БоксымкIэ Урысыем ипервенствэ хэлэжьэгъэ Адыгеим испортсменкэу София Максюта тыжьын медаль къыфагъэшъошагъ. Iофтхьабзэр Московскэ хэкум щыкIуагъ, илъэс 17 – 18 зыныбжь кIалэхэм ыкIи пшъашъэхэм зыщаушэтыгъ.

Урысыем ишъолъыр зэфэшъхьафхэм къарыкIыгъэ нэбгырэ 497-рэ зэнэкъокъугъэх, ахэм ащыщэу 313-р — кIалэх, 184-р — пшъашъэх. Адыгэ Республикэм изаслуженнэ тренерэу Григорий Бегларян ыгъэ­сэрэ София Максюта килограмм 50-м нэс къэзыщэчыхэрэм якуп хэтыгъ. ПэшIорыгъэшъ зэIукIэгъухэр Краснодар краим, Челябинскэ хэкум, Москва ялIыкIохэм къашIуихьыгъ. Ау финалым Свердловскэ хэкум испортсменкэ 3:2-у къытекIуагъ. Ар зэнэкъокъум пчъагъэрэ ичемпионкэу Снежана Кузнецовар ары.