ЗаводыкIэу «Картонтара-2» зыфиIорэр Мые­къуапэ тыгъуасэ къыщызэIуахыгъ.

А Iофтхьабзэм хэлэжьагъэх Адыгеим и ЛIышъхьэу КъумпIыл Мурат, УФ-м и Президент Къыб­лэ федеральнэ шъолъырымкIэ и Полномочнэ лIыкIо игуадзэу Алексей Ермаковыр, пшъэдэ­кIыжьэу ыхьырэмкIэ гъунэпкъэ гъэнэфагъэ зиIэ обществэу «СФТ Групп» зыфиIорэм ипащэхэм я Совет и Тхьаматэу Анатолий Штейнберг, а общест­вэм и ГъэIорышIапIэ и Тхьаматэу Евгений Глезман, игъэцэкIэкIо пащэу Сергей Погодиныр, АР-м иминистрэхэм я Кабинет, АР-м и Къэралыгъо Совет — Хасэм, обществэу «СФТ Групп» зыфиIорэм щылажьэхэрэм ялIыкIохэр.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» ия 60-рэ илъэс фэгъэхьыгъэ Iоф­тхьабзэхэм къадыхэлъытагъэу IофшIэпIакIэм икъызэIухын кIуагъэ. Нафэу зэрэщытымкIэ, Урысыем и Къыблэ ипредприятие анахь инхэу гофротарэр къэзышIыхэрэм ар ащыщ. Предприятием къыпэIулъ чIыпIэм заводэу «Картонтара-2-р» щагъэпсыгъ. Илъэсым къыкIоцI квадрат метрэ миллиони 150-рэ фэдиз гофропродукциеу ащ къыдигъэкIын ылъэкIыщт. Илъэ­ситIум кIыкIоцI проектым игъэ­цэкIэн кIуагъэ. Инвестициеу пэ­Iухьагъэр сомэ миллиарди 3,5-рэ фэдиз мэхъу.
Урысые Федерацием и Президент Къыблэ федеральнэ шъолъырымкIэ и Полномочнэ лIыкIо ыцIэкIэ заводыкIэм пае къэзэрэугъоигъэхэм къафэгу­шIуагъ Алексей Ермаковыр.
«Хабзэмрэ бизнесымрэ язэ­дэлэжьэныгъэ-зэгурыIоныгъэкIэ щысэ шIагъоу ар щыт. Рес­пуб­ликэм ихэбзэ къулыкъухэм КъумпIыл Мурат япащэу шъо­лъырым иэкономикэ унэе инвестициехэр нахьыбэу къыхэгъэхьэгъэнхэмкIэ амал дэгъу­хэр Адыгеим щызэхащагъэх. Джащ фэдэу бизнесми тызэрэфэразэр къэсэIо проектхэмрэ социальнэ екIолIакIэхэмрэ къапкъырыкIыхэзэ шIуагъэ хэлъэу Iоф­тхьабзэхэр зэрэзэшIуахыгъэхэм пае», — къыIуагъ Алексей Ермаковым.
«СФТ Групп» зыфиIорэм ипащэ Адыгеим и ЛIышъхьэ инвестициехэм алъэныкъокIэ республикэм щызэшIуихыхэрэм апае зэрэфэразэр къыIуагъ. Проект инхэр зэшIохыгъэнхэмкIэ ахэм амалышIухэр къатых. Анатолий Штейнберг къызэри­IуагъэмкIэ, федеральнэ ыкIи шъолъыр къулыкъухэу а лъэныкъом дэлажьэхэрэм яшIуагъэкIэ джырэ уахътэм диштэрэ, анахь технологие инхэм атегъэпсыхьэгъэ гофрозаводыр агъэпсын алъэкIыгъ, нэмыкI шъолъырхэми ар щысэ афэхъун ылъэкIыщт.

