Федеральнэ программэу «Къэралыгъо лъэпкъ политикэм игъэцэкIэн» зыфиIорэм Адыгэ Республикэр хэлажьэ.

Ащ къыдыхэлъытагъэу адыгэ ыкIи урыс культурэхэм ямафэхэр шъолъырым имуниципальнэ псэупIэхэм ащэкIох. Ащ кIэщакIо фэхъугъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет.
Республикэм щыпсэурэ ­лъэпкъ зэфэшъхьафхэм яшэн-хабзэхэр къэухъумэгъэнхэмкIэ Адыгеим Iофышхо щагъэцакIэ. Адыгэ ыкIи урыс культурэхэм якъэгъэлъэгъон республикэм ичIыпIэ зэ­фэшъхьафхэм жъугъэу ащызэхащэ.
— Илъэс къэс адыгэ ыкIи урыс культурэхэм ямафэхэр рес­публикэм щыхэтэгъэунэфыкIых. Федеральнэ гупчэм ащ пэIухьащт мылъкур къызэрэтфи­тIупщырэм ишIуагъэкIэ ащ нахь зядгъэушъомбгъун амал щыIэ хъугъэ ыкIи Мыекъуапэ имыза­къоу, къоджэ псэупIэхэми гъэ­рекIуи мыгъи ащызэхэтщагъэх. А шIыкIэр бэмэ агу рихьыгъ, сыда пIомэ зэкIэ цIыфхэр район гупчэхэм кIонхэ амал яIэп, ау мэфэкI Iофтхьабзэхэм яплъы­хэ ашIоигъу. Ахэр зыщызэхэт­щэщт чIыпIэхэр джы щыIэх, къэ­ралыгъо программэхэм яшIуа­гъэкIэ республикэм икъо­джэ псэупIэхэм адэт культурэм иунэхэр зэтырагъэпсыхьагъэх. Зэфэхьысжьхэм ягугъу къэтшIы­мэ, мыгъэрэ Iофтхьабзэхэм цIыфыбэ ахэлэжьагъ, ары гухэлъэу тиIагъэри — ныбжьыкIэхэр лъэпкъ культурэм, тарихъым ащыдгъэгъозэнхэр. Къыддэхъугъэхэри, тапэкIи тыздэлэжьэщт лъэныкъохэри къэнэфагъэх, — хигъэунэфыкIыгъ Комитетым иIофышIэу Нэхэе Саидэ.
Мыщ фэгъэхьыгъэ Iофтхьабзэр мэлылъфэгъум Шэуджэн районым щыкIуагъ. А мафэм къуа­джэу Хьатыгъужъыкъуае адыгэ­мэ ятарихъ, яшэн-хабзэхэр зы­гъэлъапIэхэрэм ягупчэ хъугъагъ.
Зэхахьэм къыщыгущыIагъэх Шэуджэн район администрацием ипащэу Аулъэ Рэщыд, Шэуджэн районым инароднэ депутатхэм я Совет итхьаматэу Мэрэтыкъо Аслъан. Адыгэ ыкIи урыс культу­рэхэм лIэужыкIэр нэIуасэ афэзышIырэ Iофтхьабзэхэм мэхьанэшхо зэряIэр ахэм хагъэунэфыкIыгъ.
ЗэхэщакIохэм игъэкIотыгъэ программэ къагъэхьазырыгъагъ, ащ хэтыгъэх Хьакъунэ Эльзэ, ЛIынэ Заремэ, Хьасанэкъо Хьамед ыкIи Дэргушъэо Маринэ яинтерактивнэ мастер-классхэр. Ащ дакIоу хьакIэхэм адыгэ гъо­мылапхъэмэ ахэIэнхэ, яIэшIугъэ аушэтын алъэкIыгъ. Ижъырэ адыгэ мэкъамэхэр ыгъэжъынчыгъэх чIыпIэ фольклорнэ ансамблэу «ДжэгуакIом». Ащ ыуж концертым хэлэжьагъэх Шэуджэн районым иартистхэмрэ Кощ­хьэ­блэ районым къикIыгъэ твор­ческэ купхэу «Мэкъамэмрэ» «Бэ­рэчэт Босынымрэ». КIэухым Мамхыгъэ дэт культурэм и Унэ илъэпкъ театрэу «Мэрджанэм» ыгъэуцугъэ спектаклэу «Джаущтэу орэхъу» зыфиIорэр къа­гъэлъэгъуагъ.
Мэлылъфэгъум Джэджэ райо­ным ит поселкэу Новэм адыгэ культурэм и Мафэ фэгъэхьыгъэ Iофтхьабзэ щырагъэкIокIыгъ. Программэм хэтыгъэх тематиче­скэ концертхэр, къэгъэлъэгъон­хэр, флешмобхэр ыкIи нэ­мыкIхэр.
Джэджэ районым инароднэ депутатхэм я Совет итхьаматэу Татьяна Черковам зэхахьэр къы­зэIуихыгъ.
МэфэкI концертыр рамыгъа­жьэзэ, къэгъэлъэгъонэу къызэIуа­хыгъэм къэзэрэугъоигъэхэр еплъынхэ амал яIагъ. Лъэпкъ гъо­мылапхъэхэр, нысхъапэхэр, пхъэм хэшIыкIыгъэ пкъыгъохэр ащ къырахьылIагъэх. Ащ нэмыкIэу адыгэ къуаем хэшIыкIыгъэ шхыныгъо зэфэшъхьафхэм яIэшIугъэ ауплъэкIун алъэкIыгъ. Пэлъкъаур, хьалыжъор, гуубатыр, къурамбыир, къэб гъэжъагъэр мыщ къырахьылIагъэх.
Творческэ куп зэфэшъхьафхэр зыхэлэжьэгъэхэ мэфэкI Iофтхьабзэр къутырым дэт культурэм и Унэ щыкIуагъ.
Джащ фэдэу Теуцожь районым ит къуаджэу Лъэустэнхьаблэ адыгэ культурэм и Мафэ, Красногвардейскэ районым ит къуаджэу Улапэ урыс культурэм и Мафэ ащыхагъэу­нэфыкIыгъэх.