ГандболымкIэ Урысые зэнэкъокъухэм яфинал ­едзыгъо къыдыхэлъытэгъэ яплIэнэрэ ешIэгъу мафэр непэ Адыгэ къэралыгъо университетым иордэунэу Кобл Якъубэ ыцIэ зыхьырэм щыра­гъэжьэщт.

Зыныбжь илъэс 14-м емыхъугъэ пшъашъэхэр ащ хэлажьэх. Командэ 12 хагъэунэфыкIырэ чIыпIэхэм афэбанэх. Адыгеир турнирым къыщагъэлъагъо спорт еджапIэу С.М. Джэнчатэм ыцIэ зыхьырэм зыщызыгъасэхэрэм. Тикомандэ купэу «Б-м» хэт.
Адыгеим игандболисткэхэм зэIукIэгъуищ яIагъ. Самарскэ хэкум ыкIи Краснодар якомандэхэм типшъашъэхэр атекIуагъэх, ау Москва илIыкIохэм ешIэгъур ашIуахьыгъ. Непэ тикомандэ мэ­хьанэшхо зиIэ зэIукIэгъу иIэщт, Волгоград къэзыгъэлъэгъорэ «Ди­намо-2-м» дешIэщт. Купэу «А-м» апэрэ чIыпIэр щиIыгъ Краснодар икомандэу «Академия ган­д­бола-1» зыфиIорэм. Купхэм язэ­нэкъэкъу тхьаумафэм аухыщт. Ащ ыуж командэхэр кIэух чIыпIэхэм афэбэнэщтых.
Командэхэр зыдэщыт чIыпIэхэр ыкIи очко пчъагъэу рагъэкъугъэр:
Купэу «А-р»:

1. «Краснодар-1» — 5.
2. «Ярославль» — 4.
3. «Астрахань-1» — 4.
4. «Самарскэ хэкур-1» — 3.
5. «Санкт-Петербург» — 2.
6. «Ростов-на-Дону» — 0.
   

Купэу «Б-р»:

1. «Волгоград-2» — 6.
2. «Москва» — 4.
3. «Мыекъуапэ» — 4.
4. «Самарскэ хэкур-2» — 2.
5. «Московскэ хэкур» — 2.
6. «Краснодар-2» — 0.