Мы къэбарым Мыекъуапи, республикэм ичIыпIэ зэфэшъхьафхэми ащыпсэухэрэр зежэхэрэр бэшIагъэ. Мыекъопэ зыгъэпсэфыпIэ шъхьаIэм ибассейн ишIынкIэ апэрэ уцугъор аублагъ.

Ащ фэгъэхьыгъэ къэбарыр АР-м и ЛIышъхьэ исоциальнэ нэкIубгъохэм къа­рыхьагъ. БассейнычIэр зэрэгъэчъыгъэр раутынэу аублагъ, егъэзыхыгъохэр гъэпы­тэгъэнхэм ыкIи IофшIэнхэр щынэгъончъэу зэшIуахынхэм апае пкъэу 600-м нахьыбэ ахатIэщт.
«КъыкIэзгъэтхъынэу сыфай, гъэкIэжьы­нышхохэм мыр яапэрэ уцугъу. ЗэкIэхэмкIи мэхьанэшхо зэттырэ проект къиным ыкIи иным икIэух чэ­зыу-чэзыоу тыфэкIощт. Мы зэпстэури зэшIотхыным иамал къытэзытыгъэр Урысыем и Правительствэ иIэпыIэгъу ыкIи федеральнэ мылъку къэлэ бассейным игъэкIэжьын тегъэ­псыхьагъэу къызэратIупщыгъэр ары.
КъыдгурэIо мы чIыпIэм гъэмэфэ жъоркъ лъэхъаным Мыекъуапэ щыпсэухэрэми, ащ ихьакIэхэми сыдигъокIи зыщагъэпсэфыныр зэрякIэсагъэр. Джащ пае бассейныр зэтедгъэуцожьын къодыеу щымытэу, лъэхъаным диштэрэ зыгъэпсэфыпIэу къалэм щыпсэухэрэми, зекIо къэкIуагъэхэми кIуапIэ афэхъущтыр зэтедгъэпсы­хьащт. ДгъэкIэжьыгъэ нэпкъыр, Мэз­дахэ щыдгъэпсырэ паркыр ыкIи джы тыздэлажьэрэр зэхэтхэу унэгъо зыгъэ­псэфыным тегъэпсыхьэгъэ чIыпIэ зыкI хьалэмэт зэхэтэу хъущт», — къащитхыгъ КъумпIыл Мурат социальнэ хъы­тыухэм.