«ПредприятиякIэр къызэрэзэIуахы­гъэм ыкIи производственнэ кIуачIэхэм тапэкIи нахь зызэраушъомбгъущтым къеушыхьаты зыпкъитыныгъэ хэлъэу IофшIэныр зэрэкIощтыр, бизнесымрэ хабзэмрэ шIогъэ ин хэлъэу зэрэзэдэлэжьэщтхэр, хэгъэгум иэкономикэ ыпашъхьэ ит стратегическэ пшъэрылъхэм язэшIохын­кIэ тызэрэлъыкIуатэрэр. Тызэгъусэу ыкIи УФ-м промышленностымрэ сатыумрэкIэ и Министерствэ иIэпыIэгъу хэлъэу Адыге­им промышленнэ политикэм зыщиу­шъомбгъуным тапэкIи тыдэлэжьэщт. Тэ гухэлъэу тиIэр Урысыем и Президентэу Владимир Путиным къыгъэуцугъэ пшъэ­рылъхэр зэшIохыгъэнхэр ыкIи хэгъэгум экономикэмкIэ иIофхэм язытет нахь гъэпытэгъэным тиIахь хэтшIыхьаныр ары», — къыIуагъ Адыгеим и ЛIы­шъхьэу КъумпIыл Мурат.
Iофтхьабзэм хэлажьэхэрэм производственнэ амалыкIэхэу щыIэ хъугъэхэм защагъэгъозагъ: гофроагрегатым, гъэIорышIэнымкIэ пультым Iоф зэрашIэрэм, продукцие хьазырыр къызэрыкIощт линием ыкIи нэмыкIхэм. Обществэм ипащэхэм къызэрэхагъэщыгъэмкIэ, зэкIэ Iофыгъоу зэшIуахыщтхэр автоматизированнэу щытыщтых, IофшIэныр щынэгъон­чъэным пае амалэу ящыкIагъэхэр ара­гъэгъотыщтых. ПредприятиякIэм IофшIэпIэ чIыпIакIэу 120-рэ фэдиз иIэ хъущт.
Хэгъэгум и Къыблэ ащ фэдэ продукциер нахьыбэу ищыкIагъэ зэрэхъугъэм къыхэкIэу обществэу «СФТ Групп» зы­фиIорэм къыдигъэкIырэм хегъахъо. Ащ епхыгъэу заводэу «Картонтара-2-р» затIупщырэм ыуж «Ошъутенэм» ипроект фежьэщтых. Инвестициехэр сомэ миллиард 20-м ехъущтых, IофшIэпIэ чIыпIакIэу 120-рэ фэдиз яIэ хъущт. Проектым къызэрэдилъытэрэм тетэу 2028-рэ илъэсым нэс технологиякIэм тетэу тхылъыпIэр къэзышIыщт машинэр атIупщыщт. «Картонтарэм» ыкIи «СФТ Пакеджинг Майкоп» зыфиIорэм ягъэцэ­кIэкIо пащэу Сергей Погодиным къызэриIуагъэмкIэ, джырэ уахътэм диштэрэ ащ фэдэ машинэ апэрэу хэгъэгум щагъэпсы. Картон щыхьагъэу ыкIи зыкIоцIащахьырэ тхылъыпIэм фэдэу илъэсым тонн 270-рэ фэдиз ащ къыдигъэкIыщт.
Проектхэу «Картонтара-2-мрэ» «Ошъу­тенэмрэ» япхырыщын апэрэ лъэбэкъоу хъущт инновационнэ промышленнэ клас­тер Адыгеим щызэхэщэгъэнымкIэ. Обществэу «СФТ Групп» зыфиIорэм инвестиционнэ проектхэу пхырищыщтхэм сомэ миллиард 30 фэдиз илъэси 5-м къыкIоцI апэIуигъэхьащт.

ГъэIорышIапIэм и Тхьаматэу Евгений Глезман къызэрэхигъэщыгъэмкIэ, а про­ектыр тыкъэзыуцухьэрэ дунаим зэрар фэмыхъунымкIэ, экономикэм хэхъоныгъэ егъэшIыгъэнымкIэ федэшхо къэзыхьыщтхэм ащыщ. ЯтIонэрэ сырьер къыдэгъэкIыжьыгъэнымкIэ ыкIи пыдзафэхэр нахь макIэ шIыгъэнхэмкIэ тыкъэзыуцухьэрэ дунаим икъэухъумэн къыпкъырыкIырэ пшъэрылъхэр къыдалъытэщтых.
