Хахъо ашIынымкIэ IэпыIэгъушIу
Шъолъыр проектэу «Сабыибэ зэрыс унагъу» зыфиIорэм хэхьэрэ программэу «ЦIыфхэм социальнэ IэпыIэгъу ягъэгъотыгъэныр» Адыгеим щагъэцакIэ.
Ар хэушъхьафыкIыгъэ купым хэхьэрэ цIыфхэм социальнэ зэзэгъыныгъэм тетэу яшIуагъэ арагъэкIыным фэIорышIэ.
«Социальнэ зэзэгъыныгъэм» шIуагъэ къытэу республикэм Iоф зэрэщишIэрэм мэхьанэ иI ыкIи уегъэгушIо. АР-м финансхэмкIэ и Министерствэ къызэритыгъэмкIэ, 2025-рэ илъэсым сомэ миллион 232,8-рэ ащ пэIуагъэхьанэу агъэнэфагъ, ащ щыщэу сомэ миллион 230,4-р федеральнэ бюджетым къыхэхыгъ. МэзиплIым къыкIоцI сомэ миллион 54,8-рэ фэдиз IэпыIэгъу цIыфхэм аратыгъ.
АР-м IофшIэнымкIэ ыкIи социальнэ хэхъоныгъэмкIэ и Министерствэ цIыфхэм социальнэ IэпыIэгъу ятыгъэным иамалхэр пхырыщыгъэнхэмкIэ иотдел ипащэ игуадзэу Емзэщ Ларисэ къызэриIуагъэмкIэ, цIыфэу зигъот узэрыпсэун плъэкIыщт ахъщэ анахь макIэм нэмысыхэрэм адеIэнхэм мыр анахьэу тегъэпсыхьагъ. Пособиеу къатыхэрэм социальнэ зэзэгъыныгъэр зэратекIырэр цIыфым ежь-ежьырэу зиIыгъыжьын амал зэрэритырэр ары ыкIи тапэкIэ унагъом хахъоу иIэр нахьыбэ ышIыным фытегъэпсыхьагъ.
— «Социальнэ зэзэгъыныгъ» зыфиIорэ къэралыгъо IэпыIэгъум къыдыхэлъытэгъэ ахъщэр зыпэIубгъэхьащтхэр лъэныкъо гъэнэфагъэхэм атегъэпсыхьагъ. Ар унэе сатыу гъэпсыгъэныр — сомэ мин 350-м нэс; унэгъо хъызмэт зэхэщэгъэныр — сомэ мин 200-м нэс; IофшIэпIэ чIыпIэ улъыхъуныр — Iоф зышIэрэ цIыфыр зэрыпсэун ылъэкIыщт ахъщэ анахь макIэу агъэнэфагъэр мэзи 4-м къыкIоцI къыратыщт; щыIэныгъэм чIыпIэ зэжъу ригъэуцогъэ унагъор къизыщыщтыр — Iоф зышIэрэ цIыфыр зэрыпсэун ылъэкIыщт анахь ахъщэ макIэу агъэнэфагъэр мэзи 6-м къыкIоцI
е фаемэ зэтыгъоу къыратыщт, — къыIуагъ Емзэщ Ларисэ.
ТигущыIэгъу къызэрэхигъэщыгъэмкIэ, 2024-рэ илъэсым АдыгеимкIэ ащ фэдэ къэралыгъо IэпыIэгъур нэбгырэ 760-мэ аратыгъ, проектым игъэцэкIэн пстэумкIи сомэ миллиони 162,32-рэ къыфыхагъэкIыгъ. Тызыхэт илъэсым имэзи 4 унэгъо 351-мэ «социальнэ зэзэгъыныгъэм» адыкIэтхагъэх.
Социальнэ IэпыIэгъур цIыфым къыратынымкIэ тхылъхэр ыгъэпсынхэм пае игъот зэрэмакIэр къыгъэшъыпкъэжьын фае. Ащ ыуж лъэIу тхылъыр зыщиты-
гъэ пIалъэм ыпэрэ мазэм къыщыублагъэу мэзищым къыкIоцI хахъоу иIэхэр къалъытэх. Нэужым игухэлъхэр къизыIотыкIырэ программэр цIыфхэм яфэIо-фашIэхэр зыгъэцэкIэрэ социаль-
нэ къулыкъум рихьылIэнышъ, зэкIэ къыфагъэхьазырыщт.
Iэшъынэ Сусан.