Урысые Федерацием ишъолъырхэр 2024-рэ илъэс бюджетыр зэрагъэфедагъэр къызэрагъэлъэгъуагъэмкIэ УФ-м финансхэмкIэ и Министерствэ зэригъэпшагъэх. Ащ ипшъэрылъкIэ рейтингыр научнэ-ушэтыпIэ финанс институтым зэхищэгъагъ.
Адыгеим, ыпэкIэ фэдэу, джыри бюджетыр зыдэкIуагъэр шъхьэихы­гъэу къызэригъэлъагъорэр къыушыхьатыжьыгъ. Къыблэ Федеральнэ шъолъы­рым исубъектхэм азыфагу респуб­ликэм я 3-рэ чIыпIэр щиубытыгъ. Лъэныкъо зэфэшъхьафэу зэнэкъо­къум иIагъэ пэпчъ ащ балл инхэр къыщихьыгъэх.
— БлэкIыгъэ илъэсхэм афэдэу, бюджетыр зыфэдэр, ар зыпэIухьэрэр цIыфэу республикэм исхэми, къэбар жъугъэм иамалхэми зэрагъэлъэгъун, зэрагъэшIэн амал яI. Адыгэ Респуб­ликэм ис пэпчъ бюджет процессым къыхэлэжьэшъунымкIэ ар шIокI зимыIэ Iофэу щыт. Тиинтернет нэкIубгъо «Бюджет для граждан» зыфиIорэ едзыгъо ит. Ар зэIухыгъэ зэпыт, шIоигъоныгъэ зиIэ пстэумэ финанс тхылъ шъхьаIэм нэIуасэ зыфашIын, нэмыкIэу бюджетым епхыгъэ къэбархэм защагъэгъозэн алъэкIыщт, — къыщаIуагъ АР-м финансхэмкIэ и Министерствэ.
Рейтингым пшъэрылъ шъхьаIэу иIэр шъолъырхэм ябюджет зэрагъэпсырэр, ар зэрагъэфедэрэр, хахъоу яIэхэр, щыкIагъэхэр цIыфхэм зэралъагъэIэсыхэрэр зэгъэшIэгъэныр ары.