АР-м иминистрэхэм я Кабинет щыкIогъэ зэIукIэм зыщатегущыIэгъэхэ Iофыгъо шъхьаIэхэм ащыщыгъ лъэпкъ проектхэмрэ къэралыгъо программэхэмрэ атегъэпсыхьагъэу 2025-рэ илъэсым псэуалъэхэр шIыгъэнхэмкIэ, зэтегъэпсыхьэгъэнхэмкIэ, гъэцэкIэжьыгъэнхэмкIэ Iоф­тхьабзэхэр зэшIохыгъэ зэрэ­хъущтхэр. АР-м и ЛIышъхьэу Къум­пIыл Мурат а Iофтхьабзэм тхьамэтагъор щызэри­хьагъ.

АР-м иминистрэхэм я Кабинет и Тхьаматэу КIэрэщэ Анзаур къызэри­IуагъэмкIэ, лъэпкъ проектхэмрэ къэ­ралыгъо программэхэмрэ къыдалъытэ- рэ Iофтхьабзэхэм язэшIохын 2025-рэ илъэсым сомэ миллиард 14 фэдиз республикэм щыпэIуагъэхьанэу щыт. Ащ щыщэу сомэ миллиарди 9,6-р федеральнэ бюджетым къыхэкIыщт. НепэкIэ сомэ миллиарди 4,8-рэ, нэмыкIэу къэпIон хъумэ, процент 34-р агъэфедэгъах. Къыб­лэ федеральнэ шъолъырыр пштэмэ, а лъэныкъомкIэ Адыгеир я 2-рэ чIыпIэм щыт. Котрактациер – сомэ миллиарди 10,4-рэ, нэмыкIэу къэпIон хъумэ, процент 75-рэ мэхъу.
2025-рэ илъэсым республикэм щылъа­гъэкIотэщтых псэолъэшIын, гъэцэкIэ­жьын IофшIэнхэр, джащ фэдэу хъытыухэм тех­нологическэ Iофтхьабзэхэр ащызэшIохыгъэнхэмкIэ Iофыгъо гъэнэфагъэхэри зэшIуахыщтых. Зэхэубытагъэу псэолъэ 77-мэ япхыгъэ IофшIэнхэр макIох, псэолъэ 20-р 2024-рэ илъэсым ашIынэу рагъэжьэгъагъэхэм ащыщых, IофшIэнхэр псэолъэ 57-мэ ащаублагъэх.
Федеральнэ къэкIуапIэхэм къахагъэ­кIызэ, IофшIэнхэр непэкIэ псэолъи 9-мэ ащагъэцэкIэгъахэх: псауныгъэм икъэухъу­мэнкIэ АР-м икъэралыгъо бюджет учреж­дениеу «Мыекъопэ къэлэ поликлиникэм» икъутамэ агъэцэкIэжьыгъ, псэупIэу Яб­лоновскэм щагъэпсыгъ гурыт еджапIэу нэбгырэ 1100-м телъытагъэр, псэупIэу Красногвардейскэм дэт кIэлэцIыкIу-ныбжьыкIэ спорт еджапIэм испортзал игъэ­кIотыгъэ гъэцэкIэжьынхэр рашIылIагъэх, псэупIэу Красногвардейскэм псырыкIуа­пIэ щагъэпсыгъ, коммунальнэ ыкIи инженер инфраструктурэр гъэкIэжьыгъэ­ным IэпыIэгъу етыгъэным къыдыхэлъытагъэу «Майкопводоканал» зыфиIорэм иукъэбзалъэхэр агъэкIэжьыгъэх, промышленнэ паркэу «Инэм» предприниматель IофшIэныр щызэшIохыгъэным фэгъэхьыгъэ Iофтхьабзэхэр щызэрахьагъэх, псэупIэу Джаджэм къыпэблагъэу псы­рыкIопIи 2 агъэ­псыгъ.
Джащ фэдэу зэIукIэм щахэплъагъэх псауныгъэм икъэухъумэн, гъэ­сэныгъэм, зекIоным, культурэм, спортым, инфраструктурэм ыкIи нэмыкIхэм япхыгъэ псэ­­­уалъэхэмкIэ IофшIэнхэр зэрэкIохэрэмкIэ Iофыгъохэм.
Республикэм и ЛIышъ­хьэ ядэIугъ чIыпIэхэм япащэхэм, псэолъэшI организациехэм ялIыкIохэм ыкIи министрэхэм къа­Iуагъэхэм, ащ дакIоу IофшIэнхэмкIэ гра­фикым дэмы­хынхэм, зэтегъэпсыхьан IофшIэнхэр ыкIэм нэгъэ­сыгъэнхэм, Iэмэ-псымэу ящыкIагъэр къащэфын амал ятыгъэным ыкIи нэмыкIхэм атегущыIа­гъэх.
