Мазэу тызыхэтым сабый зэрыс унагъохэм социальнэ IэпыIэгъу ятыгъэным, банкхэм чIыфэ къаIызыхыхэрэм, кIэлэпIупкIэр ­игъом зымытыхэрэм, нэмыкIхэм афэгъэ­хьыгъэ хэбзэгъэуцугъэхэм, шэпхъакIэхэм кIуачIэ яIэ хъугъэ.

Социальнэ IэпыIэгъур
ЖъоныгъуакIэм и 1-м къыщыублагъэу зыныбжь илъэси 3-м шIомыкIыгъэ кIэлэцIыкIу зэрыс унагъохэм мазэ къэс къафакIорэ ахъщэ тыным игъэпсын шап­хъэу пылъхэм зэхъокIыныгъэхэр афэхъугъэх.
УФ-м IофшIэнымкIэ ыкIи цIыфхэр социальнэу къэу­хъумэгъэнхэмкIэ и Министерствэ къызэритыгъэмкIэ, джы ар кIэлэцIыкIур ыпIунэу къаIызыхыгъэхэми анэсы, дзэ къулыкъум ащагъэм икIэлэцIыкIухэри (ным е нэмыкIэу зыштагъэм изакъоу епIумэ) къыхеубытэх.
Пособием игъэпсын тхылъэу ищыкIагъэхэм ятыни нахь IэшIэх хъугъэ. Джы ахэр къэралыгъо фэIо-фашIэхэм япортал ныIэп зыщыптынхэ плъэкIыщтыр, нэмыкI шIыкIэ иIэжьэп. Унагъом нэбгырэ пчъагъэу исыр, гъотэу иIэр зыфэдизхэр къэзыушыхьатырэ тхылъхэр атынхэу ищыкIэгъэжьэп.
Егупшысэнхэу уахътэ ­къаратыщт
Банкым чIыфэ къыIихынэу еолIагъэм а лъэбэкъоу ышIыгъэм фэхьазырмэ джыри зэ егупшысэжьынэу уахътэ къыратыным фэгъэхьыгъэ хэбзэгъэуцугъэ УФ-м и Къэралыгъо Думэ ыштагъ. Ащ жъоныгъуакIэм и 15-м кIуачIэ иIэ хъугъэ.
Ащ къызэрэщиIорэмкIэ, банкыр цIыфэу зыфэзгъэ­загъэм сомэ мин 50-м щыублагъэу сомэ мин 200-м нэсэу чIыфэ къыритынэу къезэгъыгъэу, ащ фэгъэхьыгъэ зэзэгъыныгъэм лъэныкъуитIур зэдыкIэтхагъэмэ, ащ ыуж сыхьатиплI темышIэу ахъщэр счетым къыригъэхьащтэп. Кредитыр сомэ мин 200-м шIокIымэ, сыхьат 48-рэ пIалъэу иIэщт.
ЦIыфым егупшысэгъу имыфэу, зэритыжьыщт амалэу иIэхэри къыдимылъытэхэу чIыфэр ыштэу, етIанэ ар фэмытыжьэу ыкIи кIэгъожьэу бэрэ къыхэкIы. Аужырэ уахътэм гъэпцIакIохэм агъэдаIоу кредит зэрагъэгъэ­псыхэрэм япчъагъи нахьыбэ мэхъу. А зэпстэумэ цIыфхэр ащыухъумэгъэнхэм фытегъэпсыхьагъ законыкIэр. Ау ахэр ипотекэм, автомобиль лизингым, нэмыкI чIыфэу мыхэм яхьщырхэм анэсыхэрэп.
Джыри чIыфэхэм
афэгъэхьыгъэу
Урысыем щыпсэухэрэм «якредит историехэм» мы мазэм къыщыублагъэу зэхъокIыныгъэхэр афэхъугъэх. Джы ащ цIыфыр къызщыхъугъэ чIыпIэр итхэгъэжьыщтэп.
Банкхэм якредитхэр зыгъэфедагъэхэм якъэбарэу (данные клиентов) Гупчэ банкым IэкIагъэхьагъэу, цIыфыр къызщыхъугъэ чIыпIэр рамытхагъэмэ, джы пшъэ­дэкIыжь ахьыжьыщтэп. ЧIыфэ фаеу зафэзгъазэхэрэм якъэбархэм зэрахэплъэщтхэр ащ нахь IэшIэх къы­шIыщт, цIыфхэм яунэе къэбархэр нахь ухъумагъэ хъущтых.
КIэлэпIупкIэр зымытыхэрэр
ЖъоныгъуакIэм и 25-м щыублагъэу исабый кIэлэпIупкIэр игъом езымытыхэрэм яфедеральнэ спискэ щыIэ хъущт.
Мыщ ишIуагъэкIэ чIыфэ зытелъхэм якъэгъотын нахь IэшIэх хъущт, амытыгъэу зэтехьагъэр зыфэдизыр къулы­къоу зиIоф хэлъхэм зэкIэми алъэгъущт.
ЧIыфэ зытелъым хэзыгъэ имыIэу зэкIэ ымытыжьэу спискэм хагъэкIыщтэп.
Зыгъэхьазырыгъэр ХЪУТ Нэфсэт.