Физкультурэ-спорт Iофтхьабзэу «Iоф­шIэным ыкIи зыкъэухъумэжьыным сафэхьазыр» зыфиIорэр жъоныгъуа­кIэм и 26-м щегъэжьагъэу и 30-м нэс Адыгеим икъэлэ шъхьаIэ щыкIощт.

Ащ изэхэщакIор Мыекъуапэ физическэ культурэмкIэ ыкIи спортымкIэ и Комитет.
Зифизическэ ухьазырыныгъэ зыушэты зышIоигъохэр зэхэщакIохэм рагъэблагъэх. Ащ пае комплексым иофициальнэ сайтэу «www.gto.ru», джащ фэдэу «www.orgeo.ru» зыфиIохэрэм защышъутхын шъулъэкIыщт. Къэлэ спорткомитетым исоциальнэ хъытыухэм мыщ пылъ шапхъэхэр арыжъугъотэщтых. Дышъэ, тыжьын ыкIи джэрз бгъэхалъхьэхэр къышъуатынхэм пае шIокI имыIэу лъэныкъуи 4-мкIэ шапхъэхэр шъутынхэ фае. ЛъэгэпIэ инхэм шъуанэсыным пае шъор-шъорэу къыхэшъухыгъэ зы лъэныкъомкIэ е тIумкIэ те­дзэу зышъуушэтын фае.
Джырэ уахътэм ехъулIэу республикэм икъэлэ шъхьаIэ щыпсэурэ нэбгырэ 50 фэдизмэ Iоф­тхьабзэм хэлэжьэнхэу зарагъэтхыгъ. Зызыушэты ыкIи зипсауныгъэ зыгъэпытэ зышIоигъохэр стадионэу «Зэкъошныгъэм» къекIолIэнхэшъ, зэхэщакIохэм зарагъэтхын алъэкIыщт.