Щэбзэ щэрыонымкIэ Къыблэ ыкIи Темыр-Кавказ федеральнэ шъолъырхэм япервенствэ мэлылъфэгъум и 18-м щегъэжьагъэу и 22-м нэс къалэу Таганрог щыкIуагъ.

Адыгеим испортсменхэр мыщ хэлэжьагъэх ыкIи гъэхъэгъэшIу­хэр щашIыгъэх, унэе зэнэкъо­къухэм медали 4, команднэ пер­венствэм хагъэунэфыкIырэ чIыпIитIу къащахьыгъ.
Адыгеим, Волгоградскэ ыкIи Ростовскэ хэкухэм, Донецкэ Народнэ Республикэм, Къэбэртэе-Бэлъкъарым, Краснодар краим, Севастополь яспортсмени 100-м ехъумэ заушэтыгъ.
Тиреспубликэ Iофтхьабзэм къыщагъэлъэгъуагъ олимпийскэ резервым испорт еджапIэу В. С. Максимовым ыцIэ зыхьырэм зы­щызыгъасэхэрэм. Унэе зэнэкъо­къухэм дышъэ медальхэр къащахьыгъэх Иван Лемешевымрэ Мыгу Батырбыйрэ. Софья Фирсановам ятIонэрэ чIыпIэр къыдихыгъ, Алиса Кожевниковар ящэнэрэ хъугъэ. Команднэ первенствэм текIоныгъэр къыщыда­хыгъ (аныбжь елъытыгъэу) Иван Лемешевымрэ Софья Фирсановамрэ, Мыгу Батырбыйрэ Алиса Кожевниковамрэ.

Ахэр зыгъасэхэрэр спортымкIэ мастерэу Александр Ба­ламутовымрэ спортымкIэ заслуженнэ мастерэу Светлана Баранцевамрэ.