ГандболымкIэ Урысыем и Суперлигэ хэт «АГУ-Адыифыр» Москва щыIукIагъ чIыпIэ командэу «Лучым».

«Луч» — «АГУ-Адыиф» — 29:29 (17:18)
Командэхэм зэнэкъокъум чIыпIэу щаубытыщтыр мы ешIэгъум изэфэхьысыжь зыкIи зэблихъ­угъэп. Мыекъуапэ игандболисткэхэм я 10-рэ чIыпIэр къыдахыгъ, «Лучыр» я 9-рэ хъугъэ. Ау типшъашъэхэр текIоныгъэр къыдахыным фэбэнагъэх, сыда пIомэ мы илъэс ешIэгъум командэхэм зэдыряIэгъэ зэIукIэгъухэр зэкIэ Москва илIыкIохэм ахьыгъэх. Апэрэ таймым тигандболисткэхэм а пшъэрылъыр дэгъоу агъэцэкIагъ, зэкIэлъыкIоу Iэгоуи 6 къэлапчъэм дадзагъ, зэпымыоу ыпэкIэ илъыщтыгъэх, зыухъумэжьынри дэгъоу агъэцакIэщтыгъ. Ащ ишIуагъэкIэ апэрэ кIэлъэныкъор 19:18-у къахьыгъ. ЯтIонэрэ таймым ыгузэгум ти­пшъашъэхэр Iэгоуи 4-кIэ ыпэ ишъыгъэх, ау аужырэ такъикъи 10-м бысымхэр нахь лъэшэу джэгугъэх. Такъикъи 7 къэнагъэу 28:25-у тикомандэ текIоныгъэр къыдихыщтыгъ, ау нэужым «Лу­чым» иешIакIэ ригъэхъугъ, пчъа­гъэр 29:28-рэ ышIыгъ. Ау Ирина Бондаренкэм къэлапчъэм Iэгуаор дидзагъ ыкIи пчъагъэр зэфэдизэу зэIукIэгъур аухыгъ.
«Лучым» щешIагъэх: къэлэпчъэIутхэр — Чипула, Целуйко. Закордонскаяр — 8, Селиверстовар — 7, Рожковар — 6, Зюринар — 3, Суховар — 1, Коняевар — 1, Крупенниковар — 1, Коробко — 1, Гульцевар — 1.
«АГУ-Адыифым» хэтыгъэх: къэлэпчъэIутхэр — Гобадзе, Баскаковар. Селиверстовар — 6, Бондаренкэр — 5, Хавронинар — 4, Алексеевар — 4, Краснокутскаяр — 3, Смирновар – 2, Коблыр — 2, Коваленкэр — 1, Кавера — 1, Болоба — 1.
«АГУ-Адыифым» зы ешIэгъу къыфэнагъ, жъоныгъуакIэм и 27-м Мыекъуапэ къеблэгъэщт Ижевскэ икомандэу «Университетыр».
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Луч» — 24.
2. «АГУ-Адыиф» — 12.
3. «Университет» — 1.