ДзюдомкIэ зэнэкъокъухэр Ростов хэкум икъалэу Новочеркасскэ щыкIуа­гъэх.

Адыгеим илIыкIохэм гъэхъэ­гъэшIухэр ашIыгъэх, медали 4 къахьыгъ. СССР-м спортымкIэ имастерэу Геннадий Недвигиным ишIэжь фэгъэхьыгъэ турнирыр я 25-у зэхащагъ.
Къэралыгъом ишъолъыр 25-мэ къарыкIыгъэ спортсменхэр ха­гъэунэфыкIырэ чIыпIэ 60-мэ афэбэнагъэх. Адыгеим икомандэ нэбгырэ 13 хэтыгъ, 4-мэ медальхэр къафагъэшъошагъэх. Хъулъфыгъэхэм язэнэкъокъу гъэхъэ­гъэшIу щызышIыгъэхэр Тэхъутэмыкъое районым испорт еджапIэ зыщызыгъасэхэрэр ары. ТекIоныгъэр къыдихыгъ Мэлыщ Ахьмэд, ящэнэрэ чIыпIэр къыхьыгъ Мышъ Казбек. Бзылъфыгъэхэр пштэмэ, Камилла Дзегаловар чемпионкэ хъугъэ, Татьяна Шаталовам ятIонэрэ чIыпIэр къыфагъэшъошагъ.
Зэнэкъокъум текIоныгъэр къы­щыдэзыхыгъэхэр Урысыем ичемпионат ифинал едзыгъо хэлэ­жьэнхэу фитыныгъэ къыдахыгъ. Ар бжыхьэм зэхащэщт.