ХэхъоныгъэмкIэ зигугъу къэтшIыгъэ стратегиер пхырыщыгъэным пае федеральнэ ыкIи шъолъыр IэпыIэгъур къызы­фагъэфедэнэу мэгугъэх. Ежь предприя­тиери республикэ ыкIи федеральнэ мэ­хьанэ зиIэ организациехэм ахагъэ­хьагъ.
Адыгеим и ЛIышъхьэ къыхигъэщыгъ республикэм ихэхъоныгъэкIэ обществэу «Картонтарэм» мэхьанэшхо зэриIэр, промышленнэ предприятиехэм джыри нахь зягъэушъомбгъугъэнымкIэ, IофшIэпIэ чIыпIакIэхэр зэхэщэгъэнхэмкIэ ыкIи нэмыкI лъэныкъохэмкIэ пшъэрылъыбэ ащ зэшIуехы. Илъэсыбэ хъугъэу предприяттием шIушIэ IэпыIэгъу ареты общественнэ организациехэм, гъэсэны­гъэм, культурэм яучреждениехэм, Къэралыгъо ансамблэу «Налмэсым» ыкIи республикэм икъэралыгъо симфоническэ оркестрэ. КъумпIыл Мурат къызэрэхигъэщыгъэмкIэ, республикэм ифедэ хэлъ «Картонтарэм» зегъэушъомбгъугъэным ыкIи ащ фэдэ предприятиехэм IэпыIэгъу ятыгъэным тапэкIи анаIэ тырагъэтыщт.
«Хэгъэгум и Правительствэ, Урысыем промышленностымкIэ ыкIи сатыумкIэ и Министерствэ яIэпыIэгъу хэлъэу ищыкIэгъэ амалхэр тапэкIи бизнесым едгъэ­гъотыщтых ицыхьэ зытелъыжьэу, Iэрыфэгъоу тапэкIи хэхъоныгъэ ащ ышIыным пае», — къыхигъэщыгъ КъумпIыл Мурат.
ЗаводыкIэм икъызэIухынрэ «Картонтарэм» иилъэси 100-рэ афэгъэхьыгъэ мэфэкI зэхахьэр концерт гъэлъэ­гъуапIэу «Налмэсым» щыкIуагъ.
Адыгеим ипащэ игущыIэ къызэрэщыхигъэщыгъэмкIэ, Картонтарэр загъэпсыгъэр илъэс 60 зыщыхъурэ мафэм тефэу лъэхъаным диштэрэ завод къызэрэзэ­Iуахыгъэм къегъэлъагъо хъызмэтшIапIэм хэхъоныгъэ зэришIырэр, ылъэ пытэу тетэу неущырэ мафэм зэрэхахьэрэр.
«Картонтарэр — республикэр зыщыгушхукIэу Урысыем и Къыблэ зэрэпсаоу тхылъыпIэ промышленностым ылъэныкъокIэ апэрэхэм ахэт. Ар — къыдэгъэкIыжьын комплексышхоу социальнэ пшъэдэкIыжь зыхьырэ сатыоу щыт, мылъкур аужырэ шапхъэхэм атет технологиехэм ямызакъоу, ицIыфхэми, экологие ыкIи социальнэ программэхэми ахелъхьэ. IофышIэхэр шъогъасэх, шIушIэ IэпыIэгъу шъоты, зэлъашIэрэ тиансамблэу «Налмэсым» ыкIи симфоническэ оркестрэм апае шъушIэрэр бэ», — къыIуагъ КъумпIыл Мурат.