«Лъэпкъ проектхэмрэ къэралыгъо программэхэмрэ яшIуагъэкIэ респуб­ликэм амал иIэ хъугъэ зигъо Iофыгъо зэфэшъхьафыбэ зэшIуихынэу, социальнэ мэхьанэ зиIэ лъэныкъохэм мылъкумкIэ яIофхэм язытет нахьышIу шIыгъэнэу, цIыфхэр зыщыпсэухэрэ чIыпIэр гуIэтыпIэ афэхъунымкIэ ящыкIагъэхэр ягъэгъо­тыгъэнхэу. Федеральнэ IэпыIэгъур лъэныкъо пстэури къыдалъытэзэ, Iофтхьабзэхэу зэшIуахыхэрэм нахь федэ ин къахьыным тегъэпсыхьагъэу агъэфедэн фае. На­хьышIум ылъэныкъокIэ зэхъокIыныгъэхэр цIыфхэм зэхашIэн, япсэупIэхэр зэтегъэ­псыхьагъэ зэрэхъухэрэри алъэгъун фае», — къыIуагъ АР-м и ЛIышъхьэ.
Ащ нэмыкIэу зэIукIэм зыщатегущыIагъэхэм ащыщых еджапIэхэмрэ кIэлэцIыкIухэр зыщаIыгъхэ учреждениехэмрэ игъэкIотыгъэу гъэцэкIэжьыгъэнхэм яп­хыгъэ Iофыгъохэр. Урысыем и Президент кIэщакIо зыфэхъугъэ программэхэм адиштэу Адыгеим иеджэпIи 9-мэ ыкIи икIэлэцIыкIу IыгъыпIи 2-мэ игъэкIотыгъэ гъэцэкIэжьынхэр ащэкIох. Республикэм ипащэ къызэрэхигъэщыгъэмкIэ, зэхэубытагъэу гъэкIэжьын IофшIэнхэр кIонхэ, псэолъэшIыным дакIоу ящыкIэгъэ мебелыр, Iэмэ-псымэхэр къащэфынхэ, классхэр зэтырагъэпсыхьанхэ, гъэсэныгъэм иучреждениехэм къапэIулъ чIыпIэхэр нахь гуIэтыпIэ, нахь дахэ ашIынхэ фае.
ЧIыпIэхэм зэращагъэфедэхэрэр
Адыгэ Республикэм иминистрэхэм я Кабинет чIыпIэ бюджетхэр зэрагъэфедэхэрэм, ахэм яхахъо нахьыбэ хъунымкIэ къэкIуапIэу щыIэхэм джащ фэдэу щатегущыIагъэх.
АР-м иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр чIыпIэ бюджетхэм хахъоу яIэр къыIотагъ. Ащ зэрэхигъэунэфыкIыгъэмкIэ, блэкIыгъэ илъэсхэм ягъэпшагъэмэ, мы аужырэ илъэси 3-м Адыгэ Республикэм ичIыпIэ бюджетхэр гурытымкIэ проценти 119,3-кIэ агъэцэкIагъэх.
Мы аужырэ илъэси 3-м чIыпIэ пстэуми язэхэугъоегъэ бюджетхэм хахъоу яIагъэм зыкъиIэтыгъ. Мы лъэныкъомкIэ зиIофхэр нахь дэгъоу зэпыфагъэхэр Адыгэкъал (проценти 123,5-рэ), Мыекъуа­пэ (121,7-рэ), Мыекъопэ районыр (проценти 123,5-рэ), Теуцожь районыр (проценти 122,2-рэ).
Джащ фэдэу сатыушIыпIэхэу ямуниципальнэ образование итхэм яспискэ муниципалитетхэм зэхагъэуцон ыкIи зекIохэм хэбзэIахьэу аIахыщтыр гъэнэфэгъэным пае республикэм икъалэхэмрэ ирайонхэмрэ арыт хьакIэщхэм яхьылIэгъэ къэбархэр реестрэм рагъэхьанхэ зэрэфаер, 2025-рэ илъэсым щылэ мазэм и 1-м къыщегъэжьагъэу зекIохэм ащ фэдэ хэбзэIахь зэратырэр зэхэсыгъом къыщаIуагъ.

АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыетрэ
ЛIышэ Саныетрэ.