Адыгэ Республикэм и Правительствэ зычIэт унэм щыкIогъэ зэIукIэр зыфэгъэхьыгъагъэр Урысые Федерацием исхэр дзэ къулыкъум фэгъэхьазырыгъэнхэм, УФ-м ишъолъырхэм а
IофшIэныр зэращызэхэщагъэм епхыгъэ IофшIэныр Къыблэ дзэ коим анахь дэгъоу щызыгъэцакIэхэрэм якъыхэхынкIэ Комиссием Iофэу ышIагъэр ары.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Iофтхьабзэр зэрищагъ АР-м иминистрэхэм я Кабинет и Тхьаматэу КIэрэщэ Анзаур. Ащ хэлэжьагъэх УФ-м и УIэшыгъэ КIуачIэхэм я Генеральнэ штаб и ЗэхэщэкIо-мобилизационнэ гъэIорышIэпIэ шъхьаIэ ипащэ игуадзэу, вице-адмиралэу Владимир Цимлянскэр, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ къулыкъухэм ялIыкIохэр, республикэм ихабзэ игъэцэкIэкIо къулыкъухэм, гъэсэныгъэ зыщарагъэгъотырэ ыкIи общественнэ организациехэм яIэшъхьэтетхэр.
ЗэIукIэр къызэIуихызэ КIэ­рэщэ Анзуар къызэрэхигъэщыгъэмкIэ, дзэ къулыкъум фэгъэ­хьазырыгъэнхэм, ащ епхыгъэ Iофтхьабзэхэр зэхэщэгъэнхэм япхыгъэ Iофыгъохэр зэшIохыгъэ зэрэхъухэрэм Адыгеим и ЛIышъхьэ ренэу ынаIэ атырегъэты.
«НыбжьыкIэхэр яхэгъэгу фэ­шъыпкъэхэу, шIу алъэгъоу пIугъэнхэмкIэ, якъэралыгъо рыгу­шхонхэмкIэ, ащ итарихъ, икультурэ лъытэныгъэ афашIынымкIэ, обществэм шIуагъэ къыфахьынымкIэ, Хэгъэгум икъэухъумэн фэхьазырынхэмкIэ ищыкIэгъэ Iофтхьабзэхэр зэшIохыгъэнхэм республикэм ренэу апшъэрэ мэхьанэ щараты ыкIи лъэшэу анаIэ атырагъэты», — къыIуагъ АР-м иминистрэхэм я Кабинет и Тхьаматэ.
«Республикэм щаштагъ ыкIи щагъэцакIэ шэпхъэ-правовой лъапсэр, ныбжьыкIэхэр яхэ­гъэгу фэшъыпкъэхэу пIугъэнхэмкIэ анахь мэхьанэшхо зиIэхэм ар ащыщ. Къэралыгъо программэхэм атегъэпсыхьагъэу а лъэ­ныкъомкIэ Iофэу ашIэщтыр, ана­хьэу анаIэ зытетын фаехэр агъэнафэх. Дзэ къулыкъум дащыщтхэм ягъэхьазырын нахьы­шIоу зэхэщагъэ хъуным пае илъэс къэс Iофтхьэбзэ гъэнэфагъэхэр зэшIуахых.
Республикэм а лъэныкъомкIэ Iофэу щагъэцакIэрэм фэгъэхьыгъэу игъэкIотыгъэу къэгущыIагъ АР-м иминистрэхэм я Кабинет и Тхьаматэ игуадзу Виктор Орловыр. Ащ къызэрэхигъэщыгъэмкIэ, кIалэхэр еджапIэм джыри чIэсхэзэ дзэ къулыкъум изыфэгъэхьазырын епхыгъэ Iофтхьабзэхэр игъэкIотыгъэу адызэшIуахых. 2024-рэ илъэсым Iоныгъом къыщегъэжьагъэу Адыгеим, зэрэхэгъэгу фэдэу, иеджэпIэ пстэуми предметыкIэу «Хэгъэгум ищынэгъончъэнкIэ ыкIи икъэухъумэнкIэ лъапсэхэр» зыфиIорэр ащакIу хъугъэ. Ащ пае республикэм икIэлэегъэджи 157-рэ Мыекъопэ къэралыгъо технологическэ университетым щызэхэщэгъэ Дзэ егъэджэн гуп­чэм тегъэпсыхьагъэу яIэпэIэ­сэныгъэ джыри нахь хагъэхъоным пае курсхэм ащыIагъэх.
Джащ фэдэу гурыт сэнэхьат гъэсэныгъэ зыщарагъэгъотырэ учреждениехэм ыкIи еджапIэхэм тхьамафэ къэс, блыпэм, «Анахь мэхьанэ зиIэхэм афэгъэхьыгъэ зэдэгущыIэгъухэр» зыфиIорэ егъэ­джэнхэр ащызэхащэх, дзэ-­патриот пIуныгъэмкIэ Iофтхьабзэхэр ащырагъэкIокIых. Илъэсэу икIыгъэм еджапIэхэм ачIэс ыкIи техникумхэм ястудент мини 2,6-м ехъу ащ фэдэ Iофтхьа­бзэхэм ахэлэжьагъ.