Анахьэу ЛIышъхьэм къыхигъэщыгъэр IэпыIэгъоу тидзэкIолIхэу къэралыгъор хэушъхьафыкIыгъэ дзэ операцием къыщызгъэгъунэхэрэм арагъэгъотырэр ары. Джащ фэдэу ащ къыкIигъэтхъыгъ Картонтарэри, компаниеу «СФТ Групп» зыфиIорэри республикэм цыхьэ афэп­шIынэу къызэрэдэлажьэхэрэр, экономи­кэмрэ шъолъырым щыпсэухэрэм ящыIэныгъэ нахьышIу шIыгъэнымрэ яIахьы­шхо къызэрэхалъхьэрэр.
«ПроизводствакIэм IофшIэпIэ чIыпIа­кIэхэр къытыщтых, Адыгеими, Къыблэм зэрэпсаоуи мы лъэныкъом хэхъонымкIэ амалыкIэхэр къаритыщтых. Тэ талъэныкъокIэ гугъэпIэшIухэр къэзытырэ проектхэу шъолъырым ипредприятие анахь шъхьаIэхэм яIэхэм сыд фэдэрэ лъэныкъокIи IэпыIэгъу тафэхъущт. ТапэкIи, къэралыгъом и Правительствэ, Урысыем къыдэгъэкIыжьынымрэ сатыумрэкIэ и Министерствэ тиIэпыIэгъухэу, Адыгеим ищыкIэгъэ пстэури щызэшIотхыщт бизнесым Iоф ышIэным, экономикэр гъэпытэгъэным апае», — къыкIигъэтхъыгъ ЛIышъхьэм.
ХъызмэтшIапIэм ипащэхэм, Iоф щызышIэхэрэм, иветеранхэм ЛIышъхьэм ирэзэныгъэ гущыIэхэр афигъэзагъэх джырэ уахътэм зытетым фэдэу предприятиер къэсыным пае якъарыу зэрэхалъхьагъэмкIэ. Анахьэу къахэщыгъэхэм республикэ пащэм рэзэныгъэ тхылъхэр аритыжьыгъэх. АгъэшIуагъэхэм ащыщых: пшъэдэкIыжь гъэнэфагъэ зыхьырэ обществэу «Картонтарэм» игъэцэкIэкIо пащэу Сергей Погодиныр, СФТ Пакеджинг Майкоп щэнымкIэ ипащэу Сергей Васькиныр, СФТ Пакеджинг Майкоп гофроагрегатыр щызыгъэIорышIэу Наталья Григорянц, пшъэдэкIыжь гъэнэфагъэ зыхьырэ обществэу «Картонтарэм» икоммерческэ пащэу Алексей Косенкэр, мы хъызмэтшIапIэм игъэцэкIэжьэкIо-механическэ цех ипащэу Игорь Морозовыр, Картонтарэм Iофы­шIэхэмкIэ ипащэу Янина Морозовар, инженер шъхьаIэу Сергей Романенкэр.
Медалэу «Адыгеим и Щытхъузехь» зыфиIорэр фагъэшъошагъ пшъэдэкIыжь гъэнэфагъэ зыхьырэ обществэу «СФТ Групп» зыфиIорэм ипащэхэм я Совет и Тхьаматэу Анатолий Штейнберг, званиеу «Адыгэ Республикэм икъыдэгъэ­кIыжьын изаслуженнэ IофышI» зыфиIорэр къылэжьыгъ пшъэдэкIыжь гъэнэфагъэ зыхьырэ обществэу «СФТ Групп» зыфи­Iорэм и Правление и Тхьаматэу Евгений Глезман.
Джащ фэдэу гущыIэ фабэхэр зимэфэкIхэм къафаIуагъэх УФ-м и Президент КъФШъ-мкIэ иполномочнэ лIыкIо игуа­дзэу Алексей Ермаковым, АР-м и Парламент и Тхьаматэу Владимир Нарожнэм, компаниеу «СФТ Групп» зыфиIорэм ипащэхэм ялIыкIохэм.
Республикэм итворческэ купхэм къа­тыгъэ концертым пчыхьэзэхахьэр зэфишIыжьыгъ.
АР-м ипресс-къулыкъу къытырэ къэбархэмкIэ
Тхьаркъохъо Сафыет.