Медалищ къахьыгъ
ДзюдомкIэ Европэм и Кубок икъыдэхын фэгъэхьыгъэ зэнэкъокъухэр жъоныгъуакIэм и 10 — 11-м Грузием ит къалэу Гори щыкIуагъэх. Урысыем ихэшыпыкIыгъэ командэ хэтыгъэхэ Адыгэ Республикэм илIыкIохэм гъэхъэгъэшIухэр ашIыгъэх, хагъэунэфыкIырэ чIыпIищ къахьыгъ.
Килограмм 60-м нэс къэзыщэчыхэрэм якуп щыбэнэгъэ Мерэм Дамир текIоныгъэр къыдихыгъ. Джэрз медальхэр къафагъэшъошагъэх Еутых Рэмэзанрэ Датхъужъ Алыйрэ. Къэралыгъо 15-мэ яспортсмен 200 фэдиз турнирым хэлэжьагъ. Урысыем ихэшыпыкIыгъэ командэ нэбгыри 9-мэ къагъэлъэгъуагъ, ахэм ащыщэу 3-р Адыгеим илIыкIох.
Финалым Мерэм Дамир Азербайджан идзюдоистэу, Европэм икадетскэ чемпионат джэрз медаль къыщызыхьыгъэ Бабарахим Мирзаевым щытекIуагъ.
— Дунэе мэхьанэ зиIэ зэнэкъокъу иным аужэу 2021-рэ илъэсым сыхэлэжьагъ, ар Баку щыкIогъэ «Большой шлем» зыфиIорэр ары, — къеIуатэ Мерэм Дамир. — Дышъэ медалэу къэсхьыгъэм къеушыхьаты мы уахътэм къыкIоцI ухьазырыныгъэу сIэкIэлъым хэзгъэхъон зэрэслъэкIыгъэр. Грузием сыкIонэу къызысаIом, гъэхъагъэ сшIыным зыфытезгъэпсыхьагъ ыкIи исхъухьагъэр къыздэхъуным амалэу сиIэр зэкIэ есхьылIагъ. Апэу сызэбэныгъэр грузинэу Бачошвили, мыщ сызэрэтекIощтым сицыхьэ телъыгъ. Джащ фэдэу азербайджанцэу Алиевым псынкIэу къышIосхьыгъ. Финалым сыщыIукIагъ Азербайджан къэзыгъэлъэгъорэ Мирзаевым, ащи сытекIуагъ, текIоныгъэр къыдэсхыгъ. Европэм и Кубок икъыдэхын фэгъэхьыгъэ зэнэкъокъум дышъэ медаль къызэрэщысхьыгъэм сэркIэ мэхьанэшхо иI, Урысыем ичемпионатэу къэблагъэрэм гъэхъэгъэшIухэр щысшIынхэм ащ сыфещэ. Дунэе мэхьанэ зиIэ турнирхэм тапэкIи сахэлэжьэным пае мыщ хагъэунэфыкIырэ чIыпIэ къыщыдэсхын, къэралыгъом ихэшыпыкIыгъэ командэ сыхэхьан фае.