Дзэ къулыкъум ылъапсэхэм нахь дэгъоу нэIуасэ афашIынхэм пае гъэсэныгъэ зыщарагъэгъотырэ организациехэм ящыкIэгъэ Iэмэ-псымэхэр аIэкIэгъэхьэ­гъэн­хэм фэгъэхьыгъэ IофшIэныр лъэ­кIуатэ. 2025-рэ илъэсым къыщегъэжьагъэу 2027-рэ илъэ­сым нэс Хэгъэгум ищынэгъончъэнрэ икъэухъумэнрэ афэгъэ­хьыгъэ егъэджэнхэр зыщырекIо­кIыхэрэ кабинетхэр республикэм иеджэпIи 103-мэ ащызэтырагъэ­псыхьащтых. Мы аужырэ илъэси 10-м къоджэ еджэпIэ пстэуми спортзалхэр ащагъэцэкIэжьыгъэх, спорт псэолъакIэхэр ыкIи джэгупIэхэр ашIых.
Адыгэ къэралыгъо университетым и Мыекъопэ къэралыгъо гуманитар-техническэ колледж тегъэпсыхьагъэу дзэ-патриот пIуныгъэмкIэ шъолъыр методическэ Гупчэу «Авангард» зы­фи­Iорэр зэхащагъ, Мыекъопэ къэралыгъо технологическэ уни­верситетым егъэджэпIэ гуп­чэу къыщызэIуахыгъэр дзэ къулы­къум ихьын епхыгъэ Iофыгъохэм афэгъэзагъ, ащ курсантхэр щыгъэхьазырыгъэнхэм кIэщакIо фэхъугъэхэр Урысые Федерацием и Ошъогу-космическэ кIуачIэхэр ары.
НыбжьыкIэхэр яхэгъэгу фэшъыпкъэхэу, ар шIу алъэгъоу пIугъэнхэм пае Урысые дзэ общественнэ движениеу «Юнармием» иамалхэр къызфагъэфе­дэх, «Движение первых» зыфи­Iорэм ишъолъыр къутами ащкIэ ишIогъэшхо къэкIо. КIэлэцIыкIухэмрэ ныбжьыкIэхэмрэ аIуа­гъакIэх хэушъхьафыкIыгъэ дзэ операцием хэлажьэхэрэм, вете­ранхэм, Урысыем и ЛIыхъужъхэм.
Дзэ къулыкъум дащыщтхэм япсауныгъэ изытет лъэшэу анаIэ тырагъэты, илъэс 15 ыкIи 16 зыныбжь кIалэхэу медицинскэ комиссиехэм анаIэ зытетхэр процент 99-м къехъугъэх.
Урысые Федерацием и УIэшыгъэ КIуачIэхэм я Генеральнэ штаб и ЗэхэщэкIо гъэIорышIэпIэ шъхьаIэ ипащэ игуадзэу Владимир Цимлянскэр Виктор Орловым къыIуагъэм къытегущыIэзэ къызэрэхигъэщыгъэмкIэ, республикэм дзэ-патриот пIуныгъэмкIэ Iофышхо щагъэцакIэ, хэгъэ­гум инэмыкI шъолъырхэри а IофшIэкIэшIум нэIуасэ фэшIыгъэнхэ фае.
«Урысые Федерацием ис цIыфхэр дзэ къулыкъум фэгъэ­хьазырыгъэнхэм, Урысыем ишъо­лъырхэм ащ епхыгъэ Iоф­шIэныр зэращызэхащагъэм телъытагъэу Къыблэ дзэ коим ишъолъыр 15-мэ азыфагу рес­публикэм апэрэ чIыпIэр зэнэ­къокъум щиубытыгъ. Шъхьафэу шIуфэс ясхымэ сшIоигъу Урысыем и УIэшыгъэ КIуачIэхэм яветеранхэу а IофымкIэ зишIуа­гъэ къэзыгъакIохэрэм. Тызэгъу­сэу республикэм IофшIэкIэшIоу IэкIэлъ хъугъэм зыщыд­гъэгъо­зэщт, тэ игъоу тлъэгъухэ­рэри ятхьылIэщтых», — къы­Iуагъ Владимир Цимлянскэм.
Комиссием хэтхэм ГТО-м ишапхъэхэр ныбжьыкIэхэм зэратыхэрэм нэIуасэ зыфашIыщт, щэрыоным зэрафагъасэхэрэр зэрагъэлъэгъущт, Мыекъопэ къэралыгъо технологическэ уни­верситетым и Дзэ егъэджэн гупчэ, Адыгэ къэралыгъо университетым и Мыекъопэ гуманитар техническэ колледж дзэм къулыкъур щахьыным фэгъэ­хьазырыгъэнхэмкIэ и Гупчэу «Аван­гард» зыфиIорэр, дзэ-врач комиссиехэм яIофшIэн зэрэзэхэщагъэр зэрагъэлъэгъущт, дзэ-патриот пIуныгъэм ылъэныкъокIэ ухьазырыныгъэ тедзэм ипрограммэ зыщагъэцэкIэрэ кIэлэцIыкIу IыгъыпIэхэм ыкIи еджапIэхэм ащыIэщтых.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет