анаIэ щы­­тыраригъэдзагъ. Мэкъумэщ республикэу ежь зилIыкIом ипащэхэм мы лъэныкъом щылажьэхэрэм IэпыIэгъу афэхъугъэныр апшъэ ашIыхэрэм зэращыщыми ащ къыкIигъэтхъыгъ. Пынджлэжьхэм мы культурэм икъэгъэкIын ыкIи иIугъэкIын мылъкоу тырагъэкIуадэрэм щыщ субсидиекIэ къафегъэгъэзэ­жьыгъэнымкIэ кIэщакIо зыфэхъу­гъэхэм нэIуасэ афишIыгъэх.
Урысыем ишъолъырэу пындж­лэжьынымкIэ пэрытныгъэр зы­Iыгъхэм Адыгеир ащыщ хъунымкIэ ищыкIагъэр зэкIэ иI. Пындж­лэжьхэм къэралыгъор къызэрадеIэрэр зэхашIэнэу, неущырэ мафэм зыпкъитныгъэ яIэным пае сыдигъокIи ар IэпыIэгъу къызэрафэхъущтым яцыхьэ те­лъынэу ары ныIэп ищыкIагъэр.
Зыгъэхьазырыгъэр
ХЪУТ Нэфсэт.