«Урысыер – Ислъам дунаир» зыфиIорэ Iофтхьабзэм Адыгеим икIыгъэ лIыкIо купыр хэлажьэ.

Татарстан икъэлэ шъхьаIэ я ХVI-рэ Дунэе экономическэ форумэу «Урысыер – Ислъам дунаир:KazanForum» зыфиIорэр мы мафэхэм щэкIо.
Урысыер быслъымэн къэралыгъохэм зэрадэлажьэрэр, ислъам финансхэр, Хьалал лъэныкъор, къыдэгъэкIыжьыныр, сатыур, инвестициехэр, шIыкIэ-амалхэр, гъэсэныгъэр, культурэр, спортыр ыкIи зекIоныр къыдыхэлъытагъэхэу, ащ иIоф­шIэн къыхеубытэ.

Тыгъуасэ форумым щыкIуагъ «Урысыер – Ислъам дунаир» зыфиIорэ Iоф­тхьабзэр. Ащ хэлэжьагъэх Адыгеим иминистрэхэм я Кабинет и Тхьаматэ игуадзэу ЛIыхэсэ Махьмудрэ респуб­ликэм экономикэ хэхъоныгъэмрэ сатыумрэкIэ иминистрэу Шэуджэн Зауррэ. Джащ фэдэу тишъолъыр илIыкIо куп нэмыкI Iофтхьабзэхэу форумым къыдыхэлъытагъэхэм ахэлажьэ.
АР-м и Правительствэ къызэритырэмкIэ, экономикэм хэхъоныгъэ егъэшIыгъэнымкIэ УФ-м и Президентэу Владимир Путиным къыгъэуцурэ пшъэ­рылъхэр гъэцэкIэгъэнхэм пае Адыгеим ихэбзэ къулыкъухэм аужырэ шапхъэхэм адиштэрэ IофшIэгъакIэу щыIэхэм язэгъэ­шIэнрэ япхырыщынрэ, шъолъырым иинвестиционнэ амалхэм ахэгъэхъогъэ­ным мэхьанэшхо араты. Мы пшъэрылъхэр иIэу республикэр стратегическэ гухэлъхэмкIэ Агентствэм дэлажьэ. Iоф­шIэным изэфэхьысыжьхэр къыщэлъа­гъох инвестициехэу шъолъырым къыхалъхьэ­хэрэм зэрахахъорэм. Ащ изышыхьат икIыгъэ илъэсым инвестициехэм язытеткIэ Адыгеир шъолъыр анахь дэгъу 15-мэ зэрахэхьагъэр. Лъэпкъ рейтингым ащ я 14-рэ чIыпIэр щиубытыгъ.

Джащ фэдэу «Урысыер — Ислъам дунаир:KazanForum» зыфиIорэ форумым икультурнэ Iофтхьабзэхэм ахэлажьэ тикъэшъокIо купэу «Налмэсыр». Форумым икъызэIухын фэгъэхьыгъэ мэфэкI къэгъэлъэгъоным ащ къэшъуитIу къыщишIыгъ: «ЗекIо» ыкIи «Анатолием щыпсэурэ адыгэхэм якъашъу» зыфи­Iохэрэр. КъэбарлъыгъэIэс амалхэм алъэныкъокIэ республикэм икIыгъэр республикэ гъэзетэу «Советскэ Адыгеим» иредактор шъхьаIэу Цундышк Зар.