Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм ипэгъокIэу духовой оркестрэхэм яя IV-рэ шъолъыр фестивалэу «ТекIоныгъэм игимн» зыфиIорэр Мыекъуапэ искусствэхэмкIэ кIэлэцIыкIу еджапIэу N 6-м щызэхащагъ.

АР-м культурэмкIэ и Министерствэ Iофтхьабзэм кIэщакIо фэхъугъ. Урысыем ичIыпIэ зэфэшъхьафхэм къарыкIыгъэ творческэ купхэр ащ хэлэжьагъэх.
— Хэгъэгу зэошхом ТекIоныгъэ къызщыдахыгъэм ия 80-рэ илъэс фэгъэхьыгъэ фестивалым къе­кIолIагъэхэм шIу­фэс фабэ шъо­сэхы. Мыщ мэхьанэу иIэр лIэужыкIэм зыщигъэгъупшэ хъущтэп. ТилIыхъужъхэм тарэгушхо ыкIи яшIэжь тэгъэлъапIэ, тятэжъ пIашъэ­хэм зэрахьэгъэ лIыгъэм шъхьащэ фэтэшIы. Хэгъэгум иухъумакIохэм яшIэжь непэ мэкъамэхэмкIэ къидгъэлъэгъу­кIыщт, — къыIуагъ пэублэм АР-м культурэмкIэ иминистрэу Аулъэ Юрэ.
Хэгъэгу зэошхом фэгъэхьыгъэ музыкальнэ произведениехэр зэлъягъэшIэгъэнхэр, къыткIэхъухьэрэ ныбжьыкIэхэм яхэгъэгу шIу алъэгъоу пIугъэнхэр Iоф­тхьабзэм ипшъэрылъ шъхьаIэх.
— Я IV-рэ шъолъыр фестивалэу «ТекIоныгъэм игимн» зыфиIорэм хэлажьэхэрэм япчъагъэ илъэс къэс нахьыбэ мэхъу. НыбжьыкIэхэм тарихъыр нахьышIоу ашIэным фэшI мыщ фэдэ зэIукIэгъухэр илъэс къэс зэхэтэщэх. Фестивалым ипроект къыдыхэ­лъытагъэу, духовой оркестрэ 12-мэ лауреатыцIэр афэдгъэшъошагъ, дипломхэр яттыжьыгъэх, — къыIуагъ АР-м культурэмкIэ иминистрэ игуа­дзэу Шэуджэн Бэлэ.
Дзэ мэкъамэхэм пIуныгъэ мэхьанэшхо яI, щыIэныгъэм, шIушIагъэм, лIы­хъужъныгъэм яфэмэ-бжьымэхэр апхырыщыгъ.
ШIэжьым фэгъэхьыгъэ мэкъамэхэр творческэ купмэ къырагъэIуагъ, ахэр къекIолIагъэхэм агу нэсыгъ.
Лъэпшъыкъо Фатим.
Сурэтыр: Iэшъынэ Аслъан.