ЖъоныгъуакIэм и 24-м рагъэкIокIыщт Урысые Iофтхьабзэу «Забег.рф» зыфиIорэм Мыекъуапэ илIыкIо­хэр хэлэжьэщтых. ЗэхэщакIохэм къызэраIуагъэмкIэ, шIои­гъоныгъэ зиIэ пстэуми мыщ зыщаушэтын алъэкIыщт.

Адыгэ Республикэм ыпкIэ зыхэмылъ билет 1000 къыратыгъ. Чъэныр зыгу рихьы­хэрэм япчъагъэ зэрэбэм къыхэкIэу билетхэр псынкIэу зэбгырахыгъэх.
Республикэм икъэлэ ­шъхьаIэ щыкIощт Iофтхьабзэр стадионэу «Зэкъошныгъэм» щызэхащэщт. Зэнэкъо­къум хэлажьэхэрэм якъызэ­дэчъэн мыщ щырагъэжьэщт ыкIи щаухыщт. Джащ фэдэу гъогум изы Iахь къэлэ гупчэ паркым пхырыкIыщт.
Мы мафэм пчэдыжьым сыхьатыр 9-м полумара­фоным зыщызыушэтыхэрэм (гъогум икIыхьагъэ метрэ 21100-рэ мэхъу), джащ фэдэу метрэ 5000 ыкIи 10000 зэрылъхэр, ащ ыуж сыхьатыр 11-м метрэ 1000 зикIыхьагъэр къачъыщтых. Лъэныкъо пэпчъ анахь дэгъуищ къыщыхагъэщыщт, ахэм щытхъу тхылъхэр ыкIи медальхэр афагъэшъошэщтых. Iофтхьабзэм дэгъоу зыкъыщызгъэлъэгъуагъэхэм зэкIэми шIу­хьафтынхэр афашIыщтых.