ВолейболымкIэ Мыекъуапэ ичемпионат ыкIэм фэкIо. Бзылъ­фыгъэхэм язэнэкъокъу хагъэунэфыкIырэ чIыпIэхэр къыщыдэзы­хыгъэхэр, хъулъфыгъэхэмкIэ — финалистхэр къэнэ­фагъэх.

БлэкIыгъэ зыгъэпсэфыгъо мафэхэм щыIэгъэ ешIэгъухэр гъэшIэгъонэу кIуагъэх. Ящэнэрэ чIыпIэм фэбэнагъэх командэхэу «Адыгея-01» ыкIи «СШ N 1» (2010). Апэрэхэр нахь лъэшыгъэх, пчъагъэр 3:1-у зэIукIэгъур ахьыгъ.
ЕшIэгъу шъхьаIэм щызэIукIагъэх Мыекъопэ спорт еджапIэу С.М. Джэнчатэм ыцIэ зыхьырэм икомандэрэ (2007-рэ илъэсым къэхъугъэхэр) «Виктория-АГУ» зыфиIорэмрэ. Мызыгъэгум спорт еджапIэм илIыкIохэр нахь лъэшыгъэх. Тренер-кIэлэегъаджэу Галина Путятинам ыгъэсэрэ пшъашъэхэм ухьазырыныгъэ дэгъу къагъэлъэгъуагъ, 3:0-у текIоныгъэр къыдахыгъ. Турнирыр окIофэ мы командэм иIэгъэ партие 18-м щыщэу зи шIуахьыгъэп.
ХагъэунэфыкIырэ чIыпIэхэр къыдэзыхыгъэхэм дипломхэр, медальхэр ыкIи кубокхэр афагъэшъошагъэх.

Бзылъфыгъэхэм ауж финалныкъом ихьэгъэ хъулъфыгъэ командэхэм ешIэгъухэр яIагъэх. «ПК МГТУ-р» «Шытхьалэм» 3:0-у, «Приставхэр» «Авангардым» 3:0-у атекIуагъэх.
Мэлылъфэгъум и 27-м ящэнэрэ чIыпIэм фэбэнэщтых «Шытхьалэрэ» «Аван­гардымрэ». Чемпион хъущтыр «ПК МГТУ-­мрэ» «Приставхэмрэ» язэIукIэгъу къыщы­нэфэщт.