Къэралыгъо программэ зэфэшъхьафхэм яшIуагъэкIэ мэкъу-мэщым зыфэзыгъазэхэрэм япчъагъэ мы аужырэ илъэсхэм зэхапшIэу хэхъуагъ.

Шэуджэн районымкIэ къуаджэу Мам­хыгъэ щыщ Боджэкъо Азэмат ятэ илъэ­уж теуцуагъэу, ар ищысэтехыпIэу 2018-рэ илъэсым къыщегъэжьагъэу чIыгулэжьыным зыфигъэзагъ. Непэрэ мафэм фермер ныбжьыкIэм гъэхъэгъэ­шIухэр ешIых, илъэс къэс лэжьыгъэ бэгъуагъэ къехьыжьы.
Непэ Азэмат зэкIэмкIи гектар 465-рэ елэжьы. Мы илъэсым бжыхьэсэ коцым гектар 260-рэ ригъэубытыгъ. ТигущыIэгъу къызэриIуагъэмкIэ, зэрифэшъуашэу кIымафэр рахыгъ, игъом минеральнэ чIыгъэшIухэр тIогъогогъо тыритэкъуагъ. Тэ тызэкIом, уцыжъхэр зыгъэкIодырэ щэнаутыр лэжьыгъэм тыраутхэнэу загъэхьазырыщтыгъ.
— Мэфэ ошIухэр къызфэдгъэфедэхэзэ губгъо IофшIэнхэр тэгъэцакIэх. Ощх-ос зэхэлъым тыкъызэтыригъэуцогъагъ, джы Iоф­шIэныр лъыдгъэкIотэщт, пшъэрылъ шъхьаIэу тиIэр ты­гъэгъазэм ипхъын. Мыгъэ ащ гектар 205-рэ едгъэубытынэу тэгъэнафэ. Зытелъыщт чIыгур зэкIэ пэшIорыгъэшъэу дгъэхьазырыгъэ, чылапхъэр игъом зэд­гъэгъотыгъ, — еIо Азэмат.
Илъэс къызэкIэлъыкIохэм Боджэкъо Азэмат чIыгулэжьыным хэшIыкI фыриIэ хъугъэ, лэжьыгъэ бэгъуагъэ къэзыхьыщт технологиехэр къызфегъэфедэх, чылэпхъэ анахь дэгъухэр зэригъэгъотынхэм ыуж ит. Илъэс пчъагъэ хъугъэу мэкъу— мэщымкIэ Краснодар шIэныгъэ-ушэтын институтэу П.П. Лукьяненкэм ыцIэ зыхьырэм бжыхьэсэ чылапхъэр къырещы, ахэм зэрифэшъуашэу зыкъагъэлъа­гъо. Джащ фэдэу тыгъэгъэзэ чылапхъэ­ри Краснодар къыщещэфы. ЫпэкIэ IэкIыбым къыращыхэрэр ары ыпхъыщтыгъэхэр, санкциеу тикъэралыгъо къытыралъхьагъэхэм апкъ къикIыкIэ джы ахэр гъотыгъуаех, Урысыем къыщагъэ­кIыхэрэр еушэтых, анахь дэгъоу зыкъэ­зыгъэлъагъохэрэр къыхехых.
Фермер ныбжьыкIэм хэхъоныгъэхэр ышIынхэмкIэ ыпэрапшIэу зишIуагъэ къакIоу ылъытэрэр къэралыгъо IэпыIэгъур ары, сыда пIомэ чIыгулэжьыным упылъ зыхъукIэ, техникэ зэфэшъхьафыбэ уиIэн фае, IэпыIэгъу къыпфэмыхъу­хэмэ, ахэр къэпщэфынхэр къины.
— ЕзыгъэжьэгъэкIэ фермерхэм IэпыIэгъу ягъэкIыгъэнымкIэ программэм ишIуагъэкIэ илъэс заулэкIэ узэкIэIэбэжьмэ трак— тор зэзгъэгъотыгъ. Сомэ миллионрэ ныкъорэу къысатыгъэм сэ сиахъщэ хэзгъахъуи къэсщэфыгъагъ. Синасып къыхьыгъагъ уасэхэм къахэмыхъозэ сщэфынэу. НэмыкI программэм къы­дыхэлъытагъэу сомэ миллиони 4 зытефэрэ Iэмэ-псымэхэр: пхъэIашэр, зэрыпхъэхэрэр, дискатор, культиватор, нэмыкIхэри зэзгъэгъотыгъагъэх, миллионитIум къыгъэзэжьыгъ. Ахэм анэмыкIэу 2021-рэ илъэсым лизингкIэ комбайн сщэфыгъэу сэпщыныжьы. Мыщ фэдэ IэпыIэ­гъухэр хэмытэу къины улэжьэн­кIэ, чылапхъэхэм, чIыгъэшIухэм, гъэстыныпхъэм, щэнаутхэм ауа­сэхэм ахэхъо зэпыт. Лэжьы­гъэр тэ тызэрэфэе уасэмкIэ тфащэрэп, — еIо Азэмат.
Фермер ныбжьыкIэм илъэс заулэкIэ узэкIэIэбэжьмэ Мамхыгъэ дэтыгъэ колхозым ихьамбар къыгъэнэжьыгъэу тех­никэр ащ дэт. Лэжьыгъэу Iуихыжьырэр зычIитэкъон ылъэкIыщт псэуалъэхэри ащ дэтых, ау ахэр жъы зэрэхъугъэм ыпкъ къикIыкIэ кIашъом къыкIэчъы. Мы илъэсым ар зэтыригъэпсыхьажьын мурад зэриIэри къыхигъэщыгъ.
Боджэкъо Азэмат имэкъумэщ фермер хъызмэтшIапIэ хэхъоныгъэхэр зэрэригъэшIыщтым ыуж ит, къэралыгъо программэхэм джыри ахэлэжьэнэу хьазыр.
ДЕЛЭКЪО Анет.
Сурэтхэр: Iэшъынэ Аслъан.